Есvс Христ танд хайртай

Тунхаглал

2011-11-09T21:50:00.000-08:00

Миний бие эцсээ хүртэл туйлбартай байж, эхэлсэн замаа дуусгах болно.

Миний дотор Ариун Сүнсний хүч чадал байдаг. Надад ухрах зам байхгүй. Миний бие Түүнрүү алхам хийсэн. Бурхангүй амьдралын тав тухаас миний бие бүрмөсөн татгалзаж байна. Миний бие Христийн дагалдагч байхаар нэгэнт шийдсэн. Би өнгөрсөнөө сөхөхгүй, сульдахгүй, удааширч, эргэж буцахгүй. Миний өнгөрсөн, одоо, ирээдүй загалмай дээр урсгасан Христийн цусаар цагаатгагдсан. Амьдрал минь утга учиртай болж Бүтээгч Эзэний мэдэлд очсон. Загалмайн өмнө би, өөрийн дорой амьдрал, өнгөрсөн бүтэлгүйтэл, элдэв төлөвлөгөөнүүд, ирээдүйн талаархи хэрэггүй хараа зорилгууд, Мөнхийн Бурханыг алдаршуулдаггүй хэл яриагаа, үйлдэл үйлсээ, хувиа хичээсэн харамч байдлаа, тодорхой бус бүхнээ өргөж байна.

Миний бие эцсээ хүртэл туйлбартай байж, эхэлсэн замаа дуусгах болно.

Надад Бурханаас л биш бол өөр алдар нэр хэрэггүй. Түүний өгөөгүй байр суурь, эрх мэдэлээс би татгалзаж байна. Есүс Христийн алдрыг халхлах аливаа нэр хүндээс миний бие татгалзаж байна. Хэрэв Эзэн Өөрөө намайг томилоогүй л бол, би хамгийн тэргүүнд байхыг эрмэлзэхгүй. Би бусдын надад үзүүлэх хүндлэл өргөмжлөл, хүлээн авалт болон, тэдний санаа бодлоос ангид байхыг сонгож байна. Хүмүүсийн магтаалыг биш, харин Эцэгийн өгөх шагналыг эрэн хайхаар шийдэж байна. Миний баялаг, бахархал, түшиг тулгуур нь эд хөрөнгө, зэрэг цол, нэр хүнд, албан тушаал биш, харин Мөнхийн амьд Эзэн Бурхан маань, Түүний мөхөшгүй Үг сургааль нь байх болно.

Миний бие эцсээ хүртэл туйлбартай байж, эхэлсэн замаа дуусгах болно.

Одоо миний бие Христийн оршихуйд байгч нэгэн. Би итгэлээ сахина. Миний зорилго тодорхой. Элдэв дайн дажин өрсөлдөөн тэмцэл, бүхий л төрлийн хүчирхийлэл харгислал гэмт хэрэг, садар самуун завхай тачаангуй байдал, авилга хээл хахууль, утга учиргүй зугаа цэнгэл хоосон үргүй баярхал, бүхий л төрлийн өвчин шаналал ядуурал хоосрол, алив донтолтууд болон бардамналуудыг үзэн ядаж, эцэст үхэлийг усттал няцахгүй. Эдгээрийн эсрэг миний бие тасралтгүй залбирна. Хайр уучлал, Эзэний Үг нь миний аливаа үйлс үйлдэл, шийдвэрийн үндэс суурь байх болно. Би хүндрэл бэрхшээлүүдийг, дарамт шахалтуудыг хүлцэн тэвчих болно. Би ойр дотныхныгоо болон дайснаа хүртэл хайрлахаар шийдэж байна.

Миний бие эцсээ хүртэл туйлбартай байж, эхэлсэн замаа дуусгах болно.

Би Бурхан Эцэгийн надад зориулан бүтээж бас хариуцуулсан газар нутаг, ой мод, гол ус, ан гөрөөс, араатан жигүүртэн, мал адгуусыг хайрлан хамгаалж, арчилж тордон, аливаа шунаг хомхой сэтгэлээр хандахгүй байхаар шийдэж байна. Тэдгээрийн үр шим ашиг тусыг зөв зохистойгоор, ариг гамтайгаар ашиглаж, Эзэний хаанчлалд харамгүйгээр өргөх болно. Би байгал дэлхийн цэвэр ариун, онгон дагшин байдалтай бүхий л талаар хүндэтгэлтэй харьцаж, тэдгээрийг аливаа харгис бурангуй халдлага сүйтгэлээс өмгөөлөн хамгаалхаар, тиймэрхүү бүхий л хандлага харьцаатай эвлэрэхгүй байхаар шийдсэн.

Миний бие эцсээ хүртэл туйлбартай байж, эхэлсэн замаа дуусгах болно.

Би Есүс Христийн дагалдагч. Хүмүүст Түүнийг л гэрчлэн ярих болно. Тэрээр намайг хүчирхэгжүүлдэг тул, би Түүгээр дамжуулан хүн төрөлхтөний авралын төлөө боломжтой бүхнийг хийхээр шийдэж байна. Алив харанхуй бурангуй үзэл суртал, тогтолцоо бүтэц, хана хэрмүүдийг, алив дарангуй харгис засаглал, хууль ёс, хэв маягыг газар дэлхийгээс үүрд арчигдтал зүтгэх болно. Би элдэв мэргэ төлөг, илбэ шид, шившлэг дом, ховс нөлөө зэрэг мухар сүсэгийн бүхий л зан үйл, шүтлэг мөргөлийн аливаа өндөрлөгүүдийг үзэн ядаж, хүн төрөлхтөний зүрх сэтгэлээс тэдгээрийн хорон муу нөлөөг арчин хаяхын төлөө тууштай залбирч, тэмцэх болно. Есүс Христээр дамжуулан надад өгсөн хүчээр, миний бие Бурхан Эцэгийнхээ алдарын төлөө хөдөлмөрлөх болно.

Миний бие эцсээ хүртэл туйлбартай байж, эхэлсэн замаа дуусгах болно.

Би урагшлахдаа тууштай байхаар шийдэж байна. Миний хараа үргэлж Мөнхийн Улс руу чиглэх болно. Намайг Газарчлагч Нэгэнийг дагахаар шийдсэн. Би урвахгүй. Энэ дэлхийтэй эвлэрэхгүй, түүний заль мэх, уруу татагч гэм нүгэлийг эсэргүүцэж амьдрах болно. Хойш ухрахгүй, эргэж няцахгүй, замын дунд зогсохгүй, харин бат итгэлтэй, хатан зоригтой, тууштай байхыг сонгож байна. Миний бие, Христийн төлөө өөрийн амьдралыг золин, зориулахыг шийдсэн. Дахин эргэлзэхгүй. Нөхцөл байдал хэдий хэцүү байсан ч, би дайсантай нэг ширээнд сууж хэлэлцэн тохирохгүй, эвлэрэхгүй. Гуйвамтгай байхаас татгалзаж байна.

Миний бие эцсээ хүртэл туйлбартай байж, эхэлсэн замаа дуусгах болно.

Миний бие чадах хирээрээ бусдад өгөх болно. Би бусдын өмнө хайраас өөр өртэй байж, Эзэний тушаагаагүй гэрээ хэлцэл, тохироо, амлалтын буулганд орохгүй. Эзэн надад, “болсон, хангалттай” гэж хэлэх хүртэл, Сайн мэдээний төлөө цуцалтгүй хөдөлмөрлөсөөр байх болно. Сайн мэдээг бусдад тунхаглан, тэдний төлөө халуунаар залбирч, ургацын талбайд хичээнгүйлэн хөдөлмөрлөж, ургац хураах хүртлээ би бууж өгөхгүй, эрч хүчээ алдахгүй, цөхрөхгүй байх болно. Би хувь заяанаас ямар нэг аз жаргал, амжилт ололтыг горьдон хүлээхгүй. Зөвхөн Түүний дахин ирэлтийг чин сэтгэлээсээ итгэж найдан, үнэнчээр хүлээх болно.

Миний бие эцсээ хүртэл туйлбартай байж, эхэлсэн замаа дуусгах болно.

“Дотоод эдгэрэл, ариусал, чөлөөлөлтийн үндэс” курсийг төгсөгчидийн тунхаглалаас үндсэн санааг авч, теологийн болон найруулгын засвар хийж шинэчилсэн хувилбар

”Монголын уламжлалт сэтгэлгээ, арга билгийн ухааны үндэс” хичээлийн тухай

2011-10-24T04:26:00.000-07:00

Мэдээлэл бүртгэсэн: administrator огноо: 2010-10-14
2010-05-21 Дугаар: 103
Монголчууд бид иргэншил, соёл, хэл, бичиг, утга зохиол, урлаг, ёс заншил, шашин шүтлэг, ёслол хүндэтгэл зэрэгарга билгийн шүтэн барилдлагын гүн сэтгэлгээ бүхий оюуны олон талт, арвин их өв сантай ард түмэн билээ.

Хотол дэлхийн даяарших үйл явц хүрээгээ тэлж буй эдүгээ цаг дор монголын оюун, сэтгэлгээний өв уламжлалаас суралцах, судлах, хадгалан хамгаалах, сэргээн дэлгэрүүлэх, баяжуулан хөгжүүлэх замаар үндэсний болон нийтийн эрх ашиг, аюулгүй байдал, иргэний эв нэгдэл, хувь хүний итгэл үнэмшил, соёл, үнэт зүйлс, халдашгүй байдлын баталгааг бэхжүүлэх, Монгол хүн бүрийг бага балчраас нь үндэсний уламжлалт соёл, ёс заншил, зан үйлд сургаж амьдрал ахуйд нь мөрдлөг болгон хэвшүүлэх хэрэгцээ шаардлага зүй ёсоор урган гарч байна.

Монгол үндэсний үнэт зүйл, соёл, ёслол хүндэтгэл, ёс заншлын нийтлэг хэм хэмжээг хүүхэд залуучуудын өдөр тутмын амьдрал ахуйд төлөвшүүлэх зорилго бүхий олон нийтийн үүсгэл санаачлагыг бүрнээ дэмжиж, Монгол Улсын Үндсэн хуулийн гучингуравдугаар зүйлийн 1 дэх хэсгийн 3 дахь заалт, Монгол Улсын Ерөнхийлөгчийн тухай хуулийн 12 дугаар зүйлийн 12 дахь хэсгийг тус тус баримтлан ЗАРЛИГ БОЛГОХ нь:

1. Ерөнхий боловсролын суралцагчдад үндэсний үнэт зүйлс, соёл, уламжлалт сэтгэлгээ, зан заншлын нийтлэг хэм хэмжээг таниулах зорилгоор "Иргэний боловсрол" хөтөлбөрийн хүрээнд заавал судлах "Монголын уламжлалт сэтгэлгээ, арга билгийн ухааны үндэс" хичээлийн хөтөлбөрийг батлан хэрэгжүүлэхийг Засгийн газарт чиглэл болгосугай.

2. Улс үндэстнийнхээ оюуны биет ба биет бус өв соёл, үнэт зүйлс, уламжлалт зан заншлыг өвлөх, хадгалах, хамгаалах, судлах, сурталчлах хөдөлгөөн өрнүүлэхийг нийт ард иргэд, айл өрх, төрийн ба төрийн бус байгууллага, урлаг соёлын болон бүх шатны боловсролын байгууллагын ажилтнуудад уриалсугай.

МОНГОЛ УЛСЫН ЕРӨНХИЙЛӨГЧ Ц.ЭЛБЭГДОРЖ

МОНГОЛ УЛСЫН ЕРӨНХИЙ САЙД С.БАТБОЛД

President.mn сайтаас...

Ерөнхийлөгчид бичсэн захидал

2011-10-24T03:59:00.000-07:00

Сайн байцгаана уу? Эрхэм хүндэт "Иргэний танхим"-ын албан хаагчид аа. (Ингэж хандах нь зөв үү? Эсвэл "Монгол улсын ерөнхийлөгчийн ажлын албаныхан" гэх үү? Эсвэл "Монгол улсын ерөнхийлөгчийн тамгын газрынхан" гэх үү? Нэр томъёоны хувьд буруу хандсан бол хүлцэнэ үү?) Монгол улсын ерөнхий боловсролын сургалтын хөтөлбөрт "Үндэсний ёс заншил, уламжлал ба арга билгийн гүн ухаан" ч гэнэ үү, хичээл оруулах талаархи санал асуулга, хэлэлцүүлэг явагдаж буйг Eagle TV-гээр үзээд, уг хаягыг олж та бүхэнд хандаж байна.

Тэгээд дээрхи асуудлын талаар зарим зүйл лавлах гэсэн юм. Хожимдож мэдэж, хоцорч хандсандаа хүлцэл өчье.
Асуулт ба хүсэлт:
1. Монгол улсын Үндсэн хуульд "Хүн болгон шүтэн бишрэх, шашин шүтлэг ээ, ертөнцийг үзэх үзлээ чөлөөтэй сонгох эрхтэй" гэсэн заалт байдаг шиг санагдана. Энэ бол "хүн" гэдэг оршихуйн оршин тогтнолынх нь хамгийн эмзэг, чухал, оршихуйнх нь утга учрыг тодотгодог, тодорхойлдог, хувь хүний өөрийгөө болон бусдыг үзэх үзэл, үнэ цэнийг нь бүрдүүлдэг талбар. Энэ асуудалд маш болгоомжтой, өндөр ач холбогдол өгч, нухацтай хандах ёстой. Үүнийг ямарч төр, засаглал, эрхшээл ноёрхлоор, эрх мэдлээр далайлган нэг мөр, нийтийг хамарсан нэгдмэл байдлаар шийдэж чадаж байгаагүй ба ингэх оролдлого бүр харгислал, бурангуй харанхуй, эрх чөлөөгүй боогдмол байдлыг бий болгож, аймшигт хагарал, тэмцэл зөрчилийн үндэс суурь болж, улмаар уг төр, үндэстэн мөхөх үндэс болсоор ирсэн түүхтэй. Гэтэл хуулийн энэхүү заалтаа ч зөрчөөд, түүхэн сургамж, хүн төрөлхтөний нийтлэг үнэт зүйлсийг ч үл харгалзан, сонголт хийх боломж, чадвар, ухамсар төлөвшөөгүй нялх балчир үеийн оюун санаа, зүрх сэтгэлийг хүчээр "өмчилж, боолчлохыг" яагаад оролдоно вэ? Энэ бол маш бурангуй оролдлого, хатуугаар хэлбэл оюун санааны хүчирхийлэл мөн.

2. TV-гээр гарч буй хэлэлцүүлэг, саналаа хэлж буй оролцогчдын ерөнхий уур амьсгал, хэлж буй үг, ялангуяа "ерөнхийлөгчийн шашны зөвлөх"-ийн байр суурь зэргээс харахад, Хичээлийн үндсэн агуулга бараг л нэг л шашныг тунхагласан, бусад итгэл үнэмшилийг үл тоомсорлосон, хашигдмал харанхуй, тодорхойгүй, өгөөжгүй болох шинж анзаарагдаж байна. Хүн төрөлхтөн үүсэн бий болсон цагаас, сүнслэг төлөвшилд нь хамгийн нөлөөтэй байр суурь эзэлж байсан "Сайн ба муугын зөрчил тэмцэл", ирээдүйдээ хандах хандлага, зорилго эрмэлзлэлд нь "Шарын шашин" л хамгийн зөв эцсийн шийдэл, гаргалгаа өгчихсөн юм шиг, тэгээд түүнийг л хар багаас судалснаар үндэстэн хөгжчих юм шиг, хэт нэг талыг барьсан харалган хэлэлцүүлэг болсон. Монголынхоо түүхийг нээлттэй нүдээр сайтар хараач ээ. Тиймээс дахин сайтар зарлан тунхаглаж, сурталчилж байгаад 2 дахь хэлэлцүүлэг явуулж өгнө үү.!

3. Уг хичээл байж болно, гэж би хувьдаа үзэж байгаа бөгөөд, харин дотоод агуулга нь огт өөр байх ёстой. "Үндэсний ёс заншил, уламжлал" гэдэгт малчин ардын ахуйн соёл (гэр хэрхэн хийдэг болон барьдаг, буулгадаг талаар, мал хариулах ухаан, байгал дэлхийг ажиглан шинжиж, уур амьсгал, үзэгдэл юмсийг танин мэддэг, ахуй амьдралдаа зохистойгоор харгалзан үздэг талаар, хүүхэд хүмүүжүүлэх монгол арга, монгол эр хүн, монгол бүсгүйн ёс жудаг, эрхэмлэх зүйлсийн талаар, гэр бүлийн эмх цэгц, дэг журам, ёсзүй, хүндлэх хүндлүүлэх ёсны талаар, хоол хүнс, хэрэглээний соёл, тэдгээрт хамааралтай нэр томъёонууд, мөн газар нутгийн нэр ус, тэдгээрийн утга учир, агуулгын талаар, 5-н хошуу малын болон маллагааны онцлог, ялгааны талаар, бэлчээр нутгын онцлог, бүсчлэл тэдгээрт таарсан ахуйн ба маллагааны, нүүдлийн соёлын талаар... гэхчилэн) амьдрах арга ухааны талаар л байна уу гэхээс, ямар нэгэн шашны хичээл байж огт таарахгүй, гэж бодож байна.

За TV-гээр гарсан хэлэлцүүлэгийг үзээд, нэг иймэрхүү санал бодолтой байгаагаа бичиж илгээхээр шийдлээ. Хэрвээ энэ "хууль" ч гэдэг юм уу, журам ч гэдэг юм уу, тогтоол шийдвэр ч гэдэг юм уу зүйл нь батлагдвал, ажил хэрэг болохоор эцсийн шийдвэр ерөнхийлөгчийн зүгээс гаргавал, "Үндсэн хууль"-ийг, хүний эрхийг зөрчсөн гэдэг үндэслэлээр шүүхэд хандаж болох уу? Асуудал ийм байдлаар бүү эргээсэй гэж би өөрийн итгэдэг Бурхандаа залбирч байна. Та бүгдийн саруул ухаанд найдаж байна.

Ертөнцийг Бүтээгч, цорын ганц, хамгийн Дээд Эзэн Бурхан байдаг бөгөөд энэ ертөнцийн бүх үзэгдэл юмс, оршихуй Түүний л хүслээр оршин байдаг. Ноён Элбэгдоржид, Монгол улсын төрийн тэргүүн байх эрхийг ч Тэр л олгосон. Гэхдээ Өөрийг нь эсэргүүцэж, Түүний ард түмнийг эргүүлээд бурангуй харанхуй руу чирээсэй гэж хүсээгүй нь тодорхой. Тэр хэдийгээр үнэмлэхүй эрх мэдлээр бүхнийг хянаж, амьдралын зохист харьцааг удирдаж байдаг боловч, хүмүүнийг харанхуй, дарангуй байдлаар боолчлохыг хүсдэггүй. Тэр бидэнд ухамсартай сонголтыг хийх боломжийг өгдөг ба зохистой шударга шүүлтийг хэрэгжүүлдэг юм.

Дээд Тэнгэр Бурханаас гаралтайгаа ямар ч үлгэр домгийн шинжгүйгээр, үндэслэлтэйгээр нотлож, бахархаж, омогшиж ирсэн 2-хон үндэстэн дэлхийд оршдог. Нэг нь бид шүү дээ. Биднийг (өвөг дээдсийг) ашиглан, дошны сэтгэлгээтэй бурангуй хүмүүний ертөнцийг сэгсрэн сэрээж, түүхийг хөтлөн удирдаж байсан нь Тэр юм. Тэр одоо ч хүн төрөлхтөнийг түүхийн шинэ эринд хөтлөн авчраад, шинэ сонголтыг тулгаж байна. Түүхийг эрс өөрөөр, цоо шинээр хөтөлхөд нь бас л бид л (Монголчууд) ашиглагдана. Учир нь бид Түүний хүүхдүүд юм. Тэр бидэнд хайртай. Харин энэхүү "Шарын шашин"-ы талыг барьсан шийдвэр тань Түүнд огт таалагдахгүй гэдгийг дахин онцлон анхааруулъя.
Олон талаас нь нухацтай судалж, сайтар бодож бас зөвлөж байж шийдвэр ээ гаргагтун. GOD bless YOU.

Уг захидалыг 2010 оны 05 сарын 13 нд irgen@president.mn хаягаар явуулсан болно. Гэвч харамсалтай нь 2010 оны 05 сарын 21 нд 103тоот зарлиг батлагдсан.

Эзэн Есүс Христ дахин амилсан баярын мэнд хүргэе

2011-04-21T01:15:00.000-07:00

Эзэн Есүс Христ мэндэлсний баярын мэнд хүргэе

2010-12-27T05:35:00.000-08:00

Аз жаргалын талаархи бодролоо хуваалцахуй

2010-11-30T07:09:00.000-08:00

Бурханы охинд бичсэн захидал-4

Сайн байна уу? Бурханы хайртай охин минь ээ. Таны бие болоод сэтгэл Их Эзэний ивээл ерөөлөөр бялхаж байгаа биз дээ? Таны төлөө залбирах бүр Эзэн маань тайвшрал, баяр баясгаланг мэдрүүлдэг. Тиймээс ч бүх зүйл тань сайн сайхан байж, Эзэний ивээл ерөөл, хяналт хамгаалалтанд байгаа юм байна, гэж мэддэг.

Мэдээж бас бэрхшээл, шийдэгдээгүй асуудлууд нэгээр тогтохгүй байгаа л байх. Гэхдээ хүмүүний амьдралын зорилго, хараа нь асуудал бэрхшээлийн цаана гарахын төлөө биш, харин амьдралыг, Бурханыг, бусдыгаа хайрлахын төлөө байвал, жинхэнэ утгаараа аз жаргал, амжилт ололт, амар тайвнаар, гэрэл гэгээгээр дүүрэн байх болно.

Бид санаатай болон санаандгүйгээр маш олон зүйлийг амьдралаас, бас Бурханаас хүсэн хүлээж байдаг. Тэдгээрийг нийтэд нь багцлаад “аз жаргал”, гэсэн нэр томъёогоор тодорхойлох гэж оролдсоор ирсэн.

Аз жаргал гэж ер нь яг юуг хэлэх вэ? Энэ нь бодит зүйл үү? Эсвэл хийсвэр, хоосон горьдлого уу? Хэн энэ ертөнцөд аз жаргалтай вэ? Юугаар түүнийг хэмжих вэ?

Мэдээж хүн болгон л өөрийн гэсэн аз жаргалын талаархи тодорхойлолтыг хэлэх байх. Гэхдээ энэ цаг үеийн нийтлэг нэг тодорхойлолтыг гаргаж бас болох юм. Хүн хүний өөрийн гэсэн үнэ цэнийн талаархи ойлголт, эрхэмлэх, хүсэн тэмүүлэх зүйлс, өссөн орчин, тойрон хүрээллийн нийтлэг хэвшмэл ойлголт, итгэл үнэмшил зэргээс шалтгаалан “аз жаргал”-ын талаархи төсөөлөл хэлбэрждэг.

Яг таны хувьд “аз жаргал” гэдэг нь юу вэ? Та өөрийгөө аз жаргалтай хүн гэх үү? Таны аз жаргал хормын төдийд мэдрэгдээд өнгөрдөг мэдрэмж, догдлол, таашаал, сэрэлээр хэмжигдэх үү? Үзэгдэх харагдах эд хөрөнгө, гял цал өнгөлөг чамин зүйлсээр, амттай шимтэй хоол хүнсний элбэг дэлбэг байдлаар, бүр эсвэл эргэн тойрныхон тань таныг, гоо үзэсгэлэнгээр тань, ур ухаанаар тань, авъяас чадвараар тань, мэдлэг боловсролоор тань, зан аалиар тань шагшин бахдаж, бишрэн ширтэж, тойрон хүрээлвэл та аз жаргалтай байх уу?

Бас хүссэн газар орон, улс үндэстэн, түүхэн дурсгалт болон байгалын үзэсгэлэнт газруудаар тааваараа аялж жуулчлан, цэнгэж наргих нь “аз жаргал”-ын хэмжүүр үү? Үнэхээр эдгээр болон бусад олон тодорхойлолтууд, төлөв байдлууд нь таньд оргилсон баяр хөөр, цаглашгүй гэрэл гэгээ, сэтгэлийн гайхам цэнгэлийг өгдөг үү?, гэхчилэн олон талаас нь, янз бүрээр л эрэгцүүлэн, тунгаан бясалгаарай, гэж таниас хүсэе.

Ер нь хүмүүний зүрхийг, аз жаргалын талаархи ямар нэгэн хуурмаг хоосон төсөөлөл, зураглал, мэдрэмжүүд хүлсэн байдаг. Эдгээр нь ихэвчлэн махан биеийн тав тух, ахуйн тохилог нөхцөлөөр л хэмжигддэг. Яахав зарим нь бие махбодийн эрүүл мэндтэй холбож, бас гэр бүлийн дотоод халуун дулаан уур амьсгал, бүрэн бүтэн байдлаар тодорхойлох л байх.

Хүмүүн нь өөрийнхөөрөө аз жаргалын тодорхойлолт, хэм хэмжүүр, үзүүлэлт гарган зүрхнийхээ мухарт хадгалчихаад, тэгээд л түүнийгээ эрж хайгаад, олж эзэмших гээд л тэмцээд, зүтгээд байдаг. Гэтэл үнэндээ тэр болгоныгоо бүрэн дүүрэн үзэж, амталж, бүрдүүлж, тойрон хүрээлүүлсэн ч, эзэмшин эдэлсэн ч жинхэнэ утгаараа аз жаргалыг мэдэрдэггүй.

Учир нь хүн хэдийгээр мөхөс дорой, өчүүхэн бодьгаль боловч хязгааргүй их шунал хүсэл, ханаж цадашгүй, дүүргэгдэшгүй хоосон, ховдог хомхой сэтгэл түүний дотор оршдог.

Хашаанд амьдардаг хүн байранд л орчихвол амьдрал нь сайн сайхан болж, бүх асуудал нь шийдэгдэх юм шиг бодож, төсөөлж байдаг. Байранд амьдардаг нэгэн нь, эдлэн газар, хувийн тансаг сууц, харш мөрөөддөг. Тэдгээрийг л эзэмшчихвэл аз жаргалтай болж, амьд яваагынх нь зорилго нь биелэх юм шиг санадаг.

Дугуйтай нь мотоцикл мөрөөдөж, мотоциклтой нь машин мөрөөдөж, машинтай нь hammer-тай, бүр усан болон нисдэг онгоцтой болохыг санаархаж байдаг, гэхчилэн. Үүнийг бас өөр талбар, төлөв байдал руу ч шилжүүлэн зураглаж болно. Бакалаврын зэрэг цол, дипломтой нь магистрт санаархаж, магистрынхтай нь дараагийн доктор, профессор, акидемич гэх мэт цол гуншинг, дагалдан ирэх алдар хүндийг хүсэл мөрөөдлөө болгодог.

Бас хороон дарга нь дүүргийнхийг, дүүргийн дарга нь хотын захирагчийн суудлыг, хотын дарга нь их хурлын гишүүний, бүр цаашлан ерөнхий сайд, ерөнхийлөгчийн сэнтийг хүсэн мөрөөддөг. Ерөнхийлөгч болсон нэгэн нь үндэстний, түүхэн агуу их удирдагч, эсвэл бүр хаан болохыг ч санаархаж мэднэ. Гэвч эдгээр нь бүгд хоосон зүйлс.

Бас нөгөөтээгүүр хүмүүн нь энэхүү “аз жаргал” гээчийг өнгөрөн одсон цаг үед, хуучин дурсамжинд, эсвэл ирээдүйд хэзээ нэгэн тодорхойгүй цаг хугацаанд хамааруулан ойлгох, тайлбарлах хандлагатай байдаг. Гэтэл энэ нь яг одоо цагын ухагдхуун шиг. Эзэн биднийг хүүхэд адил болохгүй бол Мөнхийн улсад орохгүй, гэдэг.

Хүүхдэд өнгөрсөн гэж үгүй, бас ирээдүй ч гэж үгүй учраас, тэд хамгийн аз жаргалтай сэтгэл хангалуун амьдарцгаадаг. Өөрөөр хэлбэл тэд өнгөрсөнөө санан дурсаад гоморхоод, гуниглаад, эсвэл ирээдүй рүүгээ “холыг харж” том том зорилго тавиад, тэдгээрийнхээ биелэх эсэхэд санаа нь зовон шаналдаггүй, зөвхөн яг одоо цагаараа амьдарч, юухнаас ч чамин сонинг, зугаатай хөгжилтэйг олж харж, хөөрөн баясах нь, өчүүхэнд ч сэтгэл ханан догдлох нь гайхамшигтай ажгуу. Тэд бол тэнгэрийн улсын гэрэл гэгээ, ариун цайлган, төгс төгөлдрөөр амьдрагсад буюу газар дэлхий дээрхи тэнгэрийн элч нар мэт.

Эндээс хүн болгон л тэнгэр элчийн хувиар дэлхий рүү илгээгдсэн боловч, харамсалтай нь цаг хугацааны явцад, хорон муу тойрон хүрээллээсээ болж эвдрэн бохирдож, тэнгэрлэг мөн чанараа гээдэг нь, аз жаргалаасаа төөрөн одохын шалтгаан нь болдог, гэсэн гаргалгаа гаргачмаар. Гэхдээ бас л учир дутагдалтай.

Хүмүүн нь хичнээн гэнэн хонгор, цайлган цагаахан амьдравч “аз жаргал эдэлж” буйгаа ч тодорхойлон хэлж мэдэхгүй байвал, ерөөс “аз жаргал”-ын тухай ярих нь утгагүй болно. Харин сайн муу, сайхан муухайг танин мэдээд, ялгаж салгаад, улмаар ухамсартайгаар, зорилготойгоор, бүрэн хариуцлагатайгаар төгс сайныг сонгосон тохиолдолд л “аз жаргал” гэдэг энэ ухагдхуун, жинхэнэ утгаараа үнэлэгдэх юм шиг.

Ер нь “аз жаргал” гэдэг холбоо үгийн утгыг нэг нягталаад үзье. “Аз” гэдэг нь хувь хүнээс өөрөөс нь үл шалтгаалах, гэнэт учрах хоромхон зуурын тохиол, учралыг хэлдэг. “Жаргал” гэдэг нь сэтгэл ханамж, таашаал, баяр хөөрийн мэдрэмжийг хэлдэг. Тэгэхлээр хүний амьдарлын замд гэнэт тохиолддог завшаантай учрал, гэж ойлгогдож байна.

Нээрээ ч хүнд өөрөөс нь үл шалтгаалаад ирдэг, бас өөрөөс нь үл шалтгаалаад авагддаг зүйл бол энэхүү “аз жаргал” гэсэн ухагдхуун юм (Энэ ухагдхуун дотор маш олон янзын ойлголт, төсөөлөл, амьдралын өрнөл, төлөв байдлыг өгүүлж байгаа шүү дээ). Тэгэхлээр энэ нь хүмүүнээс өөрөөс нь үл шалтгаалдаг, өөрийнх нь хяналтанд баригддаггүй, тогтворгүй, найдваргүй, түр зуурын, тохиолдлын хором мөчийг хэлдэг шиг.

Эндээс “аз жаргал”-ын талаархи хүмүүний олон янзын төсөөллүүд нь цаг зуурын, үзэгдээд л өнгөрдөг, өөрт нь тэнгэрлэг өөрчлөлт шинэчлэлт, дотоод хорон муугаа ялган таних, улмаар түүнийгээ ялах хүч онгод, ялалт, тэдгээрийнхээ хүлээснээс ангижрах эрх чөлөөг өгдөггүй, тэр тусмаа Мөнх Амийг өгдөггүй, хуурмаг хоосон ухагдхуун гэдэг нь анзаарагдана.

“Аз гэдэг сохор юм. Сохор хүнийг ч дайрч болдог. Харин мэргэн хүн чадал эрдэмдээ шүтдэг юм”, гэж эртний нэгэн киноны баатар (Цогт тайж) өгүүлдэг нь санаанд орж байна. Энэ нь тун ч оносон үг, гэж би боддог. Тиймээс ч үүнээс хойш энэхүү ухагдхууныг “цэнгэл жаргал” гэвэл яасан юм бэ, гэж бодогдох юм. Гэхдээ хүмүүний оюун санаа, зүрх сэтгэлд бат бөх суулгагдсан нэр томъёо тул энэхэн захиандаа хэвээр нь ашиглая.

Хүн унах унаагүй, явган явдаг ч бай, орох оронгүй, айлын хажууд толгой хорогддог ч бай, тэр ч бүү хэл бичиг үсэг тайлагдаагүй, амьдралдаа хот орон газар очиж үзээгүй ч бай аз (цэнгэл) жаргалыг мэдэрч, амар тайван, сэтгэл ханамжтай амьдарч болдог.

Аз (цэнгэл) жаргал гэдэг ойлголт нь хийсвэр хоосон, хуурмаг ухагдхуун биш ээ. Аз (цэнгэл) жаргал бол үнэхээр бодит зүйл. Гэхдээ гарт баригддаггүй, нүдэнд харагддаггүй, чихэнд сонсогддоггүй, хамарт үнэрлэгддэггүй, аманд амтлагддаггүй ухагдхуун.

Аз (цэнгэл) жаргал зөвхөн Эзэн Бурханы мутарт л бий. Тэр мутараа дэлгэн түүнийг таны зүрхэнд өгвөл, санаанд тань оромгүй эгэл жирийн ахуй нөхцөл, энгийн орчин тойрон, ердийн учрал тохиолдлоос баяр хөөрийг амсаж, аз (цэнгэл) жаргалтай амьдрах болно. Энэ нь хүний зүрхэнд Ариун Сүнснээс өгөгддөг, байгаа зүйлдээ сэтгэл ханамжтай байх, хэн байгаадаа талархалтай байх мэдрэмж юм. Бас энэ нь, Эзэний Үгнээс өгөгддөг дотоод зүрх сэтгэлийн ухаарал, гэгээрэл, амар тайван юм.

Эзэн хүмүүнийг аз (цэнгэл) жаргалтай байлгах бүх нөхцөлийг бүрдүүлж өгсөн байдаг. Биднийг шавьж хорхой биш, тухайлан хүн болгон төрүүлсэн. Амьсгалах агаар, идэх хоол, сайхан эх орон, сайн эцэг эх, ах эгч дүүс, сайн хань ижил, сайхан үр хүүхэд бүгдийг л өгдөг.

Бас дээр нь там руу чирэх гэм нүгэлийг минь, цорын ганц Хүүгийнхээ загалмай дээр урсгасан цусаар угааж, цэвэрлэж өгөөд, дахин амилалтаар нь Мөнх Амийг бэлэглэсэн. Энэ бүхнийг ойлгож ухаарч, итгэж үнэмших юм бол энэ ертөнцөд хэнтэй ч зүйрлэшгүй, юугаар ч хэмжишгүй аз (цэнгэл) жаргалтай нэгэн болно. Тэгээд амьсгалах мөч бүрдээ Эзэн Бурхандаа талархаж амьдрах болно.

Амьсгал гэснээс, намайг оюутан байхад, манай сургуульд сурч байсан нэгний тухай цухас дурьдая. Тэрээр уушигны өмөн үү, гэдэг өвчин туссан нэгэн байсан. "Эрүүл саруул, зүв зүгээр л амьсгалаад алхаж байх чинь ямар их ивээл, нийгүүлсэл, аз жаргал гэж санана..." гэж ярьдаг байж билээ. Учир нь уушиг нь хүнд өвчтэй учраас, үе үе амьсгал нь боогдож тарчилдагсан. Лав л миний мэдэхийн, нэг удаа 2 минут хэртэй амьсгал нь боогдож, царай нь хөхрөн, газар унаад тийчэлж билээ. Дараа нь гэнэт амьсгаа татаж хэвийн байдалдаа орсон юм даг. Тэгээд л уйлаад л Бурхандаа талархаж байсан.

Үүнийг хараад би, эрүүл бүрэн бүтэн биетэй, саруул оюун сэтгэлгээтэй, тэгээд болоогүй гэм нүгэлээ уучлуулсан, Эзэнийхээ төлөө сурч, боловсорч, хүн төрөлхтөний сайн сайхны төлөө зүтгэж, тэмүүлж яваадаа үнэхээр их талархаж билээ. Аз (цэнгэл) жаргал бидний эргэн тойронд, яг хажууд, дэргэд байдаг, үргэлж байсаар ирсэн зүйл. Харин түүнийг харж, хүлээн авч, мэдэрч, бас үүнийг өгсөн Бурхандаа талархаж чадаж байна уу? гэдэг л гол асуудал юм.

Уг нь Эцэг, загалмайгаар дамжуулан хүн төрөлхтөнд аз (цэнгэл) жаргалыг үнэгүйгээр бэлэглэсэн боловч, ямар нэгэн хоосон аз жаргал, сэтгэл ханамж, таашаалын эрэлд донтсоор, хэзээ ч жинхэнэ аз (цэнгэл) жаргалыг эдэлж үзэлгүй өнгөрөн одогсод байсаар л байна.

Хэдийгээр тансаг харшид амьдравч, дүүрэн амттан өрсөн ширээнд хоолловч, сайн хань ижил, сайхан үр хүүхэдтэй болж, итгэмжит нөхдөөр хүрээлүүлэвч, авъяас билэг, эрдэм боловсролыг эзэмшивч, эрх мэдэл, нэр алдарт хүрэвч, үргэлж сэтгэл дундуур, илүү ихийг нэхээстэй, шаардаастай, гомдолломтгой, ялархуу, бусдад байгаатай өөрийнхийг харьцуулсан, тэгээд бусдын зүйл илүү сайхан санагдаж, өөрийнхийг гологч нэгэн нь ямар золгүй нэгэн бэ.

Бүр Христийн дотор, Түүнд үйлчилдэг, зүгээр ч үгүй бусдыг харахад амжилттай, үлгэр дууриалтай үйлчилж буй мэт итгэлийн хүмүүс ч, ямар нэгэн зорилго, төлөвлөгөө, төсөөлөлдөө боолчлогдон донтож, тэдгээрийнхээ биелэлтийн төлөө өдөр шөнөгүй шаналан, аз (цэнгэл) жаргал, баяр хөөрийг мэдрэхгүй, амталж үзэхгүй байгаа нь анзаарагддаг. Нэг л их хийрхэл, ачаа дарамт өөрийнхөө болон эргэн тойрныхныхоо нуруун дээр овоолсон, өөрөө ч дарамт стресстэй, бусдыг ч дарамтлан ядраасан, оршин байгаа орчин тойрондоо айдастай, уйтгар гунигтай уур амьсгал, хүнд нөхцөлийг бий болгодог хүн байх юм.

Ариун Сүнсний үр жимс болсон бурханлаг даруу зан чанар, тэнгэрлэг ёс суртахууны ямарч төлөвшил, өөрчлөлтгүй, өөрчлөгдөхийг ч эрмэлздэггүй, үргэлж өөрийнхөө “зөв” гэж боддог, өөрийнхөө “зөв”-ийг бусдад тулгаастай, тэрхүү “үнэт эрдэнэ”ээ аливаа шүүмжлэл, зэмлэл, анхааруулгаас амь тавин хамгаалаастай, тэгээд “дэлхийн гэрэл, газрын давс” байхыг бусдад “заадаг”, Бурханы хайрын тухай цэцэрхэн “номолдог” нэгэн байх юм.

Хэзээ ч ханаж цаддаггүй мангас адил хоосон хомхой зүрхтэй, тэгээд болоогүй Бурханы төлөө, Түүний ариун зорилгын төлөө, бусдын сайн сайхан, авралын төлөө гэхчилэн тэрхүү аймшигтай харанхуй байдлаа гоёж хаацайлах нэгэн нь хөөрхийлөлтөй.

Өөрөө хэзээ ч аз (цэнгэл) жаргал, баяр баясгалантай байж үзээгүй хүн, ямар ч сайхан нэр томъёо, зорилго хараагаар гоёод бусдад аз (цэнгэл) жаргал, баяр хөөр, хайр энэрлийг дамжуулж, өгч чадахгүй. Энэ нь зүрхэндээ Бурханыг болон бусдыг биш, харин өөрийгөө л бодож, өөртөө л хэт төвлөрч, бардамнан явдагаас болдог юм уу даа, гэж бодогддог юм.

Хүний дотроос, зүрх сэтгэлээс элдэв хорон муу нь гарч хүнийг бузарладаг, гэж, Эзэн Есүс айлддаг. Бурханы хүмүүсийн хувьд элдэв зүйл төлөвлөж, нэр алдар мөрөөдөж явах нь зохисгүй бөгөөд энэ байдал нь Эзэнээс өгсөн аз (цэнгэл) жаргалыг нь гутаадаг. Харин Эзэний хайрыг, мөнхийн үнэнийг бусадтай харамгүйгээр хуваалцах нь аз (цэнгэл) жаргалыг маань улам үнэ цэнэтэй болгодог.

Хонгорхон Бурханы охин минь ээ, аз (цэнгэл) жаргал бол гадаад үүрэг хариуцлага, эрх мэдэл, байр суурь, үзэгдэх эд хөрөнгө, эзэмшил, харагдах ажил үйлс, бүтээмжээс илүүтэй дотоод сэтгэлийн ухаарал, гэгээрэл, чөлөөлөлт бөгөөд үр дүнд нь, хэн ч авч чадахгүйгээр зүрхэнд тань нутагладаг тэнгэрлэг амар амгалан юм шүү. Энэ нь бидний Аврагч Есүс Христийг зүрхнийхээ гүнд хайрлан, дээдлэн хүндэлж нөхөрлөсөн, Түүн рүү тэмүүлсэн амьд харилцаанаас ирдэг.

Өгөх нь авахаасаа илүү ерөөлтэй, гэж Эзэний айлдасны дагуу, бид бусдаас, амьдарлаас, Бурханаас аз (цэнгэл) жаргалыг горьдон хүлээдэг бус, харин бусдад, амьдралд, Бурхандаа хэрхэн сэтгэл ханамж, баяр баясгалан, аз (цэнгэл) жаргалыг өгөх вэ?, хэрхэн өөрийгөө бусдын аз (цэнгэл) жаргалын төлөө золиослох вэ?, гэсэн хандлага, сэтгэлгээгээр амьдарвал жинхэнэ аз (цэнгэл) жаргалыг өөрөө бас амсах болно.

Түүхээс харахад хувь хүн ч бай, нийт хүн төрөлхтөн ч бай, өөрсдөө хэзээ ч жинхэнэ аз (цэнгэл) жаргалыг цогцлоож чадаагүй. Хүмүүний аз (цэнгэл) жаргалын төлөөх тэмцэл, эрэл хайгуулын үр дүнд соёл урлагын, гүн ухааны, техник технологиин ололт амжилтыг эзэмшиж, амьдрах ухааны зохих мэдлэг туршлагыг хуримтлуулж, ахуй орчины таатай нөхцөлийг бүрдүүлж, танин мэдэхүйн, засаглал эмх цэгц, нийгмийн зохион байгуулалтын тодорхой өндөрлөгт хүрсэн ч, тэдгээр нь улам л хүмүүнийг аз (цэнгэл) жаргалаас нь холдуулж, эсвэл хүмүүнээс аз (цэнгэл) жаргалыг нь булааж буй мэт.

Өнөөдөр бидний толгой дээгүүр буун сум шунгинаагүй байна. Гэтэл дэлхий дээр 400-н сая гаруй хүн дайн дажны хөлд, хэзээ ч үхэж мэдэх нөхцөлд, айдас дарамттай амьдарч байна. Бас өлсгөлөн гачигдал биднээс хол байна. Харин наад захын эрүүл хүнс, энгийн хооллох нөхцөлөөс хол, тэр ч бүү хэл ундны цэвэр ус ч олдохгүй, гачигдсан өлөн зэлмүүн байдалд 1,6 тэрбум хүн амьдарч байна. Үе үе халдварт өвчин дэгддэг, үй олноороо хиардаг, эрүүл ахуйн наад захын шаардлага хангагдаагүй орчинд 800-н сая гаруй хүн амьдарч байна.

Баян тарган, хөрөнгө зоорь ихтэй, юугаар ч дутагдаагүй мэт боловч, эдийн засгийн хямрал шуурганаар өнөөх нь дундраад, хорогдоод, банк нь дампуурч эсвэл хувьцааных нь ашиг унамагц амиа хорлодог өрөвдөлтэй хүмүүс ч зөндөө байна. Хуруу хумсаа хуйхлан байж, нэр нүүрээ баран байж, тэр ч бүү хэл бусдыг шулан мөлжиж, хууран мэхлэн байж хураасан хумьсан, бусдаас харамлан хамгаалан байж хав дарж бөөцийлсөн эд хөрөнгө, мөнгө төгрөгийг нь “...хэзээ, хэн, хаанаас гарч ирээд тэдгээрт нь халдчих нь вэ, хэрхэн тэдгээрийгээ үнэгүйдүүлэхгүй, шатаахгүй, дампуурахгүй байх вэ...”, гээд л үсээ бууралттал шаналсан зовсон хөөрхийлөлтэй, гаслант амисууд ч энд тэндгүй байна.

Хүн энэ ертөнцөд нүцгэн ирээд, нүцгэн буцдаг. Эндээс юу ч авч явж чадахгүй. Тиймээс ч энэ ертөнцөд үлдэх хоосон зүйлийн төлөө биш, харин эндээс Мөнхийн улс руу хамт явах хайртай дотно хүмүүсийнхээ төлөө, бас авралын үнэнийг мэдэхгүйгээс аз (цэнгэл) жаргалгүй байгаа харанхуй хүмүүсийн төлөө, мөн тэнгэрлэг баялаг болох хайр, итгэл, найдвар, сэтгэлийн тэнхээ, баяр баясгалан, амар тайван, эр зориг, мэргэн ухаан, даруу зан, энэрэл нийгүүлсэл, өгөөмөр нинжин сэтгэлийг эзэмшиж, тэдгээрээр төлөвшихийн төлөө, Ертөнцийг Бүтээгч Эзэн Бурхантайгаа дотно нөхөрлөж, Түүнийг л төгс танин мэдэхийн төлөө амьдрах нь аз (цэнгэл) жаргал билээ. Энэхүү ухамсартай, зорилготой, эцэст нь ялалтанд хүргэдэг амьдралын хэв маяг нь л хүмүүнд бие махбодын ч, сэтгэлийн ч жинхэнэ аз (цэнгэл) жаргалыг өнө мөнхөд эдлүүлдэг болой.

Тиймээс дахин хэлэхэд, “аз жаргал” бол ертөнцийг болон өөрийг нь бүтээсэн Мөнхийн Бурханыг мэддэггүй, төрөх үхэхийн хооронд л амьдардаг, махан бодит хүний хувьд л тохиож болох, олдохдоо олдоод, олдохгүйдээ олддоггүй, олдсон ч үүрд хамт байдаггүй, хувь заяа нь болж чаддаггүй тийм ойлголт, ухагдхуун мэт.

Харин Бурханы ариун хүүхдүүд болсон бидний хувьд, Мөнхийн Эзэний өгөөмөр зүрх сэтгэлээс (Ариун Сүнснээс) үүрд бидний зүрх сэтгэл, бие махбодид өгсөн гэрэл гэгээ, төгс төгөлдөр, цаглашгүй баяр баясгалан, оргилсон хайр энэрлийн мэдрэмж, ухаарал, гэгээрэл, талархалын амьдрал маань бүхлээрээ аз (цэнгэл) жаргал юм.

Хүмүүний аз жаргал, зөвхөн өөрт нь, эсвэл ойрын хүрээлэлд нь түр зуурын нөлөө, тусгал болдог бол, Бурханы үрсийн аз (цэнгэл) жаргал нь тэдний дотроос халиад, улмаар үй олонд хүртэж, нөлөөлж, бусдыг дотоод эдгэрэл чөлөөлөлт, ухаарал гэмшилд удирдаж, улмаар аврал, мөнхийн амьдралд, нэг үгээр аз (цэнгэл) жаргалд хүргэдгээрээ ялгаатай.

Бурханы хайртай охин минь ээ, зүрх сэтгэлдээ өдөр тутам, цаг мөч бүр аз (цэнгэл) жаргалыг амтлагтун. Бас бусдыг аз (цэнгэл) жаргал руу удирдагтун. Үүрд мөнхийн аз (цэнгэл) жаргалыг таны зүрхэнд өгсөн өөрийн Бурханыг хайрлан хүндлэгтүн. Амжилт, аз (цэнгэл) жаргалыг хүсэе. Чанга тэврэн үнсэе. Түр баяртай.

GOD bless YOU. JESUS loves YOU.

Есүгэний хувийн архиваас

Элч Паул “Галат” номонд Ариун Сүнсний тухай юу юуг зааж байна вэ?

2010-11-30T07:04:00.000-08:00

Саул бол Иудейчүүдийн хэт шашинлаг, Фарисай бүлгийн хүн бөгөөд (Үйл. 22:6)(Гал. 1:14) шашны эрдэм мэдлэгт сайтар боловсорсон нэгэн байлаа. Тэр Христийн золилтоор хүн төрөлхтөнд ирсэн Авралын итгэлийг Иерусалемд дөнгөж цэцэглэж байхад нь улайран (Гал. 1:13) хавчигч байсан.

Христийн Чуулган нь гаж хортой урсгал гэж үзэн, үүнийг нухчин дарах нь Эзэний таалалд нийцнэ гэдэгт бат (Үйл. 26:9) итгэдэг байжээ. Харин Эзэн бол, үйлс үйлдлээс илүүгээр зүрх сэтгэлийн хандлагыг чухалчлан үнэлдгийг эндээс харж болно.

Товлосон цаг болж, Саул Дамаск руу “Эзэний төлөөх хатуу ширүүн шүүлт”-ийг гүйцэтгэхээр явж байлаа. Яг тэр үед Эзэн түүнд Өөрийгөө илчлэн, хэдхэн хормын дотор махан биеийн хуульч Саулыг, цоо шинэ сүнслэг Паул болгосон юм.

Хуучин амьдарлынхаа хүрээнд хичээнгүй зүтгэлтэйгээрээ нэртэй алдартай байсан түүнд, тэрхүү хуучин бүхнийхээ эсрэг довтлон, үгүйсгэн зүтгэнэ гэдэг бол, хүний санаанд оромгүй хүч чадал, шийдэмгий зориг шаардсан үйлс юм. Тэрхүү харанхуй цаг үед яаж чадсан юм бэ?, гэмээр асар их ажил үйлчлэл амжуулсан нь бахадмаар.

Паулын бичсэн, Христитгэлийн суурь онолууд болсон захидлууд өнөөдөр ч үй олон итгэгчдийн амьдарлыг чиглүүлдэг. Эдгээр нь бүгд Ариун Сүнсний хүч, онгодоор удирдуулан хийгдсэн түүхэн гайхамшигт гэрчлэл юм.

Паул Галатын Чуулганд бичсэн захидалдаа Ариун Сүнсний талаар хэдэн онцлог зүйлийг өгүүлсэн байдаг.

Үүнд: 1. Ариун Сүнс нь тухайн хүн Есүс Христийн (Гал. 3:1, 2) загалмайн авралын үйлсэд итгэсэн тохиолдолд л өгөгддөг, гэсэн анхны тулгуур няцаагдашгүй үнэнийг баталсан. Өөрөөр хэлбэл, Сайн мэдээгээр л дамжин Ариун Сүнсийг (Иох. 14:6) авч болно гэсэн цорын ганц дээд үнэнийг, Галатчууд ч (Гал. 3:2) амьдарлаараа гэрчлэх ёстойг сануулсан. Учир нь тэд ч бас ингэж л Ариун Сүнсийг авцгаасан.

2. Галат нь Ромын эзэнт гүрний нэгэн томоохон аймаг ба тэд Иудейн уламжлалт шашин шүтлэг, Мосегийн хуулийн талаар огт мэдлэггүй, тэдгээртэй хамаагүй “харь” хүмүүс байсан боловч, Сайн мэдээнд итгэснээрээ Ариун Сүнсийг хүлээн авсан. Ингэснээрээ Бурханы ард түмний (Израилийн) эцэг гэгддэг “Абрахамын хөвгүүд” (Гал. 3:26-29) гэж тооцогдох ба өөрөөр хэлбэл Бурханаар ерөөгдсөн, хүлээн авагдсан ард түмэн болсон. “Эрт үед (хуулиас ч өмнө) энэ л Ариун Сүнсээр харь үндэстэн та нарт хамаатай Сайн мэдээ Абрахамд тунхаглагдсан ба тэр итгэлээр зөвтгөгдсөн шиг, та нар ч Мосегийн хуулиас огт хамааралгүйгээр зөвтгөгдсөн гэдгийг Судар ч баталдаг”(Гал. 3:6-9; 14), гэсэн.

3. Үүнээс гадна Ариун Сүнс Өөрөө Чуулганы дунд, итгэгчдийн дотор аливаа гайхамшигийг итгэлийнх нь дагуу үйлдэн хуулиас огт хамааралгүй Нэгэн гэдгээ нотолдог (Гал. 3:4,5), гэсэн. Энэ нь одоо ч Чуулганы дотор хийгддэг эдгэрэл, чөлөөлөлт, харь хэлээр ярих болон эш үзүүлэх, эдгээх, хэлийг тайлбарлах гэх мэт авъяасууд ба Ариун Сүнсний хүчээр аливаа сорилт бэрхшээлийг даван туулах, хэрэгцээт эд бараа, ахуйн хангамжийн хангалт, сүнслэг дахин төрөлт зэргийг бүгдийг нь багтаан хэлсэн нь тодорхой.

4. Ариун Сүнс бол Бурханы Хүү Есүс Христийн Сүнс бөгөөд (Гал. 4:6) Бурханаар бидний дотоод зүрх сэтгэлд амьдархаар өгөгдсөн, гэсэн. Тиймээс ч бид Бурханыг “Аав, Эцэг” гэж дууддаг. Урьд нь бид Бурхантай огт хамаагүй, элдэв хиймэл шүтээн, (Гал. 4:8) хоосон шашныг шүтэж биширдэг, зовлонтой харанхуй амьдарч байсан бол, харин одоо (Гал. 4:5) Түүнд үрчлэгдэн, хөвгүүд нь болсон. Ингэснээр Бурханлаг зан төлөв, сэтгэлгээ, эрх мэдэл, шинэ амьдрал, амлалтууд зэргийг өвлөх юм (Гал. 4:7), гэсэн. Тиймээс ч, Ариун Сүнс биднийг Эцэг Бурхантай минь улам ойр дотно болгох, улам Түүнийг үнэн зөв таньж мэдэхэд удирддаг, гэж байна.

5. Ариун Сүнс нь бидэнтэй хувьчилсан эрхэм дотно харьцаанд байж, дотоод зүрх сэтгэлийг шинэчлэхийг хүсдэг. Тэр бидний дотор идэвхитэй ажиллаж, бид түүнд нь дуулгавартай даруу байж, хүсэмжлэн тэмүүлснээр бурханлаг зан хандлага, Христийн дүр төрх, тэнгэрлэг амьдрах хэв маягт (Гал. 5:22-24) бүрэн шинэчлэгдсэнээр, бидний дээр хуулийн аливаа буруутгал ямарч эрх мэдэлгүй болно, гэдгийг нэн чухалчилсан.

6. Ариун Сүнс ийнхүү бидний дотоодод ажиллахаас гадна, бидний хоорондын харилцаанд тэнгэрлэг нөлөө бүхий чухал үүргийг гүйцэтгэж, алдсан нэгнийг ухааруулан гэмшихэд, эргэн босоход тусалдаг (Гал. 6:1, 2) ба Христийг дуурайн, бие биеэндээ тус дэм, нөмөр нөөлөг, хамжаа болон амьдархад удирддаг (Гал. 6:8-10), гэж байна.

7. Ариун Сүнсээр дахин төрсөн нэгэн нь, хуучин төрөлх гэмт мөн чанартайгаа үргэлж тэмцэж, сүнслэг тулаан дотор байнга байдаг, гэсэн Христитгэлийн амьдарлын бас нэгэн үнэнийг (Гал. 5:16, 17) элч Паул онцолсон. Тэгээд хуучин амьдрал, дур хүслүүдээ дагавал өв залгамжлах эрх хүчингүй (Гал. 5:19-21) болно. Ариун Сүнсний зүрх сэтгэлд чинь хийдэг, дууддаг бүхэнд дуулгавартай байж, хичээнгүйлэн гүйцэтгэснээр Мөнх амийг баталгаатай өвлөх (Гал. 6:8) болно, гэж бас анхааруулжээ.

Эцэст нь дүгнэхэд, бид заримдаа зүрх сэтгэлдээ болон үйлчлэлдээ, мөн хувийн амьдралдаа аливаа дүрэм журмыг тогтоож, түүнийгээ даган биелүүлхээр хичээнгүйлэн зүтгэж, бас бусдыг биелүүлхийг шахаж шаардан, чадахгүй бол буруутган яллах нь бий.

Энэ нь Христийн хувиршгүй хайр, загалмайн золиослолын Сайн мэдээг өөрсдийнхөөрөө дур мэдэн өөрчилсөн бүдүүлэг хэрэг болдог. Харин Ариун Сүнс нь, Бурханаас Мосегоор дамжуулан өгөгдсөн Хуучин Гэрээний хуулийн үйлсийг ч хүчингүй болгон ирсэн загалмайн Сайн Мэдээтэй салшгүй нэгдмэл ба, тэр тусмаа мөхөс хүмүүсийн тогтоодог аливаа дүрэм журамаас огт хамаардаггүй Нэгэн болохыг дахин шинээр нээж, танин мэдлээ.

“Галат болон Иаков ном” хичээлийн гэрийн даалгавар: №1
Шалгасан багш: Рожер Синиор UBTC 2007 он

Христийн талаархи онолын мэдлэгээс амьдралын шуурган дундуур...

2010-08-29T05:00:00.000-07:00

(номлол)
Мэндчилгээ: Сайн байцгаана уу? Эзэний агуу Чуулганы өмнө зогсоод, Түүний Үг сургаалийг хуваалцах гэж байгаа нь, өчүүхэн миний хувьд асар их зол завшаан, нэр төрийн хэрэг болой. Бүгдээрээ энэ цагын төлөө залбирцгаая.

Мөнхийн тэнгэрлэг Эцэг минь, энэхүү эрхэм цагын төлөө талархаж байна. Энд болж буй бүх үйлс, арга хэмжээ, хүндэтгэл мөргөл нь зөвхөн Таны хүслээр, Таны алдарын төлөө байгаа билээ. Таны Ариун Сүнсээр мөхөшгүй Үг, сургааль тань тунхаглагдаж, бас Таны Ариун Сүнсээр бидний зүрхэнд хүлээн авагдахын төлөө Их Эзэн Есүсийн нэрээр залбирч байна. Амен.

Оршил: Бодоод байхад сонин юм зөндөө байх юм. Жишээ нь нэг зүйл. Тэр нь юу вэ гэвэл, бид аливаа шуурга, давалгаанд өртөхдөө өөрсдийгөө хяналтнаасаа алдчихдаг. Харин амьдрал бидний хүссэнээр өрнөх тусам, “бид хувь заяагаа хянаж байна” гэж боддог. Ер нь хүмүүс амьдралынхаа турш алив нэгэн хяналт, хүчний эрхшээл дор явахыг хичээдэг. Учир нь, энэ нь бидэнд ямарваа аюул осолгүй, хамгаалалт, нөмөр нөөлөг дотор явж буй мэт мэдрэмжийг өгдөг. Гэвч энэ нь хуурамч мэдрэмж юм.

Түүхээс харахад, хүн төрөлхтөн нь бүхий л оршин тогтнолынхоо турш, өөрсдийг нь хамгаалдаг ямар нэгэн хүчирхэг удирдагчийг, эсвэл найдвартай ажилладаг систем, тогтоц бүтэцийг эрэлхийлж, бас бий болгох гэж ур ухаанаа шавхаж, дайчилсаар ирсэн. Харамсалтай нь эргээд харахад, ямар ч лут удирдагч, эсвэл сайн гэсэн нийгмийн зохион байгуулалт нь хүмүүнд, хүсээд байдаг амар амгалан, аюулгүй даатгагдсан орчин, бүрэн дүүрэн хамгаалагдсан төлөв байдлыг нь бүрдүүлж өгч чадаагүй ба чадахгүй нь тодорхой болсон.

Харин ч тэдгээр нь хэсэг хугацаанд хуурамч тайвшралыг өгөөд, дараа нь эргээд л хүмүүнийг өөрийг нь хянаж, эрх чөлөөг нь боомилж, хүч хөдөлмөрийг нь завшиж, мөлжиж, хүсэл сонирхолоос нь гадуур өөртөө зүтгүүлж эхэлдэг. Үүнтэй холбоотойгоор хэлэхэд, хяналтын талаархи хоёр үнэнийг ойлгож мэдэх учиртай юм.

Нэгдүгээрт: Хяналт гэдэг нь зүгээр л хий хоосон үлгэр домог, зүүд зэрэглээ л гэсэн үг. Бидний хэн нь ч амьдралаа бүрэн дүүрнээр хянаж чадахгүй. Яаж ийм юм байх юм бэ? Хэн ингэж чаддаг вэ? Амьдралаа бүрэн дүүрнээр, жинхэнэ утгаар нь яаж хянах юм бэ? Ингэхийн тулд юу хийх ёстой вэ? Бид амьдралыг бүтээгээгүй шүү дээ.

Бид өөрсдийнхөө амьсгалын болон зүрх судасны, цусны эргэлтийн систем ээ, ходоод, хоол боловсруулах эрхтний системээ, дотоод эрхтнүүдийнхээ үйл ажиллагааг нь хянаж чадах уу? Эсвэл үр хүүхдүүд, бас хажуу дахь эхнэр ээ, эр нөхөр өө хянаж цагдаж чадах уу? Чадна гэж хэлэх хүн байна уу?... Мэдээж хэн ч чадахгүй. Чадах гэсэн оролдлого бүр гамшиг, гашуун зовлонг авчирдаг.

Гэтэл бүр сүм чуулганыхаа итгэгчдийг, Эзэний доторхи хамтран зүтгэгчдээ хянах гэж оролдох мунхаглал, “бурханлаг” удирдагчдын дундаас гарах юм. Эзэний Хаанчлалын төлөөх үйлчлэлээ бусдыг хайрлах, бусдад өөрийгөө зориулах боломж гэж биш, харин бусдыг хянах, эрхшээх, өөрийн хувийн сонирхол, хүсэл төлөвлөгөөг бусдад тулгах, хэрэгжүүлэх боломж гэж хардаг хүмүүс ямар золгүй вэ?!!

Загалмай үүрэх чадваргүй, эсвэл хүсэлгүй нэгэнд хүчээр, тулгалтаар загалмай үүрүүлэх үү? Эсвэл өөрөө тэдний өмнөөс загалмай үүрч, үлгэр дууриал болох уу? Эзэний хайрыг хяналтан дор, захиран тушааж буулган өгч болох уу? Эсвэл үг хэл, үйлс амьдрал, зан харьцаагаараа үлгэрлэн харуулах уу? Танд одоо ч ухаарах, гэмших, сонгох боломж байна... Тэр ч бүү хэл зарим хүмүүсийн гажууд зан хандлага хэтийдэж, Их Эзэний өөрсдийнх нь төлөөх зүрх сэтгэл, ажил үйлс, зорилго төлөвлөгөөг нь хянах гэсэн увайгүй санаархал ч цухалзуулдаг.

Хоёрдугаарт: Ертөнцийн Эзэн харин ч хяналтын эсрэг байдгийг мэдэх нь нэн чухал. Учир нь, хүмүүний аливааг хянах гэсэн оролдлого нь өөрийг нь боолчлол, айдас, сүйрэлд оруулдаг. Энэ мунхаг санаархал нь, Эзэнд итгэхгүй байгаагын хамгийн тод илэрхийлэл юм. Агуу нэгэн нь хянахыг биш хайрлахыг зорилгоо болгодог байтал, атгаг нэгэн нь хайрлахыг биш хянахыг зорилгоо болгодог. Эзэн “Та нарын дундаас агуу нь болохыг хүсэгч нь бусдынхаа боол нь, зарц нь бай” гэсэн.

Мэдээж тухайн хүн сайтар хичээвэл идэх хоол хүнс болон хооллолтоо, мөнгө санхүү болон ашиг орлогоо хэрхэн захиран зарцуулахыг, зан авир болон харилцаагаа, бас магадгүй өгөгдсөн цаг хугацаа, өдөр хоногуудаа хэрхэн зөв зохистой ашиглахаа хянахад тодорхой хэмжээнд суралцаж болдог. Гэхдээ л амьдралыг бүрэн дүүрнээр хянаж чадахгүй. Учир нь амьдрал бол хүмүүний бүтээл биш. Бүтээлийг Бүтээгч нь л бүрэн дүүрнээр хянах чадвартай, эрх мэдэлтэй.

Дахин хэлэхэд, бүх юм сайн сайхан, бүтэлтэй байхад амьдрал, хувь заяа маань хяналтанд маань байгаа мэт санагддаг. Харин гэнэт нэг шуурга бий болоход л бид хяналтаа бүрэн алдаж, хөөрхийлөлтэй байдалд ордог. Яг үүнийг Есүсийн дагалдагчид, Марк 4-р бүлэг дээр гардаг үйл явдалын үед бүрэн дүүрнээр мэдэрч, биеэрээ амссан.

Их бие: Одоо Марк 4:35-41
хэсгийг ажиглацгаая. Есүс дагалдагчид аа нуурын нөгөө эрэг рүү удирддаг. Тэд ч шулуухан л дагадаг. Энэ нь мэдээж маш сайн. Тэд “цагын байдлыг ажихад салхи үүсэж, давалгаа босож магадгүй байна. Тиймээс маргааш явъя”, гээгүй. Дуулгавартайгаар, зүгээр л Түүний хий гэснийг хийдэг. Энэ нь итгэлийн маш чухал шинж. Итгэж, найддаг нэгэн нь дуулгавартай захирагдаж чаддаг.

Бас айсандаа дуулгавартай байх хувилбар ч байдаг. Гэхдээ Эзэн дагалдагчидаа айлган дарамталсан тухай ямарч өгүүлэмж, тохиолдол бичигдээгүй ба бичигдэх ч үгүй нь тодорхой. Учир нь бидний Эзэн бол хайр энэрэл, өршөөл нийгүүлсэл, амар тайвны Бурхан. Тэр энэ ертөнцийн хамгийн эгэл даруу Нэгэн. Тэр айлган сүрдүүлж, хүчирхийллээр эрхшээдэг Нэгэн биш. Харин хязгааргүй хайр энэрлээрээ зүрх сэтгэлийг маань дүүргэн эзэмддэг Эзэн.

Хүчит салхи үүсэж, аварга давалгаанууд нөмөрхөд, дагалдагчид өөрсдийн аргаар тэмцэж, сөрж эхэлсэн. Харин Эзэн юу ч болоогүй юм шиг, санаа амар унтаж байдаг. Мэдээж Эзэнийг ямар нэгэн давалгаа, салхи ганхуулна гэж байхгүй л дээ. Дагалдагчдын дунд насаараа загасчилсан, иймэрхүү шуурганы үед яах ёстойгоо мэддэг хүмүүс цөөнгүй байсан. Тэгээд л сурсанаараа л тэмцэж, үүссэн асуудлыг зохицуулах гэж оролдоцгоож байлаа. Гэвч энэ удаа бүх л арга чарга нь барагдсан.

Бид ч бас амьдарлын аливаа асуудалд, Эзэнийг хажууд маань байсаар байтал асуух ч үгүйгээр, өөрсдийн сурснаар, дадаж хэвшиснээр хандаж, нөхцөл байдлыг хяналтандаа авах гэж оролдоцгоодоггүй гэж үү? Тэгээд, яг л тэдгээр дагалдагчид шиг асуудал бүр хүндрээд, дийлдэхээ болиод ирэхэд , айж бачимдсан, сандарсан үедээ л Түүнд ханддаг. Тэр ч бүү хэл Түүнийг буруутган яллахыг оролдоцгоодог. Хүн өөрийгөө биш харин бусдыг буруутгах дуртай байдаг. Бүтээгч, Аврагч, Ариун дээд Эзэнийг хүртэл шүү. Учир нь ингэж амьдрах нь амархан байдаг. Өөртөө дүгнэлт хийж, өөрөөсөө бурууг хайж, харин бусдыг хайрлаж, уучилж амьдрах хэцүү.

Учир нь, Тэр хэзээ ч унтдаггүй, Израилийн төлөө үргэлж сэрүүн байдаг Эзэн боловч, бидний хувьд унтаа, идэвхигүй, хэрэг болохгүй онолын мэдлэг төдий байдаг. Өөрөөр хэлбэл бид Түүнийг өөрсдийнхөө хувьд унтаа, хоосон онол болгодог гэсэн үг. Онолоор цэцэрхээд л, онолоор маргаад л, онолоор шалгалт өгөөд л, онолоор шалгалт аваад л...

Ер нь Библи хүмүүнийг Эзэний эрхшээл, хяналтан дор эргэн ирэхийг уриалдаг. Ганцхан Эзэн Есүсийн эрхшээл дор л жинхэнэ эрх чөлөө, амар амгалан байдаг. Бусдын эрхшээл нөлөө, бүрэн хяналтан дор, бусдаас бүрэн хамааралтай байхын сонгодог хэлбэр бол “боолчлогдох” нь юм. Судар бидний өмнө, “гэм нүгэлийн боол байх”, эсвэл “Христийн боол байх” гэсэн 2 төрлийн бүрэн хамаарлийг дэвшүүлэн гаргаж, 2 туйл болгон сөргүүлэн тавьж, сонголт хийхийг шаарддаг. Цуутай элч Паул, Ром болон Филиппой дахь чуулганд бичсэн захидалдаа, өөрийгөө “Христ Есүсийн боол...” гэж тодорхойлсон байдаг.

Библид дундуур нь, 2 нүүр гаргаад явахыг “завхайрах” гэж томъёолдог. Тэнгэр Эцэг биднийг “бүү завхайр” гэдэг. Тэгэхлээр бидэнд угтаа бол ямарч сонголт байхгүй.
Гэхдээ нөгөөтээгүүр, Эзэн хүмүүнийг ямарч эрх мэдэлгүй, эрэгцүүлэл тунгаалтгүй, сонголт хийж шийдвэр гаргах боломжгүй робот байдлаар бүтээгээгүй юм. Хүмүүнд өөрт нь асар их эрх мэдэл бий. Сонголт хийх эрх чөлөө бий.

Олон хүн гэм нүгэлд нухлуулан туйлдаад, Эзэн рүү ирчихээд “...намайг гарах гарцгүй, шахаанд оруулаад Өөртөө авсан” гэдэг. Олонхи тохиолдолд энэ нь худлаа. Хүмүүний ихэнхи зовлон, хүмүүний өөрийнх нь сонголт, шийдвэрийн үр дүн байдаг.

Ариун Сүнс хүмүүний дотор орж, тэнгэрлэг ухаарал ойлголт, мэдрэмжүүдийг өгөх үед, хүмүүний зүрх сэтгэл шийдвэр гаргах, сонголт хийх шаардлагатай болдог. Ариун Сүнс ятгадаг, нөгөө талаас дэлхий чангаадаг. Энэ үед танд өөрт тань л бүх эрх мэдэл бий.

Бидний олонхи нь, “эхийг нь эцээхгүй, тугалыг нь тураахгүй”-хэн шиг, дундуур нь, өөрсдийн тааваар таваргах санаатай байдаг нь нууц биш. Илчлэлт 3:15,16-д “Би чиний үйлсийг хүйтэн ч биш, халуун ч биш гэдгийг чинь мэднэ. Чамайг хүйтэн юм уу, эсвэл халуун байгаасай гэж Би хүсэж байна. Тийнхүү чи халуун ч биш, хүйтэн ч биш, бүлээвтэр тул Би чамайг амнаасаа бөөлжиж гаргана.” гэдэг.

Болж өгвөл Христээр ч хянуулахгүй, захируулахгүйгээр, далдхан нууцлаг дур хүслүүдээ өөгшүүлэн дагасан шиг, өөрийгөө зугаацуулан “жаргаах” санаатай амьдардаг. Харин алив хүсэл төлөвлөгөө, зорилго нь бүтэх шинжгүй, аюул осол, эрсдэл заналхийлж буй үед, эсвэл гэнэтийн гай гамшиг, зовлон зүдгүүр өөрт нь тулгармагц Эзэнийгээ бамбай эсвэл бороохой болгон ашиглачих гээд л...

Юу нь гэм нүгэл, юу нь хориглогдсон, бас юу нь сайн, сайшаалтай, юу нь зөвшөөрөгдсөн талаар өөрийн дур хүсэл, сонирхолын дагуу зүрх сэтгэлдээ хэм хэмжүүр, хууль тогтоогоод, түүнийхээ дагуу өөрөө өөртөө маадгар, бүр цаашлан тэрхүү хуулиараа бусдыг шүүгээстэй алхдаг гээч. Тэгээд тэрхүү хатуурсан ойлголт, хэм хэмжүүр, цайз хэрмийг нь нураах гэсэн Эзэний ажил, сахилгажуулалт зэмлэлд нэн эмзэг, учир зүггүй өөрийгөө хаацайлан хамгаалж, өрвөлзөн уурлаж ханддаг. Ариун Дээд Түүнийг буруутган гомдоллодог.

Яг л тэдгээр дагалдагчид, Түүнийг хажууд нь байсаар байхад өөрсдийгөө авархаар, өөрсдийн арга замаар авархаар улайран зүтгэсэн шиг. Амихандаа л тохиолдсон шуургыг сөрж, ялж, даван туулахыг оролдоцгоодог. Түүнээс асуудаггүй, туслалцаа хүсдэггүй, бүр Түүнрүү уурладаг гээч. Хэрвээ яг ийм төлөв байдалд байгаа хүн байвал, яг одоо л энэ мунхаг төлөв байдлаа ухаар.

“Эзэнээс эмээхүй нь мэргэн ухааны эхлэл мөн”, гэж Сургаалт үгс 9:10 т өгүүлдэг. Эзэн Есүсийг “миний Аврагч Бурхан, намайг Золигч” гэж итгэх чинь сайн боловч, энэ итгэл чинь Түүнд ялархдаг, гомдоллодог, алив алдаа уналтандаа Түүнийг буруутгадаг хэв шинжтэй байвал, та буруу төлөвшиж байна гэсэн үг.

Матай 7:21-д “Намайг “Эзэн минь, Эзэн минь” гэсэн болгон тэнгэрийн хаанчлалд орохгүй. Харин тэнгэрт байгаа Миний Эцэгийн хүслийг биелүүлдэг хүн орно” гэдэг. Эцэг биднийг Христийг хайрлан хүндлээсэй, эмээн бишрээсэй, даган дуурайгаасай гэж хүсдэг. Түүний хяналт, удирдлаган дор гэрэл, харанхуйгаа ялгаж салган ариусаасай, Түүнтэй уусан нэгдэж, дүр төрхийнх нь дагуу шинэчлэгдээсэй, гэж хүсдэг.

Шилжилт: Та бүхнээс нэг зүйл асууя. Библийн өөр хаана иймэрхүү хүчит салхи шуурга, аварга давалгаануудын тухай гардаг билээ?... Хаана гэнэ ээ?... Тиймээ, та зөв хэллээ. “Иона” номонд... Эш үзүүлэгч Иона, Эзэний дуудлага, тушаалыг эсэргүүцэн босож, “Яв” гэсэн зүгээс нь тэс өөр, эсрэг зүгрүү нь зугтаадаг. Харин Эзэн хүчит шуурга, аварга давалгаануудаар, түүний тэрслүү замыг хаадаг.

Тэгээд юу болсон талаар бүгдээрээ Судараас харцгаая. Иона 1:11-17 г уншицгаая. Оргодол тэрслүү Иона загасны ходоодонд заларч, бусад нь тэнгэрийн Бурханд алдарыг өргөцгөөв. Өнөөдөр ч хувь хүн таны өмнө, гэр бүл, хамт олны тань өмнө, Чуулганы тань өмнө, энэ ард түмний өмнө, нийт хүн төрөлхтөний өмнө жижиг том, их бага тоо томшгүй асуудал бэрхшээл, салхи шуурга, давалгаа донсолгоо босоод байна.

Бүгд л өөр өөрийн мэдлэг боловсрол, авъяас чадвар, туршлага дадлага, нөөц бололцоог ашиглан сөрөн зогсож, даван гарч, ялан дийлэхийг хүсэцгээж, нөхцөл байдлыг хянахыг оролдоцгоож, элдвээр цэцэрхэн онолдоцгоож байна. Тэрч бүү хэл шаналсандаа, айсандаа Эзэнийг буруутган яллаж, уурлан хилэгнэж, хараан зүхэцгээж байна.

Энэ цаг үеийн тухай Илчлэлт номонд тодорхой өгүүлдэг. Илч. 9:20,21. 16:8-11. 16:20,21 хэсгүүдийг харцгаая. Энд олон төрлийн шийтгэл, сахилгажуулалтыг Эзэн хүн төрөлхтөний дээр буулгаж байна. Харин тэд Ионагийн түүх дээр гардаг далайчид шиг, Ниневе хотынхон шиг гэмшсэнгүй. Бурханд алдарыг өргөсөнгүй. Бүр эсэргээрээ элдвээр доромжилцгоож байна.

Бид Сайн мэдээ тараах явцдаа, эсвэл зүгээр Христчин гэдгээ бусдад илчлээд хариуд нь басамжлал, доромжлол, тохуурхал, буруутгалыг зөндөө л амсдаг. Бурхангүй ертөнцийн бүхий л соёл урлаг, шоу цэнгээн, кино ертөнц бараг тэр чигтээ Бүтээгч Эзэнээ доромжилсон тохуурхсан үзэгдэл, санаа оноогоор дүүрэн. Бас элдэв явган шог, амны зугаандаа ч хүмүүс Эзэнийг басамжилж тохуурхацгаадаг. Зарим улс оронд “Христийн ардчилсан нам” ч гэдэг юм уу, элдэв улс төрийн, бизнесийн, ашиг хонжооны байгууллагууд, Эзэний Ариун Нэрийг ашигладаг.

Бурханаас хүн төрөлхтөнд өгдөг бүхий л давалгаа донсолгоо, салхи шуурга нь угтаа хүмүүнийг мөхөөх гэж биш, харин ч Эзэн Есүс рүү, Түүний загалмайн аврал руу хандуулах гэж, ухаарал гэмшилд хөтлөх гэж, Үнэнийг (Христийг) бүх зүрхээрээ хайгаасай гэж өгөгддөг. Хувь хүн танд, нийт хүн төрөлхтөнд Тэнгэр Эцэг маань Есүс Христийг аль хэзээний өгсөн.

Христ бол хүн төрөлхтөний бүх асуудал бэрхшээлд нь өгсөн Бурханы эцсийн ганц хариулт, төгс шийдэл юм. Энэ нь амьдралын аливаа асуудал бэрхшээлтэй тулгархад, Христийг урин оролцуулснаар, тэдгээр нь хамгийн зөв, сайн, өөрөөр ямраар ч байх аргагүйгээр шийдэгдэнэ, гэсэн үг. Бас нөгөөтээгүүр, ерөөсөө тэдгээр асуудлууд чинь чамайг зовоож шаналгах ямар ч хүчгүй, утгагүй, үнэ цэнэгүй болж хувирна, гэж ч ойлгож болно. Өөрөөр хэлбэл, чи асуудлуудаас дээгүүр дүүлэн нисэж амьдарна, гэсэн үг.

Хүмүүний ертөнцийн тоо томшгүй олон асуудлууд дундаас хамгийн том, хэзээ ч өөрсдийн хүчээр шийдэж чадахгүй асуудал бол Бүтээгч Бурханы тухай, Түүний бүтээл болсон орчлон ертөнцийн оршин байгаагын утга учирын тухай, амьдралыг үзэх үзэлийн тухай маргаан, санал зөрөлдөөн юм. Бүгд л Бурхан байдгыг зөнгөөрөө ч бай, ухамсартайгаар ч бай мэддэг, итгэдэг, эмээдэг, хүндэлдэг. Гэхдээ өөр өөрсдийнхөөрөө... Яагаав нөгөө, хараагүй хэдэн хүн зааны энд тэндээс нь барилж үзээд, янз янзаар тодорхойлж, дүрсэлсэн тухай, ярианд гардаг шиг.

Энэхүү маргаантай, үе үеийнхний санааг зовоож шаналгасан, шийдэж чадахгүй гацсан, улмаар үй олон бэрхшээл зовлонгийн үндэс болсон асуудлын хариулт бол Христ юм. Та нар бүү марга. Май энэ Хаан чинь (Өөрөөр хэлбэл захирагдах ёстой, эмээх ёстой, чамайг хамгаалагч Нэгэн чинь), Бурхан чинь (Хүндлэх ёстой, дээдлэх ёстой, үлгэр дууриал авах ёстой Нэгэн чинь), Эзэн чинь (Чамайг хянаж, эрхшээх ёстой, чиний үйлчлэх ёстой Нэгэн чинь) энэ байна.

Энэ хүнээр дамжуулан чиний гэм бузар арилж, Төгс Ариун Миний өмнө зогсох боломжтой болно. Энэ хүнээр дамжуулж, Миний чамд хандсан хүсэл, мөн чанарыг, Миний тухай үнэн зөв ойлголт, мэдлэгийг танин мэднэ. Энэ хүн амьдралын чинь бүх асуудалд төгс шийдлийг өгч, тэдгээрийг чиний өмнө номхотгож, чамайг явах ёстой замаар чинь удирдана. Тэр бол чиний төлөөх Миний хайр энэрэл, нийгүүлсэл, бүх ”яагаад”-ын чинь хариулт. Тэр бол Би, Би бол Тэр мөн, гэж Эзэн айлдаж байна.

Хүн төрөлхтөний цорын ганц итгэл найдвар, аврал бол Христ Есүс болой. Өөр ямарч зам, гарц, зөв шийдэл байхгүй. Хүмүүн нь түүхийнхээ турш бүгдийг нь туршиж, оролдож, барьж үзсэн. Бурхангүйгээр төгс төгөлдөрт хүрч, амар амгаланг олж авах гэж, үүрд мөнхийг бүтээн байгуулж, эзэмших гэж үзсэн. Бурханаас гадуур сайн сайханыг цогцлоож, хувь заяагаа хянаж, түүхийг (цаг хугацааг) захирч болох юм шиг санасан.

Яагаав,... өнөөх могой Адам, Ева нарыг уруу татахдаа “...Та нар ерөөсөө үхэхгүй. Та нар түүнээс идсэн өдөртөө л нүд чинь нээгдэн, Бурхан шиг болж, сайн мууг мэдэх болно...” гэсэн мэхлэлтэнд итгээд л, түүний дагуу үзээд байгаа нь тэр шүү дээ. Гэвч могой худал хэлсэн нь, хүмүүний бүх оролдлого, хичээл зүтгэл, чармайлтууд нь нуран унаснаар батлагдаж байна. Нөгөө ...үхэхгүй, Бурхан шиг болно... энэ, тэр гээд байсан нь ч худлаа байсан. Түүхийнхээ турш хүн төрөлхтөн ялаа мэт үй олноороо үхэж үрэгдсээр л ирсэн. Одоо бүр, бүх нийтээрээ орших уу?, эс орших уу? гэсэн асуудалтай тулгарлаа...

Хүмүүний бүх үеийнхний хураасан хумьсан, олсон мэдсэн, хүрсэн эзэмшсэн болгон нь цаг зуурын, үр ашиггүй, хоосон зүйлс байж, зэрэглээ мэт замхран одохыг өнөө үеийнхэн харцгааж байна. Жинхэнэ гай гамшиг, зовлон сорилтууд, давалгаа донсолгоонууд нөмрөн ирэхэд, өнөөх олон шинжлэх ухааны ч бай, улс төрийн ч бай, гүн ухааны ч бай, хүмүүнлэгийн ч бай элдэв олон онол, мэдлэг, туршлагууд нь аль нь ч аврал болж чадахгүйг ухаарцгааж байна.

Тиймээ, тэрхүү шуургатай үед завин дээр Христтэй хамт байсан, Түүний дагалдагчид шиг зөвхөн Түүнийг л сэрээх, Түүнээс л зуурах, Түүнд л найдах үлдлээ. Өөр гарц, өөр аврал үгүй. “Өөр хэний ч дотор аврал үгүй. Учир нь бид аврагдаж болох өөр нэр тэнгэрийн доор хүмүүст өгөгдсөнгүй”(Үйлс 4:12) гэж нэгэнтээ Сударт өгүүлсэн байдаг.

Хүмүүс амьдралын элдэв бэрхшээл, асуудал хүндрэлүүдтэй учраад “...яагаад?, яагаад заавал би гэж?... яагаад надад энэ нь тохиолдов?...” гэцгээдэг. Тэгвэл Судар бидэнд хэлж байна. Яагаад гэвэл та Христийг амьдралдаа оруулдаггүйгээс, та Түүнийг онолын хувьд л мэддэгээс, тэгээд Түүнийг ”сэрээдэггүйгээс”, Түүнтэй нөхөрлөдөггүйгээс, Түүн шиг амьдардаггүйгээс, Түүгээр зүрх сэтгэл ээ, хувь заяагаа хянуулдаггүйгээс, та амьдрал, хувь заяагаа өөрөө хянах гэдгээс, Түүнтэй хамт бэрхшээл, зовлонг даван туулах гэж тэмцдэггүй, зориглодоггүйгээс... гэхчилэн хэлж байна.

Олон хүн Есүсийг онолын хувьд л мэддэг болохоос, амьдрал дээр Түүнтэй нөхөрлөж, Түүгээр удирдуулж, Түүнд өөрийгөө даатгаж, Түүний найдвартай, итгэмжтэйг биеэрээ үзэж мэдээгүй байдаг. Тэр тэдний хувьд зөвхөн онол л байсан. Өнөөдөр ч хүн төрөлхтөн, бүр Христийн Чуулган ч, Түүнийг өөрсдийнхөө хувьд онол болгосон хэвээрээ байна. Таны хувьд Христ хэн бэ? гэж Эзэн асууж байна. “Христ бол би. Би бол Тэр юм”, гэж хэлэх хүн байна уу?!!

Амьдралд тохиолддог аливаа шуурга, давалгаа нь бид амьдарлаа хяналтандаа авч явж чадахгүй гэдгийг, бидэнд нотолдог. Бид хувь заяагаа хянагчид биш. Тэдгээр дагалдагчид ч, Есүсийн агуу үйлсүүдийг нь, юу хийж, юу ярьж явсаныг нь хөндлөнгөөс ажиглаж л явснаас биш, өөрсдийгөө Түүний оронд тавьж, агуу үйлсэд нь бие, сэтгэлээрээ оролцож байгаагүй.

Хүмүүсийг Түүн шиг хайрлаж, Түүн шиг өөрсдийгөө зориулж, шаналж яваагүй байсан. Энэ нь биднийг өөрчлөгдөх шаардлагатайг харуулж байгаа юм. Олон хүн Түүнийг дагаж байгаадаа л сэтгэл ханадаг. Түүний ойрхон байгааг нь ямар нэг байдлаар мэдэрч байгаагаараа л сэтгэлээ зогоодог. Түүний оронд өөрийгөө тавьж, Түүнтэй адил үүрэг хариуцлага үүрч, бусдын төлөө шаналж, өөрийгөө золих талаар боддоггүй.

Гэтэл Тэр биднийг үзэгчийн байр сууринд байгаад байгаасай гэж хүсдэггүй. Биднийг Өөрийнх нь оронд өөрсдийгөө тавьж, хүн төрөлхтөний төлөөх Түүний зүрх сэтгэлийг мэдэрч, Түүнтэй адил үүрэг хариуцлагыг ухамсарлаж, өөрсдийн биш харин Түүний нэрээр, Түүнтэй адилыг үйлдэж амьдараасай гэж хүсдэг. Нэг үгээр өөрсдийгөө бүрэн дүүрнээр Өөрт нь өгч, Өөрөөр нь удирдуулаасай, Өөрийнх нь дүр төрх, төлөөлөл болоосой гэж хүсдэг.

Бүрэн дүүрэн хангалттайгаар, бахархалтайгаар “би болон Эзэн нэг юм. Би бол Тэр юм”, гэж хэлээсэй, үйлдээсэй гэж хүсдэг. Тэгэж чадах хэмжээнд хүртэл даруусан төлөвшөөсэй, гэж хүсдэг. Тэгэхийн тулд бид Түүний хяналтан дор бүрэн дүүрнээр орох ёстой.

"Надад тэнгэр газар дээрхи бүх эрх мэдлийг өгсөн" гэж хэлснээрээ, Би л бүх зүйлийг хянана, гэж байгаа хэрэг юм. Та ч тэнгэр газрын нэгээхэн өчүүхэн эд эс шүү дээ. Тиймээс ч Тэр таныг бас хянана гэсэн үг.

Христ бол хамгийн Дээд Үнэн. Бүх салхи, давалгаа донсолгоонууд цаг зуурынх, үеэ өнгөрөөдөг. Харин Христ мөнхөд оршдог. Хүмүүний, тэр тусмаа Христчин хүний амьдралд заавал даван туулах ёстой хүндрэл бэрхшээл, давалгаа донсолгоо, сорилтын үе байдаг. Хүн болгон л өөрсдийн хүнд бэрх үеийг туулдаг, давдаг. Гэхдээ энэ асуудал дунд чинь Эзэн та бидэнтэй хамт байна. Тиймээс ч хүчтэй зоригтойгоор бэрхшээл зовлонгуудтай нүүр тулагтун.

Асуудлын гол нь бид бэрхшээл хүндрэлүүдийг амжилттай даван туулахдаа ч биш юм. Харин тэдгээрээр дамжин Христийн дүр төрхөөр шинэчлэгдэж, Түүнийг өөрийнхөө хувьд дахин шинээр нээж, олж харж, Түүнд өөрийгөө даатган өргөх нь, хяналт захиргаан дор нь шилжин орох нь л чухал юм.

Тэр босоод л тушаахад бүх зүйл нам жим, амар тайван болсон. Энэ бол үнэхээр ер бусын гайхалтай үзэгдэл байлаа. Тэд үнэхээр сүрдэн алмайрсан. Тэд Есүсийг салхи шуургыг бүрмөсөн, нам зогсоочих нь гэж даан ч санаагүй байдаг. Үнэхээр бодол санаанд нь ч буугаагүй нь тодорхой. Бид ч бас л үүний адил байх нь олонтоо.

Бидний амьдрал Түүнээс хэр их хамааралтай байна. Эсвэл огт өөр зүйлсээс, хувийн туршлага, авъяас мэдлэгээс, мөнгө санхүүгээс, аливаа тогтоц бүтэц, ямар нэгэн системээс, эрх мэдэлтнүүд, удирдлагаас зэрэг олон зүйлсээс илүү гүнзгий хамааралтай байна уу?! Та яг одоо бодож эрэгцүүлээрэй.

Шуурганаас айсных нь төлөө Есүс дагалдагчидаа зэмлэдэг. Эзэн тэднээс яагаад айсныг нь асуусан. Айж хулчийсны шалтгааныг нь ч тодорхойлж өгсөн. “Итгэл байхгүйгээс...” Итгэл бол онол биш, мэдлэг биш. Итгэл бол хамтын амьдрал, нөхөрлөл, амьд харилцаа юм. Зэмлэх шалтгаан ч хангалттай байлаа. Тэд Түүний үгийг сонссон. Сургаалиудыг нь биширсэн. Гайхамшигт үйлсүүдийг нь ч харсан. Түүний үг сургааль, Түүний ажил үйлс, дагалдагчдынх нь амьдралд итгэлээр нь дамжин илэрч байх ёстой.

Эзэн одоо айлдаж байна. “Та нарт Миний үйлс ажил, үг сургааль ерөөсөө хамаагүй байдаг. Та нар Намайг онолоор л мэддэг. Харин Надтай нөхөрлөж, Надтай хамт үйлдэж, зүтгэж, Миний зорилгын төлөө өөрийгөө зориулахыг хүсдэггүй.” Одоо дагалдагчидын шуурганаас айх айдас нь, Түүний сүр хүч, эрх мэдэлд биширч, Ертөнцийн Эзэний оршихуйд байгаагаа мэдэрсэн айдсаар солигдсон.

Олон хүн эргэн тойрныхоо амьдралын өрнөл, үйлсийг хянаснаар амар тайван амьдарч, итгэлтэйгээр урагшаа алхана, гэж боддог. Тэгээд л алив байдлаар бүхнийг хянах гэж бүхий л талаар оролддог. Улмаар энэ нь даамжирч, өөрийн хүсэл, сонирхолд тааруулж, үйл явдал, өрнөлийг удирдан чиглүүлэх гэсэн увайгүй санаархал болдог.

Харин энэ нь асуудал бэрхшээл, зовлон зүдгүүр, маргаан зөрчил, тэмцэл сөргөлдөөнийг л араасаа дагуулдаг. Мэдээж амьдрал дэндүү агуу учир юу гэж хүмүүний хяналтанд орох вэ дээ. Бас хүмүүний хүслээр нь байна гэж бүр ч саналтгүй.

Гэхдээ хүмүүнийг амьдралын тав тух, тохилог ахуй хангамж, элбэг дэлбэг байдал, ажил хөдөлмөрийн бүтэмжтэй байдалын төлөө, технологийн дэвшил нээлтийн төлөө эрэл хайгуул бүү хий, амар амгалан, энх тайван, эв нэгдэлтэй байдлын төлөө бүү зүтгэ, тэдгээрийг бүү хүсэмжил, гэж байгаа юм биш.

Өнөөг хүртэлх хүн төрөлхтөний олсон мэдсэн, хүрсэн эзэмшсэн бүхий л ололт дэвшил, нээлт бүтээлүүд нь, хэдийгээр хүмүүс эдгээрийг ямар нэг хувь хүн, эсвэл үндэстэнд хамааруулж тайлбарлахыг оролддог боловч, бүгд л Эзэний хүмүүний төлөөх санаа тавилт, хайрын улмаас, эрэл хайгуул, хүсэл мөрөөдөлд нь хариулсан хариулт болон, Түүний хүчирхэг мутараас өгөгдсөн болой.

Гэвч хүн төрөлхтөн хамгийн гол зүйл болох Мөнх Амь буюу Эзэний нийгүүлсэл, тэдэнд хандсан хүсэл, төлөвлөгөөг олж нээж чадаагүй юм. Учир нь, энэ нь товлосон цаг болтол нууцлагдсан байсан. Тэгээд цаг нь болоход загалмай дээр илчлэгдэн, хүн төрөлхтөнд бэлэг болон өгөгджээ. Тиймээс сайн сайхны төлөөх бүх зүтгэл тэмүүлэл, хүсэл зорилго тань зөвхөн Түүний л оролцоотойгоор, Түүний л хяналтан дор, Түүгээр удирдагдан хэрэгжих болтугай.

Харанхуй бурангуй энэ ертөнцийн юу нь ч хүмүүнд мөнх амь, ариусал, авралыг өгдөггүй! Тиймээс ч бидний зорилго нь тэдгээрийн дунд амжилт олох гэж биш, амиа тээх гэж биш, хүлээн зөвшөөрөгдөх гэж биш юм. Харин тэдгээр бурангуй харанхуй элдэв ачаа дарамт, буулгыг эвдэн устгах гэж, хүн төрөлхтөнийг тэдгээрээс чөлөөлөх гэж, Мөнхийн Эзэнийхээ төгс ариуныг, Түүний загалмайн аврал, хайрыг гэрчлэн алдаршуулах гэж амьдрах нь бидний зорилго байх ёстой.

Бүх бүтээлийг Түүний ариун оршихуй дотор, Түүний хяналтан дор эргүүлэн оруулах нь л бидний туйлын зорилго билээ.
1 Коринт 15:24 т элч Паул “Тэр бүх удирдлага, эрх мэдэл, хүчийг хүчингүй болгон, Бурхан ба Эцэгт хаанчлалыг тушаах үед төгсгөл ирнэ.”, гэж эш үзүүлсэн байдаг.

Дүгнэлт. Эцэст нь дүгнээд хэлэхэд, орчлон ертөнцийг бүтээсэн, гэмт хүн төрөлхтөнийг хайрлан загалмай дээр нас барсан, дахин амилж Мөнх Амьдарлыг өгсөн, Ертөнцийн агуу Их Эзэн яг одоо бидэнтэй хамт байна. Тэр бидний амьдралд хайраараа, сүр хүчээрээ оролцсоор л байна. Тэр бүхнийг Бүтээгч. Тэр бүхний Эзэн. Тэр хамгийн Агуу Нэгэн. Тэр бүхнийг Хянагч. Тэр бидний амьдралыг хяналтандаа авч, биднийг амьдралын элдэв шуургануудаас аврахгүй гэж үү?! Тиймээс ч бид Түүний хяналтан дор байхыг хүсэж байна. Халлелүяа.

Уриалга. Тиймээс ч, ахан дүүс нараа. Бүгдээрээ бусдыг хянахын төлөө биш, харин хайрлахын төлөө, босгон байгуулахын төлөө амьдарцгаая.

Хүмүүний аливааг хянах гэсэн оролдлогын үр дүнд яллалт буруутгал, шүүлт бий болдог. Харин хайрласны үр дүнд уучлал өршөөл, нийгүүлсэл ундардаг.

Хайр эрх чөлөөг өгдөг бол хяналт боолчлол, дарангуйллыг авчирдаг.

Хяналт нь итгэхгүй байгаагын, хардаж сэрдэсний илрэл бол хайр нь итгэж найдсаны илрэл юм.

Ертөнцийн Эзэн бол хайрлахыг л зорилгоо болгодог.

Бид амьдралаа өөрсдөө хянах гэж, удирдах гэж оролддог хандлагаасаа, Түүнд найддаг, Түүгээр удирдуулдаг, Түүгээр хянуулдаг амьдрал руу шилжих ёстой.

Бид өөрсдийн амьдралаа хянах цорын ганц зөв арга бол, бидний амьдарлыг хянадаг Түүнд захирагдах явдал билээ.

Есүсийн тухай бидний онолын мэдлэг нь амьдарлын шуургаар дамжин, Түүнийг танин мэдсэн, Түүнд итгэж найдсан бодит амьдрал, үйлсээр солигдох ёстой. Амен.

Тайландын Бангкок хотноо 2003 оны 02 сарын 14 ны өдөр, "Кампус Крусайд фо Крайст" -ын Зүүн өмнөд Азийн удирдагчдын цугларалтан дээр, пастор Билл Лоуренцийн хэлсэн үгнээс үндсэн санааг авсан...

Харьд буй дүү нартаа бичсэн захидал

2010-08-08T09:52:00.000-07:00

2010.08.01 Архангай аймгийн Шинэ Идэр сум
Гэрэл зургийг Есүгэн

Сайн байцгаана уу?
Хайрт дүү нар минь. Өнөөдөр л e-mail аа шалгаж байна. Удахгүй Христмасын баяр болох гээд бэлтгэл ажил ихтэй л байна. "......" цуглааныхантайгаа боломжийн элбэг дэлбэг баярыг тэмдэглэхийн тулд, барилга дээр түр зуур ажиллаж байна. Бас төв сүм дээр маань ч засварын ажил гараад гар бие оролцохгүй бол болохгүй, гэхчилэн ажил амьдрал буцалж байна.

Саяхан гэрээр нь орж аав ээж хоёртой нь хэсэг ярьж суусан. Биесүүд нь болон сэтгэл санаанууд нь сайн байцгаана лээ. Хамтдаа та нарынхаа төлөө залбирцгаасан. Бас тус тусдаа үргэлж залбирцгааж байгаа. Та нарт минь тохиолдсон хүндрэл бэрхшээлүүдийн талаар Эзэнээс асуусан.

Орчлон дээр өнөө цагт 6-н тэрбум гаруй хүн амьдарч байна. Тэдний цөөхөн нь Бурханы гэр бүлд хамаатай хүмүүс (Түүний хүүхдүүд), бас цөөнх нь сатаны албатууд (чөтгөрийн хүүхдүүд) байдаг. Харин олонх нь юугаа ч мэдэхгүй, салхины үлээсэн чигт хийсдэг навч адил, урсгалын дагуу хөвдөг зомгол адил хүмүүс байдаг. Тэд маш өрөвдмөөр өчүүхэн хязгаар дотор сэтгэж, мэдэрч, шаналж, хоёр туйлын хооронд савлаж амьдардаг.

Хэн тэдэнд амар хялбар хөнгөн амьдрал, бэлэн зэлэн хоол, хүндрэл бэрхшээлгүй олдох эд агуурс, ашиг хонжоо, тавлаг тухлаг ахуй нөхцөл амлана, түүнийг бурханчлан шүтэж, өргөмжлөн дээдэлж, даган баясах ба харин өнөөх нь санаатайгаар ч бай, эсвэл үнэхээр амьдралын сүр хүчний өмнө хүчин мөхөсдөөд ч бай амласнаа биелүүлж чадахгүй тохиолдолд, түүнийг хайр найргүй үзэн ядаж, өөрсдийн амьдралын бүхий л болохгүй бүтэхгүйг чихдэг хогын сав болгон буруутгаж, яллаж, сөнөөж байж санаа амарцгаадаг гаж араншинтай.

Энэхүү хүн сүргийн дотор ширэнгэн ойн харгис, хатуу ширүүн хууль үйлчилдэг. Энэ нь хүчтэй нь хүчгүйгээ ашиглаж завшдаг, шулан мөлждөг, дарангуйлан дээрэлхдэг, боолчлон эрхшээдэг, эцэст нь сөнөөн устгадаг зүй тогтолтой. Тэгээд энэхүү бузар булай, ой гутмаар байдлаа үнэн дүрээр нь харж, гэмшин ухаарч, өөрчлөгдөн шинэчлэгдэх ямар ч чадваргүй байдаг ба хэсэгхэн хугацаанд мэдэрлээ ч гэсэн, “чадаж байгаа юманд арга байхгүй” гэх юмуу, эсвэл “нийтээрээ л ийм байхад би одоо яахав дээ”, мөн “сохорын газар сохороор, доголонгын газар доголонгоор”, гэхчилэн цэцэрхэж, мунхаг харанхуй, харгис бурангуйгаа хаацайлан сэтгэлээ тайвшруулцгаадаг.

Тэд харж сонсож, үнэрлэж амталж, тэмтэрч байгаагынхаа л хэмжээнд бодож сэтгэн, эргэж хөрвөн шаналах ба энэхүү махан биеийн мэдрэмжүүдээсээ гүнзгий хамааралтай байж, элдэв муу сүнсний хорон муу салхи болсон тачаал, шунал, өсөрхөл, хонзогнол, бардамнал зэрэгт боолчлогдон амьдардаг.

Гэвч хорон муу энэхүү хүн сүргийг тэнгэрлэг Эцэг маань хайрлан, тэдний төлөө цорын ганц Хүү Есүсийг загалмай дээр үхүүлсэн юм. Есүс Өөрийн үхлээрээ бидний гэмийг цагаатгаад зогсохгүй, бас дахин амилж тэнгэр газрын Хаан болоод, одоо Өөрийн сонгосон хүмүүсийн дотор Ариун Сүнсээрээ амьдарч, тэднийг Мөнхийн Бүтээгч Бурханы хүүхдүүд болгодог.

Ариун Сүнс тэднийг Христийн дүр төрхөөр өдрөөс өдөрт шинэчилж, тэдний даруу дуулгавартай, ажилсаг бүтээлч, хайрлан энэрэгч, өршөөн нийгүүлсэгч, өгөөмөр нинжин, шударга үнэнч, сэтгэлийн тэнхээтэй, баяр хөөртэй зан хандлага, амьдрах хэв маягийг нь нөгөөх сохор харанхуй, бурангуй олонхид үлгэр дууриал, жишиг загвар болгон харуулж, тэнгэрлэг үнэний зам руугаа дууддаг.

Ийнхүү сонгогдсон, Бурханы хүүхэд болсон нэгэн нь, энэ дэлхийн “бодит” гэгддэг амьдралын үйлс өрнөлийн цаана далд явагддаг, хүн төрөлхтөний амьдрал сэргэлт, авралын төлөөх Гэрэлийн, үхэл мөхөл, сүйрлийн төлөөх Харанхуйн хар хүчний үл үзэгдэх, хатуу ширүүн тэмцэл тулааны эргүүлэгт татагдан ордог. Тэгээд эд баялаг, идэх хоол, өмсөх хувцасныхаа л төлөө амьдардаг, тэдгээрийнхээ төлөө хэнийг ч худалдах, мөн хэнийг ч тахин шүтэхэд бэлэн сул дорой, бас ч үгүй бардам ихэрхэг нөгөө хүн сүргээс, жинхэнэ бодит амьдрал болох, зах хязгааргүй сүнсний ертөнцөд үүрэг хариуцлагаа ухамсарладаг, байр сууриа мэддэг, Хэний талд зогсож, Хэнтэй хамт юуны төлөө, хаашаа яваагаа гүнээ ухаарсан, эцэст нь ялан дийлэхээ ч мэдэж, итгэдгээрээ ялгардаг. Учир нь тэдний Эзэн Бурхан нь (Есүс Христ) ялсан Бурхан юм.

Тэд идэх хоол, өмсөх хувцас, амьдрах ахуй орчиноос үл шалтгаалан, зорилго тэмцэл, итгэл үнэмшил, Эзэн Бурхандаа үнэнч байж, аливаа хорон муугын салхи, урсгалд автахгүй сөрөн зогсож, хага яран хана хэрэм болж, тэр ч бүү хэл чигийг нь өөрчлөн зөв сайн зүгрүү удирдан залах сүр хүч, эрх мэдэл, сэтгэлийн тэнхээг эзэмшсэн байдаг. Тэнгэрлэг Эцэг маань Өөрийн хүүхдүүдийг ийм болгон хүмүүжүүлхийн тулд эрхийг биш, харин ч бэрхийг сургадаг.

Бидний хийсэн бүтээсэн ололт, сурсан мэдсэн мэдлэг, хүрсэн эзэмшсэн амжилт болгон маань Тэнгэр Эцэгийн маань бидний дотор хийсэн ажлын илрэл ба, эдгээр нь бидний Бурхан биднээр дамжуулан Өөрийгөө илчилж алдаршуулахын төлөө, үй олныг авралд дуудахын төлөөх ажлын үр дүн байдаг. Харин бид заримдаа эдгээрийг нь, “миний авъяастай, чадвартай, ухаалаг байсны улмаас...”, гэж бодож төөрөлддөг.

Бурхан маань бидэнд үнэхээр хайртай учир, энэхүү төөрөгдлийг маань бардамнал, ихэрхэл болохоос нь өмнө, бага дээр нь ухааруулан гэмшүүлхээр, эгэл даруу болгохоор ажиллаж, сахилгажуулан засаж залруулдаг. Энэ нь бардамнал ихэрхэлийн оргилд хүрээд, Эцэгийн уур хилэн, шийтгэлийг хүртэн тамд унахаас сэргийлж буй хэрэг юм.

Бас нөгөөтээгүүр гэмт хүний ертөнцийн өнгө мөнгө, эрээн мяраан алагласан хуурамч орчинд нүд нь гялбан, зүрх нь татагдан бузар мууд бүү автаасай, гял цал байдлаар дүрээ хувирган ирдэг муу нэгнээс болгоомжлон, үргэлж сэргэг байгаасай гэсэн зорилго ч бий. Мөн Эзэн Бурханаа л үргэлж санан дурсаж, хүндэлж хайрлан нөхөрлөдөг, Түүнийхээ тус дэм, нөмөр нөөлөг, хамгаалалтыг үргэлж мэдэрдэг байгаасай гэж сэрээж цочироож байдаг. Эдгээр олон шалтгааны улмаас та нарт маань уг зүйл тохиолдсон.

Тиймээс дүү нар минь, ялангуяа Амгаа минь, чи одоо ээж аавын эрх танхи, нялх балчир охин биш. Харь газар хил давж, хатуу ширүүн амьдралд хөл тавьсан насанд хүрсэн хүн болсоны хувьд, гэнэн хонгор өнгөц сэтгэлгээ, зан чанараа хаяж, хэрсүү ухаалгаар, нээлттэй нүдээр орчин тойрноо харж, нухацтайгаар амьдралд хандах цаг чинь болсон. Гэхдээ энэ нь егзөр хахир, өмхий санаатай бол гэсэн үг биш. Харин Эзэн Бурхантайгаа нөхөрлөж тэнгэрлэгээр төлөвш, Түүний өмнө дорд даруу бол, Түүнд түшиглэж сур гэсэн үг. Энэ чинь л та нарын маань амьдралын зорилго юм шүү дээ.

Тэрнээс биш диплом, зэрэг цол, албан тушаал, ахуй хангамж, цалин мөнгө зэрэг нь юу ч биш. Нэг салхиар авагдаж болно. Нэг салхиар өгөгдөж болно. Хичнээн нэр алдартай, эрдэм мэдлэгтэй ч, үзэгдэх ертөнцийн цаадахь үл үзэгдэх учир шалтгааныг харж мэддэггүй, мухар сохороор, мунхаг харанхуйгаар алхдаг нэгэн нь заавал нүхэнд ойчно. Тэр өдөр чамтай, тэрхүү аваар осолын тохиолдол дайралдсан нь их учиртай. Хэрвээ Эзэн тэрхүү мотороллерийг чинь зайлуулаагүй байсан бол, чамд ч тийм гай гамшиг нүүрлэх байсан.

Материаллаг өчүүхэн хохиролд харамсаж, Эзэн Бурхандаа ялархаж, гомдоллоогүй байх аа, гэж бодож байна. Хэрвээ тэгсэн бол нэн даруй гэмшиж, Түүний өмнө өвдөг сөгдөж, уучлал гуйгаарай. “Бодит” гэгддэг, үзэгдэх ертөнцөд тохиолддог хэцүү бэрх ч юм шиг, зовиур шаналгаатай ч юм шиг асуудал болгон гай барцад, хорон муу зүйл биш. Түүгээр дамжуулан хүн ухаажиж, төлөвшиж, бас илүү хорон муу, жинхэнэ гай гамшигаас аврагдаж байх нь олонтоо. Мөн яг үүний эсэргээр, сайн сайхан, зол завшаантай, зугаатай, ашигтай, бүтэлтэй ч юм шиг тохиолдол болгон жинхэнэдээ тийм биш байх нь олонтоо ба араасаа хорон муу, нууцлагдсан гай гамшиг, сорилтыг дагуулах нь бий.

Ихэнхдээ биднийг юу ч мэдэхгүй амар амгалан, өнгө мөнгөнд хууртан алхаж байхад, хар хүч энэхүү гэнэн мунхаг байдлыг маань ашиглан үнэт амийг маань авлахыг хүсдэг. Харин хайрт Бурхан маань үргэлж, бидний эрүүл энх, сайн сайхны төлөөх манаанд нүд цавчилгүй зогсдог учраас л, бид энэхүү хатуу ширүүн ертөнцөд амьд мэнд алхаж байдаг. Тиймээс Эзэн Есүсийн ариун нэрийг дуудан, үргэлж талархалтайгаар залбирч бай.

Үй олон хүн буун сум, өвчин зовлон, өлсгөлөн гачигдалын дор амь нас нь дээсэн дөрөөн дээр дэнжигнэн амьдарч байна. Үй олон охид хөвгүүд хүүхэд насны жаргал, элэг бүтэн амьдарлыг мэдэхгүй өсөж, амь зогоохын төлөө хар нялхаасаа хүнд хүчир хөдөлмөрт зүтгэж, бас биеэ үнэлж байна. Бас үй олон үе тэнгийнхэн чинь сэтгэлгээний, итгэл үнэмшилийн эрх чөлөөгүй, харанхуй бурангуй ертөнцөд байна. Харин та нарт маань Бурхан Эцэг маань ямар сайхан элэг бүтэн, элбэг дэлбэг, сурч боловсрох нөхцөл хангагдсан сайн сайхан хувь заяа хайрлаа вэ. Энэ нь асар их үнээр, Бурханы Хүүгийн амиар өгөгдсөн юм шүү.

За ингээд энэ удаа өндөрлөе. Библиэ сайн унш. Нөхцөл байдал ямарч байсан Бурхандаа хэзээ ч бүү гоморх. Тэр үргэлж бидэнд сайныг санаж, сайныг л хийдэг. Тэр нь дүрээ хувиргасан, хүндрэл бэрхшээлтэй мэт байдлаар ч илэрдэг. Гэхдээ ард нь даваад гарчихаад, эргээд харахад маш их зүйл сурч, хатуужиж, хүчирхэгжсэн байдаг.

Бүх зүйл Түүний хатуу хяналт дор явагддаг тул, юунд ч бүү санаа зов. Түүнд итгэ. Бүх зүйлийг Бурхантайгаа зөвлөж, Түүний туслалцаа, оролцоог урьж бай. Түүнтэй л хамааралтай нэгэн гэдгээ үргэлж сана. Түүний дургүй зүйлсэд гар бие, сэтгэл санаагаа бүү эзэмдүүл, бүү оролц. Та нартаа хайртай шүү. Чанга тэврэн үнсэе.

GOD bless YOU. JESUS loves YOU.

Энх-Амгалангын хувийн архиваас...

Бурханы охинд бичсэн захидал-3

2010-07-25T23:21:00.000-07:00

Сайн байна уу?
Бурханы хайртай охин минь ээ. Аян замдаа сайн явж байгаа биз дээ? Та бүгдийн аян замын сайн сайхан, бүтэмжтэй, сэтгэл ханамжтай байдлын төлөө би Өөрийн Эцэгээс үргэлж гуйн залбирч байгаа. Та нар минь ч бас Түүнийг бүх зүрхээрээ хүндэлж, залбирч, аян замаа даатгаарай. Түүний халамж, хамгаалалт, сүр хүч, хайр нь та бүгдтэй хамт байх болно.

Хүн болгон л энэ ертөнцөд аялхаар ирдэг. Амьдрал бол аян зам, хүн бол аялагч юм. Мэдээж газар орон, нутаг ус, далай тэнгис, улс үндэстнүүдээр аялахаас гадна амьдралын их харгуй замд хүн бүр өөр өөрийнхөөрөө хөл тавьж их аянд, эрэл хайгуулд гардаг. Аялал, эрэл хайгуулуудын зорилго хараа, утга учир янз янз л байдаг.

Олон хүн өөрт таарсан тохирсон ажил мэргэжилээ эрж хайдаг бол заримд нь хайх шаардлагагүйгээр шууд л эцэг эх, өвөг дээдсээс уламжилж ирсэн ажил мэргэжил өвлөгддөг. Мөн олон хүн хайр сэтгэл, амьдралынхаа хань ижил, ирээдүйн үр хүүхдийнхээ ээжийг эсвэл аавыг хайж байдаг бол бас олон хүнд хайх шаардлагагүйгээр эцэг эхийнх нь сонголт тулгалтаар, бага насны сүй тавилт, ёс жаягаар энэ зүйл нь өгөгддөг.

Мөн ажил үйлс, бизнэсийнх нь, эсвэл улс төрийн үзэл баримтлал, зорилго төлөвлөгөөнийх нь талаар нэгдмэл санаа оноотой байж, тууштай хамтрах анд нөхөд, тойрон хүрээллийг ч олон хүн хайж байдаг. Бүр зарим нь төөрөлдсөн эцэг эхийгээ хайдаг бол зарим нь алдагдсан үр хүүхэд, хайртай дотно хүнээ хайж байдаг. Бас өнөө цагт маш олон хүн ямар нэг өндөр оргил, амжилт ололтонд хүрэх арга замыг улайран хайдаг.

Гэхдээ энэ бүх аялалын цаана хүмүүний зүрхний гүн дэх тайвшрашгүй өдөөлт, мөрөөдөл, далд хүсэл бий. Бүх аялал, эрэл хайгуулын цаана ертөнцийг үзэх үзэл буюу үхэл, амьдралын талаархи төгс мэдлэг, өөрийн оршихуйн утга учир, үнэ цэнийн талаархи үнэн зөв ойлголт, ухаарлыг олж авах, танин мэдэх хүсэл сонирхол далдлагдсан байдаг. Үүнийг сүсэг бишрэл, итгэл үнэмшилийн (үнэний) их эрэл гэж хэлж болох юм.

Энэ аян нь өмнө дурдагдсан бусад аялалууд болон тэдгээрийн зорилгуудыг бүгдийг нь өөртөө нэгтгэсэн агуу том, бас тэднээс илүүтэй хүмүүний оршихуй эс оршихуйд нөлөөтэй, нэг бол мандал бадрал, аз жаргал амар тайвныг өгдөг, эсвэл мөхөл сүйрэл, зовлон зүдгүүрийг учруулдаг аян болой. Энэхүү аяны туршид хүмүүнтэй хүнд бэрх олон янзын сорилт, бэрхшээл тулгардаг. Мэдээж бас баяр баясгалантай, аз завшаантай тохиол ч олонтоо учирна.

Үр дүнд нь тэд янз бүрийн ойлголт ухааралд, танин мэдэхүйд, үнэлэлт дүгнэлтэнд, итгэл үнэмшилд, сүсэглэл бишрэлд (харьцангуй үнэнд) хүрцгээдэг. Эсвэл тэдгээрийг олж авдаг гэж ч хэлж болох юм. Гэтэл заримд нь бас л өөрөөс нь үл шалтгаалсан тулгалт, оноолтоор энэ зүйл нь өгөгддөг. Энэ нь өөрийн гэсэн аялал хийх, эрж хайх, улмаар тохиолдсон замуудаас ухамсартай сонголт хийх эрхийг нь боомилсон маш харгис явдал.

Хүмүүний хүрч мэдсэн олон янзын мэдлэг, ухаарал, дүгнэлтээс (аян замдаа ямар олз омогтой байснаас) нь үл шалтгаалан Оршигч, туйлийн дээд Ахуй Үнэн гэж бий. Тэр бол Ертөнцийг Бүтээгч, хүн төрөлхтөнийг үхэл мөхөл, ял шийтгэлээс Аврагч, бидний Бурхан Есүс Христ билээ. Тэр Өөрийн сонголтоор бидэнд Өөрийгөө, Өөрийн доторхи бүхий л төгс төгөлдөр, тэнгэрлэг баялаг аа илчлэн мэдүүлж, өвлүүлэн өгсөн нь агуу нийгүүлсэл, ивээл хайр, зол завшаан болой. Тэр нь загалмай дээрхи гэмийн Уучлал, бас дахин амилсан Мөнх Амьдрал юм.

Харин харамсалтай нь энэ агуу Хайр Энэрлийг үй олон хүн мэдэхгүй, өөрсдийн үр дүнгүй, маш их гарз хохиролтой, шаналал зовлонтой аяндаа бэдэчсээр л байна. Тэдний аялалын зорилго бол нэр алдар, тойрон хүрээлэл, эд баялаг, эрдэм мэдлэгийн оргил, амжилт ололт ба бас мэдээжээр тэднийг олж авч, танин мэдсэнээрээ элбэг баян, сэтгэл хангалуун, аюул осолгүй, эрсдэл эргэлзээгүй амар тайван амьдралыг эзэмших нь юм.

Хүмүүн нь, амьдрал тэмцэлийн энэхүү агуу их аяныхаа явцад олон зүйлийг алдаж гээдэг, бас олон зүйлийг олж эзэмшдэг. Харин та бол Их Эзэний гавъяа, сонголтоор дээд Үнэнийг өвлөгч болсон. Таны баялаг бол Есүс Христ болой. Хүн олон зүйлийг алдаж, гарз хохирол амсаж болно. Харин Христийг л алдаж хэзээ ч болохгүй.

Тиймээс ч таны аян зам нь эрэл хайгуул биш, харин энэхүү өөрийн Үнэт Эрдэнийг бусдад илчлэн тунхаглах нь, хуваалцан өгөх нь, танин мэдүүлэх нь, зааж сургах нь, Түүн рүү замчлан удирдах нь байг. Сайн Мэдээг тараагчийн хөл уулсын дээр ямар үзэсгэлэнтэй вэ? гэж Сударт өгүүлдэг.

Хүмүүс амар тайван, аз жаргал, хайр энэрэл, төгс төгөлдөрийг хайж бэдэрдэг бол, харин та нэгэнт тэдгээрийг нь эзэмшигч тул, бусдад түгээн дэлгэрүүлхийн тулд аялагтун. Олон хүн олж авах, эзэмшихийн төлөө аялдаг бол, харин таны бүх амьдралын аян зам, Сайн Мэдээг тарааж өгөх, өглөгийн аян байх болтугай.

Таны аялал амжилт ололтоор дүүрэн байж, үй олонд Гэрэл гэгээ, Авралыг түгээх болтугай. Чанга үнсэе. Бурханы хайртай охин минь хүчтэй, зоригтой аялагтун.

GOD bless YOU. JESUS loves YOU.

Есүгэний хувийн архиваас...

Бурханы охинд бичсэн захидал-2

2010-07-03T00:19:00.000-07:00

Сайн байна уу?
Бурханы хайртай охин минь. Таны бие болоод сэтгэл Эзэний ивээл, ерөөлөөр бялхаж байгаа биз дээ? Өмнөх захиандаа би танд киноны тухай өгүүлсэн. Кино урлаг зүгээр ч нэг, санамсаргүйгээр хүн төрөлхтөний соёл урлагийн тэргүүлэх эгнээнд богинохон хугацаанд цойлон гарч ирсэн юм биш. Хүн бүр өөрөө дахин давтагдашгүй, өөрийн гэсэн өвөрмөц өнгө будаг, өрнөл үйлс, аяз аялгуу бүхий “кино” юм шүү дээ.

Кино нь олон янзын элемэнт, бүрдэлүүдээс бүтдэг нэгдмэл цогц бүтээл юм. Янз бүрийн төрөл жанрийн кино болгоноос салгагдашгүй нэгэн элемэнт бол хөг аялгуу, хөгжим дуурьсал болой. Үггүй, өнгөгүй, нэгэн хэвийн, эсвэл галзуурсан өрнөл, адал явдалтай, аймшигтай, уянгын, эмгэнэлтэй гэхчилэн олон янзын кинонууд бүгд үйлс өрнөл, утга агуулгаа аяз аялгуугаар тодотгож, хэлэх гэсэн санаагаа хөг дуурьслаар хүч оруулан амталсан байдаг.

Хөг аялгуу, хөгжимгүй кино бол давсгүй хоолтой адил. Энд бид "кино"-г үл үзэгдэх ертөнц буюу хүмүүний дотоод зүрх сэтгэлийг төлөөлүүлэн, зүйрлэн авч үзэж ярьж байгаа билээ л. Бидний Бурханы тоо томшгүй, олон янзын бүтээл дундаас сэтгэл зүрхнээс ундран гарах догдлол мэдрэмж, долгисын илэрхийлэл болдог аяз аялгуу, хөг дуурьсал бол нэн гайхалтай нь бүлгөө.

Аялгуу бол бодлын, догдлол мэдрэмжийн урсгал юм. Энэ нь нэгэн төрлийн хэл яриа юм шүү дээ. Үг өгүүлбэр нь оюун сэтгэлгээний илэрхийлэл бол, аяз аялгуу, хөг дуурьсал нь зүрх сэтгэлийн илэрхийлэл, хэл яриа юм. Сэтгэл хөдлөлгүй, догдлол мэдрэмжгүй, уярал хайлалгүй нэгэн байваас роботоос юуны ялгаатай вэ?!

Нэгэн Бурханы хүн тэнгэрт түр хугацаагаар халиад, эргэн ирэхдээ "...үгээр илэрхийлэгдэшгүй, гайхалтай хөг аялгуу, дуурьсал..." сонсосноо Сударт бичин үлдээсэн байдаг. Үл үзэгдэх ертөнцөд тоо томшгүй бодол санаа, төсөөлөл мөрөөдлийн, сэрэл мэдрэмжийн урсгалууд холилдон, зөрчилдөн, бас уусан нэгдэж оршдог.

Мөхөс хүмүүний хувьд эдгээрийг бүрэн гүйцэд танин мэдээд, улмаар нүдэнд харагдах байдлаар эмхэлж цэгцлэх, эрэмблэх, хэлбэр дүрстэй болгох, өнгө будгаар будах, хэмнэл аялгуугаар илэрхийлэх ямарч боломжгүй. Хүмүүний зүрх ертөнцийг байтугай, зөвхөн өөрийгөө ч зохист хэмнэлээр илэрхийлж, хэлбэржүүлж чадахгүй. Чаддаг байсан бол Бурханы Хүү загалмай дээр үхэх шаардлагагүй байсан.

"Зүрх сэтгэл бол хамгийн их шархалсан, хамгийн их эвдэрсэн, шаналлаар дүүрэн, эдгэршгүй юм" гэж Сударт өгүүлдэг. Амьдрал бидний өмнө ямарваа нэгэн асуудлыг босголоо гэхэд ямар өнцөгөөс хэрхэн харж байгаагаас, ямархуу сэрэл мэдрэмжийг мэдэрч хариу үйлдэлийг (реакцийг) зүрх сэтгэлүүд гаргаж байгаагаас шалтгаалж, янз янзын хөг ая тухайн асуудлыг тойрон дуурьсдаг.

Жишээ нь: Хөндөн ярихад нэн эмзэг, дэлгэн тавихад зовиуртай асуудал байлаа гэж үзье. Биеэ үнэлэгчдийн, архинд болон мансууруулах бодисонд донтогчдын, хулгайч луйварчид, алуурчид, гэмт хэрэгтнүүдийн харанхуй ертөнцийг хараад Ариун Сүнсээр хөглөгдсөн нэгний зүрхнээс халаглан харамссан, гашуудан энэрсэн, өрөвдөн нийгүүлссэн нэн уянгалаг хайрын хөг тон илэрхийлэгддэг.

Өөр нэг зүрхнээс жигшин зэвүүцсэн, сэжиглэн цэрвэсэн, айн ширвээтсэн, бачимдан сандарсан, улмаар түгшүүр дэлдэж, өөрийн хамгаалалт аюулгүй байдлын төлөө дэмжлэг, туслалцаа хүссэн харанга цангийн хангинаа гололсон хөг аяз гарах байх. Гэтэл бүр гурав дах зүрх уур бухимдал, үзэн ядалт, хорсол занал, шүүлт яллалтыг илэрхийлсэн хилэнгийн симфонийг ч удирдаж болох юм.

Харин охин минь би чамд хэлье. Та өөрийнхөөрөө хөг аялгуу зохиох гэж, дуурьсал найрлыг удирдах гэж бүү оролдоорой. Харин хамгийн шилдэг, сонгодог, төгс хөгжмийн Зохиолч бас Хөгжимчин, Удирдаач болох Түүний гарт хорин дөрвөн утастай босоо ятга нь, эсвэл дохиур мод нь болоорой, гэж захья! Зөвхөн Тэр л хэзээ ч, хэн ч дуурьсгаж бас найруулан тоглуулж чадахгүй симфони найрлыг зохиодог бас удирдан тоглуулдаг Нэгэн билээ.

Таны зүрх сэтгэл, догдлол мэдрэмжийн долгис тань Түүний л нэн чадварлаг, эрхэмсэг, тэнгэрлэг мутараар удирдуулан, гайхам уянгалаг, энхрий ялдам, хайрын хөг эгшигийг, сүр жавхлантай, эрч хүчтэй, цоглог хэмнэлтэй хослуулсан яруу тунгалаг аялгуу болон цацарч, сонсох чихтэй нэгний сонорыг мялаах болтугай.

Тэр л энэхүү тэнгэрлэг аялгуу, таны киноны аль хэсэгт өрнөл сүрийг нэмж, аль хэсэгт утга уянгыг эгшиглүүлхийг тунч оновчтой шийдэх болно. Бурханы хайртай охин минь хүчтэй, зоригтой байгтун. Та бол Түүний зүрхэн дэх нот нь, мутар дах ятга нь, дохиур саваа нь болой. Ариун Сүнс бол хамгийн дээд, тансаг сонсголонт хөг дуурьсал, эгшиг аялгуу мөн. Тэр чамаар дамжуулан Өөрийгөө дуурьсгах болно. Чанга үнсэе.

GOD bless YOU. JESUS loves YOU.

Есүгэний хувийн архиваас...

Бурханы охинд бичсэн захидал-1

2010-06-15T19:22:00.000-07:00

Сайн байна уу?

Эрхэм хүндэт Бурханы охин таньтай Эзэний амар амгалан үргэлж хамт байг. Та бол үнэхээр сонгогдсон, томилогдсон нэгэн мөн. Та бол Түүний бахархал, шинэ тэнгэрлэг бүтээл мөн. Бас таниар дамжуулан үй олныг аврал, гэрэл, эрх чөлөө рүү дуудах болно. Үүний тулд улам л Түүнтэй уусан нэгдэх нь нэн чухал.

Үзэгдэх ертөнц үл үзэгдэх ертөнцөөс хэлбэрждэгийг та мэднэ. Бидний эргэн тойронд өрнөж, харагдаж буй "бодит" гэгддэг ертөнц нь, жинхэнэ амьдралын ердөө л нэг хүрэхтэй үгүйтэй хувь нь юм. Энэ ертөнцийн хувь заяа, өрнөл хөгжил үл үзэгдэх ертөнцөд л шийдэгдэж байдаг.

Эндээс үл үзэгдэх ертөнц нь хаана байдаг юм бэ? ямархуу зарчим, хууль дээр суурилдаг юм бэ? хэрхэн түүнд нөлөөлж, хянах вэ? гэсэн асуултууд урган гардаг. Бас Түүнтэй уусан нэгдэх нь чухал, гэдэг нь юу гэсэн үг вэ? Хэрхэн яаж Бурхантай уусан нэгдэх вэ? гэж та асуух байх. Үл үзэгдэх ертөнц бол бодол санаа, зүрх сэтгэл, төсөөлөл зураглал, хүсэл мөрөөдлийн ертөнц юм. Энэ нь Бурханы зүрхэнд бас хүмүүний зүрхэнд оршдог, өрнөдөг кино гэхэд болно.

Судар бидэнд Бурханы зүрхэндэх ертөнцийн гоо сайхан, төгс төгөлдөр, нэн тэнгэрлэг ариун болохыг илчилж мэдүүлдэг. Бурханы зүрхэндэх кино нь шударга үнэнч, хайр энэрэл дүүрэн, өршөөл уучлалаар бялхам байдаг ба бузар мууд эвлэршгүй, эрс хатуу няцаалт өгдөг зарчим, хууль, зүй тогтол дээр суурилж зохиомжлогдсон байдаг. Бас нэн төгс эмх цэгц, дэг журам, дэс дараалалтайгаар өрнөдөг.

Харин хүмүүний зүрхэндэх кино нь яг үүний эсрэг зүй тогтол, зохиомж бүхий бас, маш эмх замбараагүй, утгагүй, жигшүүрт төсөөлөл зураглал, тэмүүллээр дүүрэн. Энэ кино хүчирхийлэл, завхайрал, аллага, хулгай, архидалт, шунал, нэр алдарын, эрх мэдлийн төлөөх өрсөлдөөн тэмцэлээр дүүрэн зураглал, төсөөлөлтэй болохыг эргэн тойрны үзэгдэх ертөнцийн өрнөл хөгжил, үйлс амьдралаас харж болно.

Хүн юу тарина, түүнийгээ хурааж авна гэж Эзэн маань бидэнд сургадаг. Зүрх сэтгэлдээ завхайрал, шунахайрал, хүчирхийлэл, хонзогнол, атаархал, бардамналаар дүүрэн мөртөө амьдралаас, Бурханаас сайн сайхныг горьдолтгүй. Харин яг Бурханы зүрхэндэхтэй адил, гэрэл гэгээ, энэрэл өршөөл, баяр талархал, шударга үнэн, хүндлэл хайраар дүүрэн эгэл даруу киног та зохиомжилж, зураглаж, төсөөлж, мөрөөдөж түүнийгээ Эзэн Бурхандаа үргэлж өргөж, мөн хянуулж, засуулж байх нь Түүнтэй уусан нэгдэх эхний алхмууд болой.

Үүнд нэн чухал нь Түүний оролцоо, үүрэг ролийг киноныхоо гол дүрд тодруулах нь маш чухал. Олон "киночид" өөрсдөө л гол дүрд тоглож, өөрсөддөө л алдар хүндийн титмийг өмсгөдөг.

Амьдрал гэдэг энэхүү гайхамшигтай киноны гол Зохиолч, Найруулагч нь таны Эзэн Бурхан тань шүү гэдгийг хэзээ ч бүү март. Тэр л таны зүрхний кино, бодит ертөнцөд биелэх эсэхийг шийддэг. Хэрвээ таны бүтэлгүй зохиомж найруулга тань Түүгээр хүлээн авагдалгүй олонтоо буцсан ч, гутралгүй, шантралгүй, өөртөө дүгнэлт хийн, дахин дахин шинэчилж, өөрчилж зүрхнийхээ өргөл, хүндэтгэлийг (киног) Түүнд өргөсөөр л, мөн Түүний зөвлөмж, тусламжийг кинондоо чухалчилан тусгасаар л бай. Тэвчээртэйгээр шаргуу үйлдэх аваас, нэг л мэдхэд яг л Түүнтэй адил киног зохиомжилдог, найруулдаг болно.

Зүрхний бялхалаас ам ярьдаг. Таны зүрхэндэх тэрхүү тэнгэрлэг кино тань бас амаар тань, ажил үйлсээр тань бусдад тунхаглагдаж, харагдаж, энэ харанхуй ертөнцөд өөрийн гайхам нөлөөг үзүүлж байхыг Тэр зөвшөөрөх болтугай. Бурханы хайртай охин минь хүчтэй, зоригтой байгтун. Бүх хортой нөлөө бүхий киночид сөнөж, харин Түүний сурган хүмүүжүүлсэн, Түүнлүгээ адил тэнгэрлэг, ариун киночдын суу алдар мандан бадрах цаг асуй. Чанга үнсэе. Та бол шинэ тэнгэр (зүрх сэтгэл), шинэ газрыг (бодит амьдрал) бүтээгч мөн.

GOD bless YOU. JESUS loves YOU.

Есүгэний хувийн архиваас...

Загалмай үүрэхээр шийдэхүй ба нарийн замаар алхахуй

2010-05-03T13:53:00.000-07:00

Хүмүүний амьдрал асуудлуудын дунд байдаг бөгөөд, өдөр тутам янз бүрийн тоо томшгүй шийдвэр гаргах хэрэгтэй болдог. Гэхдээ эдгээр шийдвэрүүд нь хоорондоо уялдаа холбоотой байж, бие биенийгээ гүйцэлдүүлж, өмнөх нь арынхаа суурь дэвсгэр болж, цогцоороо нэгэн гайхамшигт амжилт ололт, төгс төгөлдөрийг бий болгон бүрдүүлж огт чаддаггүй. Харин ч бие биеэ үгүйсгэсэн, өөр хоорондоо зөрчилдсөн, улам илүү маргаан, асуудлыг өдөөсөн, алив зовлон шаналлын үндэс суурь болсон байх нь ихэнхдээ. Дээшээ цорволзон үсчих очнуудын адил, хүн зовлонгийн төлөө л төрдөг (Иов 5:7).

Энэ нь тэр нэгэн товлосон цаг болж, сүүлчийн эргэлт буцалтгүй эцсийн шийдвэр гаргах хүртэл үргэлжилдэг. Энэхүү эцсийн шийдвэр нь юу юм бэ? Энэ нь өөрийнх нь төлөө хийсэн Есүсийн агуу хайрын үхэлийг, золиослолыг зүрхэндээ хүлээн авч мэдэрмэгц гаргадаг, чин сэтгэлийн шийдвэр болсон “Түүнийг дагах” нь юм. Түүнийг дагах тодорхой болзол, хэм хэмжүүр, шаардлага өгөгдсөн байдаг. Тэрээр бидэнд ”Загалмайгаа үүрээд Миний хойноос дагахгүй хүн, Миний хувьд зохистой биш.” (Мт. 10:38), гэдэг.

Энэ нь юу гэсэн үг вэ? “Загалмайгаа үүрнэ”, гэж яахыг хэлэх вэ? Бүх юмаа хаяад сүмд үйлчлэх үү? Сайн мэдээний илгээлтээр хаа нэг тийшээ явах уу? Эсвэл өглөг буяны аливаа ажилд биеэрээ болон харамгүй өглөг хандив өргөн оролцох нь уу? Мэдээж тийм... Эдгээр нь Христийн алдарын төлөө таны зүгээс хийж буй гайхалтай эр зоригтой шийдлүүдийн үр дүн мөн. Нэгэнт л хүмүүний амьдрал зовлонгийн далай юм бол Бурханыхаа төлөө, бусдын авралын төлөө, Эзэнтэйгээ адил ялгуусан зовлон туулъя л даа. Харин та нар Христийн зовлонгуудыг хуваалцдагтаа баярла. Ингэснээр мөн Христийн алдар илчлэгдэхэд та нар баяр хөөртэйгөөр баярлах юм (1 Пт. 4:13).

Хуучин гэрээний үед, Эзэнд таалагдахын тулд Мосегийн хуулийг чандлан сахих бас бусдыг сахихыг уриалах, шахаж шаардах, хэрэгжилтэнд нь хяналт тавих нь шашны мяндагтнуудын, сүмийн зэрэгтнүүдийн үйлчлэлийн үндсэн цөм нь, амьдралынх нь ерөнхий хэв шинж болж байсан. Яг үүн шиг христчин нэртэй, сүмийн зэрэгтэй, бусдын алдаа зөрчил, сул доройг тэвчдэггүй, яллалт буруутгал, шүүлтээр дүүрэн, зөвхөн өөрийнхөө л төлөө амьдардаг, хаа газар (ялангуяа Христийн Чуулганд) “аливаа гажуудал”-ыг засаж, “шударга ёс”-ыг тогтоохыг, бусдад заахыг оролдогчид, өөрөөр хэлбэл Бурханы урдуур “бурхан” болж, “өөрийнхөө чуулган”-ыг босгохыг санаархагчид нилээдгүй байдаг нь нэн харамсалтай.

Тиймээс би та нарын ахлагч, Христийн зовлонгуудын гэрч болон илчлэгдэх алдарыг хуваалцагч болохынхоо хувьд, та нарын дундах ахлагчдыг ятгаж байна. Та нарын дунд байгаа Бурханы хонин сүргийг хариул. Ингэхдээ албадлагаар бус, харин сайн дураараа, Бурханы хүслийн дагуу харгалзан, хомхой ашгийн төлөө бус, харин хичээл зүтгэлээр, өөрсдөд чинь даалгасан хүмүүсийг ноёлох бус, харин хонин сүрэгтээ үлгэр дууриал болон хариул (1 Пт. 5:1-3).

Эзэний төлөө “ийм их” зүтгэлтэй юм уу?, гэхлээр бас биш шиг. Ажаад байхад өөрийнхөө л бодол, хараа, мөрөөдөлийг тугаа болгох ба тэдгээр нь ичмээр, инээдтэй өчүүхэн зүйлс байх. Түүнийхээ л биелэлтээс сэтгэл ханамжийг хайх ба бүтэлгүйтэх үед бухимдан шаналах нь, бусдыг буруутган яллах нь эгээ л алдар хүнд албан тушаалаар амьсгалагч, эрх мэдэл хүч нөлөөнд дурлагч, өөрөөр хэлбэл орчин үеийн садукайчууд, фарисайчууд мөн. Тэд Бурханы төлөө хичээл зүтгэлтэй боловч, энэ нь мэдлэгийн дагуу биш хэмээн би гэрчилдэг. Учир нь Бурханы зөвт байдлыг мэдэлгүй, өөрсдийнхийгөө тогтоохийг эрмэлзэн, тэд Бурханы зөвт байдалд үл захирагдав (Ром 10:2,3).

Өнөөдөр тэдний нөлөөгөөр Чуулган дотор “том ангайж их хүртэх, чадаагүйнх нь хохь болох” хуурамч сургааль ч маш их газар авсан. Эдгээр хуурамч сургаалиуд хүмүүнд амар амгалан, тайвшрал эдгэрэл, чөлөөлөлт, тэнгэрлэг танин мэдэхүйг өгдөггүй, харин ч эсэргээрээ дэлхийлэг хүсэл мөрөөдөл, өрсөлдөөн тэмцэл, шаналал, санаа зовинолоор дүүрэн, тоо томшгүй болж бүтэхгүй шийдвэр гаргах шаардлагатай амьдрал (зам) уруу түлхдэг. Харин фарисай болоод садукайчуудын хөрөнгөнөөс болгоомжил гэв. Тэгэхэд л тэд, Есүс талхны хөрөнгөнөөс биш, харин фарисай болон садукайчуудын сургаалиас болгоомжил гэж айлдсаныг ухаарав (Мт. 16:11б,12).

Бид энэ харанхуй ертөнцөөс юу горилох юм бэ? Энэ ертөнцийн юу нь бидэнд мөнх амь, аз жаргал, амар тайваныг өгөх вэ? Юунд хүрнэ гэж, эсвэл юуг олж авна гэж бурангуй сохор хүмүүний ертөнцтэй өрсөлдөн тэмцэж, булаалдан маргаж, бухимдан шаналах вэ? Энд (загалмайгаас өөр) олж авсан болгоноо, танин мэдсэн болгоноо, хүрсэн хийсэн болгоноо эндээс авч явж чадахгүй шүү дээ! Бидний очих газар маань тэдгээр нь ямар ч үнэ цэнэгүй, ач холбогдолгүй, ичмээр өчүүхэн, бүр бузар зүйлс гэж тооцогддог. Хэн ч хоёр эзэнд үйлчилж чадахгүй. Тэр нэгийг нь үзэн ядаж, нөгөөг нь хайрлах болно. Эсвэл нэгээс нь зуурч, нөгөөг нь зэвүүцнэ. Та нар Бурхан болоод эд баялагт хоюуланд нь зэрэг үйлчилж чадахгүй (Мт. 6:24).

Эгэл даруу байж Эзэнд өөрийгөө бүрэн өргөх, зориулах, юутай байгаадаа болон хэн байгаадаа сэтгэл хангалуун, талархалтай байх, бусдынхаа боол нь, зарц нь байх, дайснаа хүртэл хайрлах, загалмайгаар л сайрхах зэрэг дээд зарчимууд маш бага заагдаж байна. Өөрөөр хэлбэл “загалмай үүрэх” талаар ярих нь тун ховор болжээ. Харин ч бүр “загалмай үүрнэ” гэдэг нь, (эд баялаг, ахуйн тансаг байдлын төлөөх) ашиг хонжоо, ололт амжилтын төлөөх зүтгэл тэмцэл юм шиг ч ярих болов. Есүс --Би бол зам, үнэн, амь мөн. Хэн ч Надаар дамжилгүйгээр Эцэгт хүрэхгүй (Иох. 14:6).

Ингээд ярихлээр олон хүн, “юу ч хийж бүтээхгүй, идэвхи санаачлагагүй, үлбэгэр залхуу, бэлэнчлэх зан хандлагийг дэврээнэ”, гэцгээдэг. Идэвхитэй бүтээлч байх гээд, Түүний өмнө их гавъяа байгуулж тоогдох гээд, олон хүнийг аварсан “мундаг аврагч” болох гээд хоосон, үр дүнгүй, бүр цаашлан олонд бүдрүүлэх чулуу болон мунгинаснаас, Эзэний дотор хүлээцтэй тайван, даруу байж, Түүний удирдамж сахилгажуулалтыг дуулгавартайгаар хүлээн авсан нь илүү дээр. Бурханы алдарын төлөө зовох нь ч нарийн учиртайг Судар илчилдэг. Тиймээс Бурханы хүслийн дагуу зовогсод зөвийг үйлдэхдээ итгэмжит Бүтээгчид сүнсээ даатгаг (1 Пт. 4:19).

Сүнсээ алдар хүнд, “амжилт ололт”, хувийн сонирхолдоо даатгачихаад бүтэлгүй, урагшгүй болоод ирхээрээ “загалмай үүрч” байгаагаа гайхах нь ч байна. Мосе өөрийн хүчээр ард түмнээ өмөөрөгч, хамгаалагч болох гээд египэтчүүдэд ч, ард түмэндээ ч адлагдсаныг сана. Харин 40-н жилийн цөлийн сахилгажуулалтын дараа, түүнийг ашиглан Эзэн Өөрөө гайхамшигт чөлөөлөлтийг хэрэгжүүлсэн билээ.

Үүнчлэн Бурханы зорилгын дагуу дуудагдаж, Түүнтэй хамт агуу гайхамшгийг бүтээгчид нь, идэвхи чармайлттайгаар гар өргөн “би, би” гэж дэвхцэгчид биш, эгэл даруугаар тэвчин хүлээж, цаг нь болоход дуулгавартайгаар захирагдагсад байдаг ажгуу. Иймд Бурханы хүчирхэг мутрын дор өөрсдийгөө даруу байлга. Тэгвэл Бурхан зохистой цагт та нарыг өргөмжилнө. Тэр та нарын төлөө санаа тавьдаг учраас, бүх зовнилоо Түүнд үүрүүл (1 Пт. 5:6,7).

Тэгээд ч Мөнхийн бүтээгч Эзэний дотор, Түүнтэй Хүүгээр нь дамжуулан нөхөрлөж байхад, утгагүй, үнэ цэнэгүй, хоосон амьдралаар насыг барна гэсэн ойлголт огт байхгүй. Энэ харанхуй ертөнцийг шинэчлэхийн төлөө, Эзэний алдарын төлөө хийх юм дэндүү их байна. Мосе, Гидеон, Петр, Паул нар шиг олон гайхамшигыг хийхээр, алдар гавъяа байгуулхаар тэмүүлэх нь Эзэний мэлмийд тааламжгүй. Алдар суутай пастор, ахлагч, илгээлтийн эзэд шиг болох эсэх нь ч Эзэний л мутарт бий. Бурхан биднийг ажил үйлсээр минь биш, харин Өөрийнхөө зорилго болон бүх л өнө мөнхөөс Христ Есүс дотор бидэнд соёрхсон нигүүлслийн дагуу аварсан. Тэр биднийг ариун дуудлагаар дуудсан байна (2 Тим. 1:9).

Тэгвэл хэрхэн Эзэний алдарын төлөө, хаанчлалын төлөө зохистойгоор загалмай үүрэх вэ? Ер нь загалмайн зорилго, утга учир, үнэ цэнэ, бидэнд хэлж буй далд санааг нь бүгдээрээ задлан шинжилж үзэцгээе. Есүс Христ бол махан биед хувилж ирсэн Бурхан буюу Бурханы Хүү. Түүнд төрөлх болон олдмол гэм нүгэл үгүй. Тэр төгс ариун Нэгэн. Гэвч төрөлх болон олдмол тоо томшгүй гэм нүгэлийн боолчлолд буй хүмүүний төлөө үхэж, эрх чөлөө, мөнх амийг өгөхөөр ирсэн ба энэ зорилго нь загалмай дээр төгс хэрэгжсэн. Загалмай бидэнд гэмийн төгс уучлал, дахин амилалт буюу мөнхийн амьдралыг өгдөг. Бурхан ертөнцийг үнэхээр хайрласан тул цорын ганц Хүүгээ өгсөн. Ингэснээр Хүүд итгэгч хэн ч мөхөхгүй, харин мөнх амьтай болох юм (Иох. 3:16).

Гэхдээ энд бид Түүнийг “дагах” талаар ярилцаж байна. Арай өөрөөр хэлбэл Түүнийг “дуурайж амьдрах” тухай хэлэлцэж байна. Энэ өнцөгөөс харах юм бол загалмай нь бидэнд цоо шинэ, хүмүүний ертөнцөд урьд нь огт байгаагүй амьдралын замнал, сэтгэлгээний жишиг загвар, үлгэр дууриал болдог. Есүс бидний өмнөөс үй олон буруутгал зэмлэл, хардалт гүтгэлэг, басамжлал дайралт, ичгүүр доромжлол, эцэст нь ял шийтгэлийг үүрсэн бөгөөд одоо ч үүрдэг.

Бусдын алдаа мунхрал, гэмийн өмнөөс өвдөж шаналах, ичиж зовох, гашуудах уйлах, харамсаж гэмших, тэр ч бүү хэл “ганц олдох” амиа хүртэл үрж үхэх нь, хүмүүний гэмт сэтгэлгээний, газар дэлхийн үхмэл амьдралын байр суурь, өнцөгөөс харах юм бол “солиорол, мунхаглал тэнэглэл” юм. Мэргэн хүн хаана байна? Хуулийн багш хаана байна? Энэ үеийн маргалдагч хаана байна? Бурхан энэ ертөнцийн мэргэн ухааныг мунхаг болгоогүй гэж үү? Учир нь Бурханы мэргэн ухааны тухайд, ертөнц өөрийн мэргэн ухаанаар Бурханыг таньж мэдсэнгүй. Иймд тунхагласан мэдээний мунхаглалаар итгэгчдийг аврах нь Бурханд тааламжтай байсан юм (1 Кор. 1:20,21).

Тэр ч бүү хэл Эзэн Есүс, аймшигт загалмайг үүрч байхдаа “Уг нь Би ямар ч гэмгүй, ариун, төгс юм. Ингэж шийтгүүлэх ёсгүй юм. Би чиний л төлөө ингэж зовж, тарчилж байна шүү дээ. Чи Намайг ойлгооч... хайрлаач... Дахин хэлье. Энэ бүгд чиний л төлөө юм шүү... “, гэж цээжээ дэлдээгүй. Өөрийгөө зөвтгөх, хамгаалах нэг ч үйлдэл, үг хэл гаргаагүй. Харин ч нэн эртээс “Энэ бол болох ёстой юм. Энэ нь Миний үүрэг, ертөнцөд ирсэн зорилго минь юм” гэж дотно ойрын хүмүүстээ өгүүлж байсан.

Ухамсартайгаар, ямарваа нэгэн албадлага, түлхээсгүйгээр энэ зорилгынхоо эцсийг хүртэл тууштай явсан. Яагаад гэвэл та нарыг Өөрийнхөө мөрөөр дагуулахын тулд та нарт үлгэр дуурайллыг үлдээн, Христ та нарын төлөө зовлон эдэлсэн. Тэр нүгэл үйлдээгүй, Түүний аманд ямар ч заль мэх олдоогүй. Тэр зүхэгдэж байхдаа, хариуд нь зүхээгүй. Тэр зовон тарчилж байхдаа заналхийлээгүй, харин шударгаар шүүдэг Нэгэнд Өөрийгөө даатгасаар байлаа (1 Пт. 2:21б-23).

Энэ бол амьдралд хандах цоо шинэ хандлага, үүрэг хариуцлагын талаархи цоо шинэ ойлголт. Энэ бол ертөнцийг Бүтээгчийн зүрхний гүнд далдлагдсан нууцлаг халуун хүсэл, биднээс шаарддаг чин зүрхнийх нь шаардлага юм. Энэ бол Эзэний хүсдэг жинхэнэ хайрын илрэл, хамгийн дээд амьдрал, үнэний зам юм. Энэ үнэнийг хүн төрөлхтөн өөрсдийн мэргэн ухаанаар танин мэдэж, ажил үйлс болгож чадаагүй юм. Тиймээс ч Эзэн Есүс ирэх шаардлагатай болсон ба ирээд Өөрийн биеэр энэхүү дээд замналыг үлгэрлэн харуулсан билээ. Бид төлөвшсөн хүмүүсийн дунд мэргэн ухааныг ярьдаг. Ингэхдээ энэ үеийн мэргэн ухааныг бус, өнгөрөн одож буй энэ үеийн удирдагчдын мэргэн ухааныг ч бус, харин нууц дотор буй Бурханы мэргэн ухааныг бид ярьдаг. Энэ нь бидний алдрын төлөө үеүдээс ч өмнө Бурханы урьдаас тогтоосон нуугдмал мэргэн ухаан мөн (1 Кор. 2:6,7).

Сударыг нээлттэй нүдээр анхааралтай харах юм бол, энэхүү нэн тэнгэрлэг, гайхамшигтай зарчимыг хуучин гэрээний үед ч олонтоо мэдүүлж, илчилж, сануулж, анхааруулж, шаардаж байсан боловч Эзэний төлөвлөгөөний биелэх цаг болоогүй байснаас, мөн угаас хүмүүн нь төрөлх болон олдмол гэм нүгэл бүхий бузар учраас, билгийн нүд нь харанхуй сохор, зүрх сэтгэл нь өчүүхэн сул доройн улмаас энэхүү нууцыг мэдэж, ойлгож, ухаарч, амьдралдаа мөрдлөг, зарчим, хэм хэмжээ болгон төгс хэрэгжүүлж чадахгүй байсаар иржээ. Би та нарт хэлье, хэрэв та нарын зөвт байдал чинь фарисайчууд болон хуулийн багш нараас илүү гарахгүй л бол, та нар тэнгэрийн хаанчлалд орохгүй (Мт. 5:20).

Саул хаан байх үедээ Гибеончуудыг Израилийн дундаас арчин хаяхыг эрмэлзэж, аймаглан устгах ажил өрнүүлж байсны уршигыг хожмын Израил үүрдэг ба энэхүү зэмлэлийг Израилийн дээрээс арилгахын тулд Саулийн хоёр хүү, мөн 5-н зээ хүү нийт долоон хүнийг дүүжилж алдаг билээ. Ингэснээр Эзэний уур хилэн намдаж, Израилийн дээрхи гамшиг зогсдог (2 Сам. 21:1-14).

Энэ нь, хэн нэгний ял зэм, алдаа зөрчилийг өөр бусад хэн нэгэн нь өөртөө үүрэх боломжтойг харуулсан, бусдын бузар муугын өмнөөс гэмшин харуусаж, гашуудан, өөрийгөө өргөх нь Эзэнд тааламжтайг илчилсэн, хожмын Загалмайн авралын урдчилсан зөн юм. Ерөөс хуучин гэрээний цөм болсон тахилын хуулийн цаана ч энэ л хамгийн дээд зарчим, үнэн зам нууцлагдсан (лацдагдсан) байсан. Хуулийг эсвэл эш үзүүлэгчдийг хэрэгсэхгүй болгохоор Намайг ирсэн гэж бүү бод. Хэрэгсэхгүй болгохын тулд бус, харин гүйцэлдүүлэхийн тулд Би ирсэн юм (Мт. 5:17).

Шинэ гэрээний үед хэрхэн “загалмай үүрэх” талаар олон янзын зүйрлэл жишээ ашиглан Эзэн бидэнд чигийг өгсөн байдаг. “Цамцыг чинь авахыг хүсэгчид дээлээ хүртэл тайлж өг. Баруун хацрыг чинь алгадагчид зүүн хацраа тавьж өг. 100-н бээр хамт явахыг хүчилбэл 200-н бээр хамт явж өг. Чамаас зээлэхийг хүссэн хүнд бүү татгалз... Дайснаа хүртэл хайрла, чамайг хавчигчдын төлөө залбир, чамайг хараагчдыг ерөө.” гэдэг. Эдгээр сургаалиудыг өнөөгийн сэтгэлгээний хэм хэмжээнд тааруулан ойлгомжтой тайлбарлавал, “бусдад ашиглуул, харин бусдыг бүү ашигла, өөрийн хохирлыг юманд бүү бод, харин бүрэн дүүрнээр, эргэлт буцалтгүй зориул, бусдыг л хохироохгүйн төлөө яв, өөрийнхөө тааламжийн төлөө бус харин бусдын сүнслэг амилалт, сэргэлт, баяр баясгалангийн төлөө яв”, гэсэн үг ажээ.

Түүнчлэн, Есүс загалмай дээр “—Аав аа, тэднийг уучлаач. Учир нь тэд юу хийж байгаагаа мэдэхгүй байна”, гэсэн нь бас л орчин үеийн хэлэнд хөрвүүлбэл, “хичнээн хүнд бэрх хор хохирол амссан ч өш хонзон, гоморхол, занал зүхлээр бүү хариул”, гэсэн үг ажээ.

Олон хүн загалмай үүрнэ, гэдэг нь зовно гэсэн үг. Гэхдээ энэ нь сайн мэдээний төлөөх, Чуулганы үйлчлэлийн төлөөх зовнил шаналал, тэмцэл зүтгэлтэй л хамаатай гэж боддог. Тийм ээ, үнэн. Гэхдээ энэ нь, тэрхүү агуу дээд үнэний зөвхөн нэг тал нь юм. Бурхан зөвхөн Чуулганд ч байдаг юм биш. Амьдрал гэдэг сэтгэшгүй гайхамшигтай, олон талт энэхүү үзэгдэл нь, тэр чигээрээ Бурханы Үг юм. Эхэнд Үг байсан, Үг Бурхантай хамт байсан ба Үг нь Бурхан байсан. Тэр эхэнд Бурхантай хамт байсан. Бүх юм Түүгээр бий болсон. Бий болсон юмсаас Түүнгүйгээр бий болсон юмс нэг ч байхгүй (Иох. 1:1-3).

Чуулганд үйлчилдэггүй ч бай, сайн мэдээний илгээлтэнд оролцоогүй ч бай, энэхүү төгс бус дэлхийгээс тан руу ирдэг бүхий л дайралт, халдлага, доромжлол, басамжлал, гүтгэлэг, шударга бус ял зэмийг хүлцэн тэвчиж, хариуд нь хайрлан уучилж, өршөөн нийгүүлсэх шийдвэрийг амьдралынхаа бүхий л талбарт (гэр бүл дотроо, ажлын хамт олон дундаа, нийгмийн бүхий л харилцаанд) хэрэгжүүлхээр шийдвэр гаргах нь, “загалмай үүрэх шийдвэр” юм.

Бүр тодруулбал, “загалмай үүрэх” гэдэг маань ямарваа гүтгэлэг, хардалт, буруутгал, шийтгэлийг хүртэх ямар ч явдал үйл үйлдээгүй, хэл яриа өдүүлээгүй, зан хандлага гаргаагүй, тэр ч бүү хэл бодол санаа ч бодоогүй байж дайралт зэмлэлд өртөөд, тэгээд тэдгээрийг даруугаар хүлцэн тэвчиж, ингэхдээ өөрийгөө зөвтгөх гэж, өөрийн буруугүй, ариуныг нотлох гэж оролдохгүй байх, харин ч бүр хайрлан уучлах, сэтгэлийн тэнхээ, хат бүхий халуун хайрын үйлс амьдралыг хэлж буй юм.

Учир нь хэрэв хүн шударга бусаар зовохдоо Бурханд ханддаг мөс чанараасаа болж тэвчвэл, энэ нь тааллыг олдог. Хэрэв та нар нүгэл үйлдээд ширүүн нударгад өртөхдөө тэвчлээ ч, үүнд ямар гавъяа байх билээ? Харин хэрэв та нар зөвийг үйлдээд зовохдоо, үүнийг хүлцэн тэвчвэл, энэ нь Бурханы тааллыг олдог. Учир нь та нар энэхүү зорилгын төлөө дуудагдсан билээ (1 Пт. 2:19-21а). (Гэтэл хүмүүн нь зөвийг үйлдээд гүтгүүлэн, доромжлуулан түүнийг тэвчих байтугай, гэм буруугийнхаа төлөө зэмлэл, цээрлэл хүртэхдээ ялархан тунирхаж, “хохирч, зовж байгаагаа гайхдаг” нь дэндүү бузар юм даа.)

Энэ бол, загалмайд итгэгчийн амьдарлаас Эцэгийн хүсдэг цорын ганц, үнэн зөв, заавал ажил хэрэг болгон хэвшүүлэх ёстой ялгуусан зөвт шийдвэр юм. Энэхүү ухамсартай шийдвэр нь хүмүүний амьдралыг эрс өөрчилж, бүхий л бузар муугаас нь ангижруулж, Бурхантай ойртуулдаг эргэлт ба цаашдын, мөнхийн сүнслэг хөгжил дэвшилийн замаар алхах гараа болдог. Онцлон хэлэхэд, энэ нь Христийг хайрлан, загалмайг гэрчлэн алдаршуулахын л төлөө, мөн бусдын авралын төлөө, өөрийгөө дорд болгосон нэн даруу хандлагатай байвал тун сайн. Та нар хүмүүст харуулхын тулд тэдний өмнө зөвт байдлаа үйлдэхээс сэрэмжлэгтүн. Эс тэгвээс тэнгэр дэх Эцэгээс тань та нарт шагнал олдохгүй (Мт. 6:1).

Эзэн алдар гавъяа, нэр төрийн төлөөх, ашиг хонжоо, эрх мэдлийн төлөөх атаа жөтөө, хор шар буцалсан энэ дэлхийг (Өөрийн Чуулганыг ч) хөмсөг зангидан харахдаа, эгэл даруугаар үүрэг хариуцлагадаа үнэнч байж, өөрийгөө л хичээж, бусдыг хайрлан уучилж, чин сэтгэлээсээ Эзэнийгээ хайрлан хүндэлж, эмээн бишрэгч, Түүний адил бусдын төлөөнөө өөрийгөө өргөгч (эгэл даруугаар загалмайгаа үүрэгч), энгийн нэгэн эцэг эсвэл хүү, нөхөр эсвэл эхнэр, тариачин эсвэл малчин, ажилчин эсвэл даамал, итгэгч эсвэл үйлчлэгч таныг харахдаа, давсаар амталсан хоол идсэн мэт сэтгэл ханан тайвширч, Өөрийн уур хилэнгээс эргэдэг ба энэ нь гэнэн мунхаг үй олны аврал болдогыг мэдтүгэй! Аяа, Бурханы мэргэн ухаан болон мэдлэгийн баялаг нь ямар гүн гүнзгий вэ! Түүний шүүлтүүд нь ямар ухаарагдашгүй, Түүний замууд нь ямар олж илрүүлшгүй вэ? Учир нь хэн Эзэний оюун ухааныг мэдсэн бэ? Хэн Түүний зөвлөгч болсон бэ? Эсвэл энэ нь өөртөө эргүүлж төлүүлэхийн тулд хэн Түүнд урьдчилж өгсөн бэ? (Ром 11:33-35).

Мөн Эзэн маань ялагчид л өвлүүлэх олон гайхамшигтай амлалтыг өгдөг. Энэ нь бусдаас онцгойрох гэсэн, олонд танигдах гэсэн, гайхамшигийг үйлдэн алдарших гэсэн өөрийн бузар зүрхний уруу татлагыг ялах ялалт юм. Харин олон хүн энэ нь бусдыг эсвэл сатаныг ялах ялалт мэт боддог, бас ярьдаг. Сатаныг загалмай дээр аль хэзээний ялсан юм. Иймд ах дүү нар аа, өөрсдийн биеэ Бурханд тааламжит амьд, ариун тахил болгон өргөхийг Бурханы өршөөлөөр та нараас хичээнгүйлэн гуйя. Энэ нь та нарын сүнслэг мөргөл мөн. Энэ үеийн явдалд бүү нийцэгтүн. Харин зүрх сэтгэлээ шинэчилснээр өөрчлөгдөж, Бурханы хүсэл юу болохыг, тухайлбал сайн, тааламжит, төгс төгөлдөр хүслийг батлагтун (Ром 12:1,2).

Хараахад нь ерөөж, хавчихад нь залбирч, зодоход нь улам зодуулж, булаахад нь нэмж өгнө, хаа хамаагүй хүний зовлон зүдгүүрийн төлөө шаналж, уйлж, байдгаа зориулан тусалж дэмжинэ, зээлэхийг хүсэхэд нь зүгээр л өгч, хүч хөдөлмөр, залуу халуун нас, үнэт цаг зав, зүрх сэтгэлээ хөндлөнгийн нэгэнд үрнэ. Гэхдээ энэ бүхнийг өөрийн алдарын төлөө бус Бурханы алдарын төлөө хийнэ. Энэ тийм амар гэж үү? Мэдээж үгүй... Үүнийг хэн бугай нь ч өөрийн хүч чадал, зүтгэл эрмэлзлэлээр хэрэгжүүлж, хэвшүүлж чадахгүй юм. Тиймээс ч туслагч Ариун Сүнс өгөгдсөн бөгөөд, Түүний л хүчээр чин сэтгэлийн шийдвэр гаргаж, Түүний л хүчээр тэрхүү шийдвэр дотроо зогсож чаддаг билээ. Хэрэв та нар Христийн нэрээс болж зүхэгдвэл ерөөлтэй. Учир нь алдарын ба Бурханы Сүнс та нарын дээр оршдог (1 Пт. 4:14).

Хүмүүний ертөнцөд тоо томшгүй оршин тогтнолын, амин зуулгын, эрэл хайгуулын, зүтгэл тэмүүллийн зам мөр (амьдрал үйлсийн хэв маяг) орооцолдон оршдог. Тэд хоорондоо сүжрэлдэж эсвэл дайсагналцаж, бие биенийгээ үгүйсгэж эсвэл нөхөж гүйцэлдүүлэн, зарим нь сэхэж өндийж, мандан бадарч, зарим нь мөхөж сөнөж, сургамж ухаарлыг үлдээж байдаг.

Бас зарим нь өмнөө тавьсан зорилго, мөрөөдөл, алсын хараагаараа ялгардаг байтал, зарим нь ижилсэн дотносож, бүр заримд нь ямарч зорилго тэмүүлэл, эрхэмлэх зүйлс, үнэ цэнэ огт байдаггүй. Тэр ч бүү хэл бүх зам мөр, амьдрах хэв маягыг, оршин тогтнолыг үзэн ядаж, тэдэнд мөхөл сүйрэл, аюул заналыг тулгадаг нь ч бий.

Харин загалмайн энэхүү зам нь зорилго хараа, утга агуулга, үнэ цэнэ, өгөөж нөлөөгөөрөө алинтай нь ч эгнэшгүй нэн тэнгэрлэг, мөнхийн мандал бадрал, хөгжил цэцэглэлт, суу алдарын замнал билээ. Нарийн хаалгаар ор. Учир нь сүйрэл уруу татан оруулдаг хаалга нь өргөн, зам нь уужим юм. Амь уруу хөтөлдөг хаалга нь жижиг, зам нь нарийн юм. Цөөхөн хүн түүнийг олдог (Мт. 7:13,14).

Ийнхүү шийдвэр гаргасан нэгний цаашдын амьдрал, хувь заяа уг шийдвэр дотроо баттай зогссоор байх уу, эсвэл эргэж буцан, шантарч няцах уу гэдэг л сонголт, тэмцэл болон хувирна. Та нэг л шийдвэр гаргасан. Нэг л замыг сонгосон. Шийдвэртээ, сонголтондоо үнэнч байж, нарийн замаар тууштай алхагтун. Энэ бол үхэх заяатай байсан бидний хувьд агуу нэр төр, алдар гавъяаны хэрэг бөгөөд ялгуусан үнэний зам юм. ...Есүс, --Анжсан дээр гар тавьсан атлаа арагшаа харагч хэн боловч Бурханы хаанчлалд үл тэнцэнэ, гэж айлджээ (Лк. 9:62).

Аливаа сүнсний нөлөөлөл, хүч, удирдамжийг өөртөө хүлээн авч, зөвшөөрхөөс өмнө юуг анхаарах ёстой вэ?

2010-03-31T20:35:00.000-07:00

Библи судлахуй-6: Д. жишээ: (1 Иохан 4:1-6) багцлалд ажиглалт хийх нь.

Энэ хэсэгт ямарваа (хэн нэгэн) сүнсний хувь хүний бие, сэтгэл, оюун санаанд нөлөө үзүүлхэд, хувь заяаг нь эрхшээхэд гол тус дэм болдог, урамшуулан зоригжуулдаг хүчин зүйл нь, тухайн хувь хүний өөрийнх нь итгэл болохыг илчилж байна. Бид өөрсдийн итгэлээ ертөнцийг бүтээгч хамгийн дээд Ариун Нэгэнд, Түүний загалмайн авралд өгсөн билээ. Тиймээс ч, тэнгэр газрын Хаан, Эзэн Есүсийн л Ариун Сүнс тухайн итгэгчийн бие махбодийг, оюун санааг эзэмдэх бүрэн эрхтэй юм.

Эзэний Ариун Сүнс бидний дотор өгөгдсөний илрэл болох хэд хэдэн шинжүүд байдаг нь,
1-рт: Тэр бидэнд Бурханы хайрыг (гэмийн уучлалын төлөөх загалмайн үхэлийг) мэдүүлж, найдварыг (дахин амилалтын) өгдөг. Найдвар нь урам хугалдаггүй. Учир нь бидэнд өгөгдсөн Ариун Сүнсээр дамжуулан Бурханы хайр бидний зүрхэнд цутгагдсан байдаг (Ром 5:5). Биднийг Бурханы хүүхдүүд гэдгийг Сүнс Өөрөө бидний сүнстэй хамт гэрчилдэг (Ром 8:16).

2-рт: Тэр биднийг чин сэтгэлийн ухаарал, гэмшилд удирддаг. Үсгээр бус Сүнсээр хийлгэсэн зүрх сэтгэлийн хөвч хөндөлт нь хөвч хөндөлт мөн (Ром 2:29б). Улмаар бидний бодол санаа, зан хандлагийг өөрчилдөг. Учир нь махан биеийн дагуу байгчид нь махан биеийн юмсийг боддог. Харин Сүнсний дагуу байгчид нь Сүнсний юмсийг боддог. Махан биеийн бодол санаа бол үхэл, Сүнсний бодол санаа бол амь ба амар тайван болой (Ром 8:5,6).

3-рт: Тэр бидний бодол санаа, зовлон шаналал, хүсэл мөрөөдлийг Бурханд өргөдөг. Үүнчлэн мөн Сүнс бидний сул дорой байдалд тусалдаг. Учир нь яаж залбирах ёстойгоо бид мэддэггүй. Харин Сүнс Өөрөө үгээр илэрхийлшгүйгээр ёолон байж бидний төлөө зуучлан гуйдаг. Сүнсний (итгэгч хүний) бодол санаа юу болохыг зүрхнүүдийг Нягтлагч нь мэддэг. Яагаад гэвэл Тэр Бурханы хүслийн дагуу ариун хүмүүсийн төлөө зуучлан гуйдаг юм (Ром 8:26,27).

4-рт: Тэр бас бидний зүрхэнд тэнгэрлэг тайвшрал, баяр баясгалан, амар амгалан, тэсвэр тэвчээрийг цутган өгдөг. Амар амгаланг Би та нарт үлдээнэ. Би Өөрийн амар амгалангаа та нарт өгнө. Ертөнцийн өгдөгөөс өөр юмыг Би та нарт өгч байна. Та нар зүрхээ бүү зовоо. Бүү ай (Иох. 14:27). Үргэлж баяртай бай. Бүх зүйлд талархалаа илэрхийл. Амар тайвны Бурхан Өөрөө та нарыг бүрэн ариусгаг (1Тес. 5:16,18,23а).

5-рт: Тэр бидэнд Сударын (Үгийн) нууцуудыг илчилж, тэдгээрээр амьдрах хүчийг өгдөг. Судар бүр Бурханы амьсгалснаар байгаа бөгөөд заахад, зэмлэхэд, залруулахад, зөвт байдал дотор чиглүүлэхэд тустай. Энэ нь Бурханы хүн аливаа сайн үйлд бүрэн бэлтгэгдсэн байхын тулд юм (2Тим. 3:16,17).

6-рт: Тэрээр мөн, Өөрийн Чуулганы дотор хайр, итгэлцэл, хүндлэл, эв нэгдэлийн харилцааг босгон байгуулж, хангадаг. Ах дүү нар аа, бид үргэлж та нарын төлөө Бурханд талархал өргөх ёстой. Яагаад гэвэл та нарын итгэл үлэмж нэмэгдэж, хүн бүрийн чинь бие биеэ хайрлах хайр улам бүр өсөж байгаа учир ингэх нь зөв юм. Та нарын тэсвэрлэдэг бүхий л хавчлага, зовлонгийн дундах тэвчээр болон итгэлийн чинь төлөө, бид өөрсдөө Бурханы Чуулгануудын дунд та нараар бахархан ярьдаг (2Тес. 1:3,4).

7-рт: Эцэст нь, Тэр биднээр дамжуулан ажиллаж, Сайн мэдээг (загалмайг) харь үндэстнүүдэд (үл итгэгчдэд) тунхаглан, тэднийг ерөөж, авралд (Христ рүү) авчирдаг. Харин Ариун Сүнс та нар дээр ирэхэд, та нар хүчийг олж, тэгээд Иерусалим, бүх Иудей, Самари тэр байтугай энэ дэлхийн хязгаар хүртэл Намайг гэрчлэх болно (Үйлс 1:8). ...Тэрээр надаар дамжуулан харь үндэстнүүдийг дуулгавартай байдалд үгээр болон үйлсээр минь, тэмдгүүд болон гайхамшгийн хүч дотор, Ариун Сүнсний хүч дотор авчирсан юм (Ром 15:18б,19а).

Хэдийгээр сүнсний өөр бусад илэрлүүд (эш үзүүллэг, эдгээх бэлэг, харь хэлээр ярих чадвар, сүнслэг мэдлэг, өөр бусад олон янзын авъяас чадварууд нь) бидэнд өгөгддөг боловч, дээрхи үндсэн хэв шинжүүдийн туслах орц төдий юм. Харин эдгээр туслах шинжүүдийг гол зорилго, бахархалаа болгон үндсэн хэв шинжүүдийг орхигдуулбал, загалмайг (хайрыг) дээдэлж, эгэл даруу бурханлаг амьдарлыг эрхэмлэлгүй, бардамнал, байр суурь, эрх мэдэл, нэр алдарт шунан дурлаж, өрсөлдөн тэмцэж, шашинлаг байдлыг эрхэмлэвэл энэ нь муу сүнсний нөлөөнөөс юм. Тэр өдөр Надад олон хүн “Эзэн минь, Эзэн минь, бид Таны нэрээр эш үзүүлж, Таны нэрээр чөтгөрүүдийг хөөж, Таны нэрээр олон гайхамшгуудыг үзүүлж байсан биш билүү?” гэж хэлэх болно. Тэгэхэд Би тэдэнд “Би та нарыг огт танихгүй юм байна. Ёс бусыг үйлдэгч та нар Надаас зайл” гэж хэлнэ (Мт. 7:22,23).

Энэхүү үнэнийг элч Иохан тухайн цаг үеийнхээ гаж (гностик, керинтүс) урсгалын “Есүс бол хүнтэй адил махан биетэй биш байсан, тиймээс ч төгс амьдарч чадсан. Харин хүн бол гэмт махан бие учир ингэж чадахгүй”, зарим нь “Есүс бол зөвхөн золиос төдий байсан, одоо бол жинхэнэ бурхантай харьцах ёстой” гэх зэрэг буруу сургаалиудын эсрэг (1Иох. 4:2) сөргүүлэн тунхагласан. Тиймээс хэн ч Бурханы Сүнсээр “Есүс хараагдсан” гэж ярихгүй бөгөөд, Ариун Сүнсээр бус бол өөр хэн ч “Есүс бол Эзэн” гэж хэлж чадахгүй гэдгийг би та нарт мэдэгдье (1Кор. 12:3).

Тиймээс ч бид аливаа онгод, хүч, авъяас, догдлол, мэдрэмжүүдийг өгдөг, өдөөдөг сүнслэг нөлөөллүүдийг таашаан хүлээн авч, итгэл сэтгэлээ өгч, тэдгээрээр удирдуулахаасаа өмнө нухацтайгаар, сайтар шалгаж байх ёстойг заасан байна. Тэгээд “Бид бол Бурханых.” (1Иох. 4:6) гэж элч нарыг хэлээд, элч нарыг (биднийг) сонсдог хүн бол жинхэнэ Ариун Сүнснийх, харин сонсдоггүй нэгэн нь хуурамч сүнснийх (антихристийнх) гэж тодорхойлсон. Өнөө цагт Шинэ гэрээний 27-н ном нь элч нарын гэрчлэл, тэднээр дамжуулан илчлэгдсэн хүн төрөлхтөний авралын төлөөх Ариун Сүнсний илчлэлт, үнэн сургааль, жинхэнэ номлолууд юм.

Зөвхөн Иохан ч бус элч Паул ч, “сүнслэг бэлгүүдийг хүсэмжлэх нь буруу биш боловч, Эзэн Есүсийг алдаршуулах, гэрчлэх зорилгоор, бусдын авралын төлөө, Чуулганыг босгон байгуулахын тулд, нэн даруугаар Ариун Сүнсний эрх мэдэл дор, эмх цэгцтэй ашиглах нь зохистой”-г (1Кор. 12, 14-р бүлэг) заасан байдаг. Нөгөөтээгүүр, энэ бүхнээс илүүтэй хайр дотор төлөвших нь л хамгийн чухал болохыг бас онцолдог. Хэрэв би хүмүүсийн болон тэнгэр элч нарын хэлээр ярьсан ч надад хайр байхгүй бол би нүргэлэх харанга, хангинах цан болох байсан. Хэрэв би эш үзүүлэх чадвартай, мөн бүх нууцуудыг болон бүх мэдлэгийг мэддэг байгаад, уулыг нүүлгэх бүрэн итгэлтэй байлаа ч, надад хайр байхгүй бол би юу ч биш. Хэрэв би өөрийн бүх л өмч хөрөнгөө тараан өгч, өөрийн биеийг шатаахаар тушаасан ч, надад хайр байхгүй бол энэ нь надад ямар ч ашиггүй юм (1Кор. 13:1-3).

Библи судлахуй-5. Г. жишээ: (1 Иох. 2:28-3:24) хүртэлх багцлалд ажиглалт хийх нь.

2010-02-23T21:05:00.000-08:00

1.Бурханаас төрсөн хүний шинж чанар, онцлог юу вэ? Тэд хэрхэн танигдах вэ? а) Тэрээр зөвийг үйлддэг гэж (2:29, 3:7б)- д өгүүлээд, энэ нь
б) Есүстэй адил болно гэсэн итгэл найдвар тээж амьдрах нь юм, гэж (3:2)-т,
в) Тиймээс ч өөрийгөө бүхий л сул дорой, бузар зан чанар, муу зуршил, мухар сүсгээс цэвэршүүлдэг (өөрчлөгддөг), гэж (3:3)-т,
г) нүгэл үйлддэггүй (3:6а,9а), тэр ч байтугай нүгэл үйлдэж чаддаггүй, гэж (3:9в)-д,
д) бие биенээ хайрлах ёстойгоо мэддэг (3:11) ба хайрладаг (3:14а), гэхдээ энэ нь хоосон яриа биш бодит үйлсээр, нэгнийхээ төлөө зориулалт, золиослол гаргаад хуваалцсан, тусалж дэмжсэн, өмгөөлж хамгаалан амиа хүртэл зориулах байдлаар илэрдэг, гэж (3:16-аас 18)-д,
е) тэгснээрээ Бурханаас төрсөн гэдгээ (2:29), мөнх амьтай болсоноо (3:14а) баттай мэдэж,
ё) улмаар Эзэний өмнө зүрхээ бататган (3:19), өөрсдийгөө яллахгүй юм, гэж (3:20а, 21)-д,
ж) тэгээд ч зогсохгүй одоо цагт ч (3:21), ирээдүйд сүр хүч, хаанчлал дотороо Түүнийг ирэх үед ч, Түүний өмнө зоригтой, ичгүүргүй байх юм, гэж (2:28)-д,
з) бас гуйлт залбирал маань ч хүлээн авагдаж, Түүний хүч, эрх мэдэл, хайр дотор биелэх юм, гэж (3:22а)-д,
л) эдгээр нь Бурханы тушаалуудыг сахин хэрэгжүүлсэн, Түүний мэлмийд таашаагддаг амьдрал, үйлс юм, гэж (3:22)-т,
м) эдгээрийг базаад хэлэхэд, Бурханы Хүү, Аврагч Эзэн Есүс Христэд гуйвшгүйгээр итгэх ба Христийн бидэнд тушаасан (Би та нарыг яаж хайрласан шиг та нар бие биеэ хайрлагтун. Энэ бол Миний тушаал. Нөхдийнхөө төлөө амиа зориулхаас өөр агуу хайр байхгүй (Иох. 15:12,13).) нэг нэгнээ хайрлах тушаалуудыг сахиж буй хэрэг юм, гэж (3:23)-т,
н) эцэст нь энэ бүгдийг хэрэгжүүлж байгаа нь, тэгснээрээ Түүнтэй улам адил болж, уусан нэгдэж (төлөвшиж, өөрчлөгдөж) байгаагаа ухамсарлаж байгаа зэрэг нь, бидэнд Түүний өгсөн тосолгоо болох Ариун Сүнсний ажил юм, гэж (3:24)-т өгүүлжээ.

2. Харин диаволын (чөтгөрийн) хүүхдийн онцлог шинж, ялгаа нь юу вэ? Тэднийг хэрхэн таних вэ? а) Тэр нүгэл үйлддэг ба энэ нь ёс (хууль) бус хэрэг юм, гэж (3:4)-т,
б) энэ нь (Христэд) итгэгчдийг мэхлэх оролдлогоор нь (3:7а), (Тэр үед гностик болон бусад гаж урсгалынхан “нэгэнт бид уучлагдсан, эрх чөлөөтэй болсон тул махан биеийн хүслийг даган элдэв гэм бузарыг хийхэд ялгүй, угаас махан бие сул дорой тул гэм үйлдхээс өөр аргагүй” гэхчилэн заадаг байсан. Одоо ч “Хүү (Христ ба Түүний загалмайн аврал) чухал биш. Түүнээс агуу Бурхан (Эцэг Ёхова нь) байгаа. Хүүгүйгээр (загалмайн авралгүйгээр) Эцэгийн тааллыг олж болно” Ёховагийн гэрчүүд, “Библиэс өөр Мормоны ном, Үнэт сувд зэрэг авралын судар байгаа, Загалмайн аврал бол үнэндээ гэмийн төгс уучлал биш” Хожмын үеийн гэгээнтнүүд (Мормонизм), “Жинхэнэ аврагч Мүн болон түүний эхнэр Хан нарын цэвэр ариун цустай хүмүүсийн махан биеийн үр сад л хүн төрөлхтөнийг гэмээс нь аврагчид болно” Мүүннизм... гэх мэт мэхлэлтүүд байсаар байна.
в) бас ах дүүгээ хайрладаггүй (3:10в), бусдад туслах сэтгэлгүй байдлаар, гэж (3:17)-д,
г) тэр ч бүү хэл ахан дүүсээ үзэн ядах, хонзогнох байдлаар, гэж (3:15)-д,
д) Бурханы тааллыг олсон (өргөл нь хүлээн авагдсан), зөвт ариун үйлстэй (дээрхи 1-р хэсэгт дурдсан үйлсүүд) нэгэнд атаархан хорсох байдлаараа (3:12) илэрдэг ба Бурханы хүүхдээс ялгардаг (3:10а), гэжээ.
е) Мөн тэд үхэл дотор (3:14б), буюу мөнх амьгүй (тосолгоогүй буюу, нэг үгээр Ариун Сүнсгүй) байдаг (3:15), гэжээ.

3. Ишлэлийн судалгаа: (1 Иох. 2:28)-д “Бяцхан хүүхдүүд ээ” гэсэн нь, энэ ишлэлээс харахад гэнэн итгэмтгий, ялангуяа хуурамч сургаальд автаж төөрөлдөгсдийг хэлсэн нь тодорхой байна. Элч Иохан тэднийг яллан зэмлэхийг урьтал болголгүй, харин “сул дорой, Христийг танин мэдсэн хувийн туршлагагүй, хүний амаар алхагсад, тиймээс мэхлэгдэгчид” гэж үзэж, энэ л өнцөгөөс тэднийг харж, хайрлаж энэхүү захидлаа илгээж байгаагаа дахин дахин онцолсон байна. Хайр дотор маш өндөр төлөвшсөн хүний (Ариун Сүнсний) зүрх сэтгэл эндээс харагддаг. “Одоо энэ захидлыг уншаад, гэмшин эргэж Христ рүү ирэгтүн” гэсэн хайрын дуудлага байна.

Бас хүний өмнө “зоригтой, мундаг, сүнслэг нэгэн” болох гэх нь ямарч хэрэггүй, авралд хүргэхгүй, харин Түүний л өмнө зоригтойгоор очихыг эрмэлзэх нь итгэгч хүний гол зорилго юм, гэсэн далд санаа ч байна. Энэхүү “зориг” нь, дайсныхаа эсрэг эрс шийдэмгий, хатуу ширүүн байх эр зоригын тухай биш, харин эцсийн цагт Эзэний өмнө өчнөөн гэм нүгэлтэй очиж, бүх гэмт үйлс нь гэрэлд ил гарч “ичгүүрт орон яллагдах вий...” гэсэн айдасгүй, нүүр бардам очих “зориг”-ын тухай өгүүлжээ.

(1 Иох. 2:29)-д энэхүү захидлын гол мессэж дахиад л хэлэгдэж байна... Буруу номлолуудын далд санаа нь, “энэ ертөнцийн бүхий л бузар мууд Бурхан Өөрөө буруутай...” (Эх. 3:4, 12), гэсэн нь юм. Харин Иохан, “Бурхан бол зөвт, ариун бөгөөд ямарч харанхуй Түүний дотор байхгүйг танин мэдэх нь жинхэнэ итгэлийн (Бурханаас төрсөн) хүний шинж” гээд, тэгж чадсан хүн нь жинхэнэ болон хуурамч багш нар, тэдний үйлс, номлолыг танин мэдэж ялган салгана, гэсэн.

(1 Иох. 3:1)-д Өчүүхэн гэмт бүтээлийг, Хүүгийнхээ цусаар Өөрийн хүүхэд болгон өргөмжлөн авсан Бүтээгч Эзэний агуу хайрыг, хүний логик (дэлхийн хэвшмэл) сэтгэлгээгээр тайлбарлана, ойлгоно гэдэг нь бүтэшгүй юм. Зөвхөн Ариун Сүнсний онгод, илчлэлтээр л зүрхэндээ мэдрэх боломжтой. Бид (Чуулган) сонгогдсон. Гэмт хүний ертөнц, Христийг ойлгож, танин мэдэж хүлээн авч чадаагүйтэй адил, биднийг ч бас ойлгодоггүй, гэжээ.

(1 Иох. 3:2)-т “Хайртууд минь” гэж дотночлоод, одоогийн зовлон зүдгүүр, асуудал бэрхшээл, сорилтоор дүүрэн энэ дүр төрх, амьдрал маань түр зуурынх юм. Харин үхлийг ялж Цог жавхлан, Гэрэл хайраар гялбан, Агуу сэнтийндээ заларсан Есүс Христийг харж, бас Түүнтэй адил болох цаг удахгүй, гэж зоригжуулж байна.
Тэд Түүний царайг харна. Мөн Түүний нэр тэдний духан дээр байх болно. Тэнд цаашид шөнө болохгүй. Эзэн Бурхан тэднийг гийгүүлэх учраас тэдэнд дэнлүүний гэрэл ч, нарны гэрэл ч хэрэггүй болно. Учир нь Эзэн Бурхан тэднийг гийгүүлнэ. Тэгээд тэд үеийн үед хаанчлах болно (Илч. 22:4, 5).

(1 Иох. 3:3)-т Ийм аврал, өргөмжлөлд найддаг нэгэн нь сул дорой, гэмтэй зохисгүй бүхий л зан хандлага, зуршил хүлээс, эсвэл төөрөгдөлөө ялгаж салган, эсэргүүцэн тэмцэж, чөлөөлөгдөх ёстойг дахин сануулж байна. Учир нь Христэд тэдгээр нь огт байхгүй юм.

(1 Иох. 3:4-6)-д Нүгэл үйлдэнэ гэдэг нь (махан биеийн сул доройн улмаас нүгэл үйлдэх нь жирийн зүйл, гэж зааж итгэгчдийг гэмт байдлынхаа эсрэг тэмцдэггүй, тэнгэрлэг ариун, зөвт амьдарлын хэв маягыг хэвшүүлэх гэж хичээдэггүй болгож байсан, буруу номлолын эсрэг) хууль бус (“ёс” гэдэг нь хууль, дэг жаяг) хэрэг. Бурханы хуулийг зөрчих нь заавал шийтгэл, уур хилэнг дагуулдаг. Христ ямарч хуулийг зөрчөөгүй. Тиймээс ч Түүнтэй нөхөрлөл дотор хамт байдаг нэгэн нь хууль зөрчиж чаддаггүй. Хууль зөрчдөг сул дорой, гэмт байдлыг маань биднээс зайлуулхын тулд л Тэр ирсэн. Тэрнээс биш хууль бус бузар байдалд маань “жаргаах” гээгүй. Бузар гэмт байдалдаа ичиж эмээх сэтгэлгүй, өөрийгөө сул тавьсан нэгэн бол Христийнх биш, гэсэн.

(1 Иох. 3:7)-д Өмнөхтөй холбогдуулан дахиад л “антихристийн” мэхлэгч сургаалийг танин мэдэж, дагахгүй байхыг анхааруулж байна. 1Иохан номон дахь “зөвт” хүний шинж нь гэмт, сул дорой зан чанараа хаацайлж зөвтгөхийг (тэр тусмаа загалмайгаар) оролддоггүй. Харин ч ичиж гэмшин, эсэргүүцэн тэмцдэг. Эзэний өмнө үнэн төрхөөрөө очиж уучлал гуйн, загалмайн цусаар угаалгадаг. Энэ ариун цус л бузрыг минь цэвэрлэж, намайг өөрчилж чадна, гэж итгэдэг. Энэхүү итгэл, тэмцэлийн амьдралдаа Есүстэй болон итгэлийн ахан дүүстэйгээ хайраар нөхөрлөж, тэднээс тус дэм, урам зоригыг авдаг ба бас тэдэнтэйгээ хуваалцдаг нэгэн юм. Тэр хэмжээгээрээ ялан дийлдэг (өөрийн бузар байдлаа) хүн юм.

(Гаж сургаалиудын бас нэг үндсэн санаа нь “Христийн загалмайн цус бидний гэм нүгэл, бузар хүсэлийг хаацайлж, далдалдаг”, гэсэн нь юм. Харин Иохан “хорон муу гэмт үйлсийн үндэс болсон нүгэлт хүсэл мөрөөдөл, зуршил, дадал, зан чанар, итгэл үнэмшил, хэвшмэл сэтгэлгээ зэргийг биднээс угааж цэвэрлэдэг”, (1 Иох. 1:7) гэж захиандаа онцолсон. Тиймээс ч бид үйлдчихсэн гэмийнхээ төлөө л уучлалыг авах гэж загалмайн өмнө очихоосоо илүүтэй, гэм рүү түлхдэг нүгэлт бодол санаа, хүсэл зуршилаасаа салах гэж очдог байх нь хамгийн зөвт, Эцэгийн хүслийн дагуух үйлс юм).

(1 Иох. 3:8)-д “Диавол” гэдэг нь салгагч, эвдэгч, зааглагч гэсэн утга бүхий грек үг ба сатаны үйлс, зорилго санааг нь тодотгосон нэршил юм. Энэ нэршилийг ашигласан нь ч тохиолдол бус юм. Тэр анхнаасаа л Бурханы хайр, мэргэн ухааны биелэл, төгс бүтээл нь болсон хүнд атаархан хорсож, эрх мэдэлд нь шунаж, Бурхан хүн 2-ын харилцааг (Эх. 3:4, 8), хүмүүс хоорондын харилцааг (Эх. 3:12, 4:7,8), хүн болон бусад бүтээлүүдийн хоорондын харилцааг (Эх. 4:17, 11:4) эвдэж, бузарлаж ирсэн.

Бас Искариотын Иудасыг ашиглан Бурханы Хүүг газар дэлхийгээс зайлуулхыг санаархсан (Иох. 13:2). Гэвч Эзэн үхлийг ч ялан боссон тул, одоо Христ болон итгэгч, мөн итгэгчид хоорондын харилцааг (нөхөрлөлийг ) эвдэхээр ажилладаг, гэдгийг мэдүүлж илчилхээр энэ захиа бичигдсэн. Тэгээд элдэв нүгэл үйлдэгч нь (ялангуяа Чуулган дотор хагарлыг өдөөгч нь (1Иох. 2:11)) түүний гар хөл (диаволын хүүхэд) юм, гээд Есүс энэхүү эвдэн бусниулах хорон үйлсийг зогсоох зорилготой гэжээ.

(1 Иох. 3:9)-д Энд өмнөх бүлгүүдэд дурдагдсан “Хэрэв бид нүгэлгүй гэж хэлбэл өөрсдийгөө мэхэлж байгаа бөгөөд бидний дотор үнэн алга (1 Иох. 1:8), Хэрэв бид нүгэл үйлдээгүй гэж хэлбэл, бид Түүнийг худалч болгож байгаа хэрэг бөгөөд бидний дотор Түүний үг алга (1 Иох. 1:10)”, зэрэг ишлэлүүдтэй зөрчилдөөд байгаа мэт харагддаг. Ер нь Библи аливаа зүйлсийн хоёр туйлыг товойлгон, бас хооронд нь сөргүүлэн тавьдаг. Энэ ишлэлийн өмнөх болон хойдох багцлалыг анхааралтай уншин, бас Библийн ерөнхий мессэжтэй уялдуулан (үүнийг “хам сэдэв дотор нь тайлал хийх”, гэдэг. Библийн аль нэг ишлэлийг огтхон ч дангаар нь тайлбарлаж болохгүй. Ганц, нэг ишлэлийг таслан, дангаар нь тайлбарлах гэж оролдох нь гаж урсгалын нийтлэг шинж) тайлбарлах нь зүйтэй.

Өмнөх 6-р ишлэлд “Түүний дотор байгч нь нүгэл үйлддэггүй”, гэсэн бол 7-р ишлэл дээр “зөвийг үйлдэгч нь, зөвт байна”, гэсэн ба хойдох 10, 11-р ишлэлд “...бусдыгаа хайрлагч нь Бурханаас төрөгч...”, гэсэн зэргийг, захидлын ерөнхий мессэжтэй хамтатган, уг зөрчилтөй мэт бичлэгийг бясалган, харьцуулан харах нь зүйтэй.

Хэдийгээр бид одоогоор дахин амилсан Христ адил төгс биетэй болоогүй ч, загалмайн авралд итгэсэн итгэлээрээ, Ариун Сүнсээр нь тослогдон дахин төрж, Эзэний оршихуйд (тэнгэрт) гэмгүй, цэвэр ариунд тооцогдон, Бурханы хүүхдүүд хэмээн хүлээн зөвшөөрөгдсөн юм. Энэ нь нүгэлийг хүсэмжлэн, зорилготойгоор, төлөвлөн, гэмийг үйлдэн амьдарч чадахаа байсан гэсэн үг. Эндээс, Есүстэй болон итгэлийн ахан дүүстэйгээ хайраар нөхөрлөдөг, даруугаар алдаа зөрчил, сул доройгоо Эзэний өмнө хүлээн зөвшөөрч гэмшдэг, тэдгээрийгээ үзэн ядаж эсэргүүцэн тэмцдэг, үр дүнд нь өдрөөс өдөрт өөрчлөгдөн шинэчлэгддэг нэгэний дүр харагддаг. Тэр нь “Бурханаас төрөгч” юм.

(1 Иох. 3:10)-т Одоо энд хоёр дүрийг жишэн, өмнөх багцлалуудыг дүгнэж байна. Тэгээд диаволын хүүхдийн шинжийг дахиад л өгүүлсэн. Энэ нь хойших 18-р ишлэл хүртэлх багцлалын угтвар, холбоос болж байна.

(1 Иох. 3:11)-т Би та нарыг яаж хайрласан шиг, та нар бие биенээ хайрлагтун. Энэ бол Миний тушаал (Иох. 15:12), гэснийг сануулж байна. Бие биенээ хайрлах уу, үгүй юу, гэсэн эргэлзээ, эрэгцүүлэл байх нь өөрөө гэмт хандлага юм. Ямарч сонголтын талаар яриа байхгүй. Энэ нь заавал хэрэгжүүлэх “ёстой” тушаал юм.

(1 Иох. 3:12)-т Хүмүүний түүхэн дэх хамгийн анхны аллагыг жишээ болгон өгүүлж байна. Олон тайлагчид (эш үзүүлэгчид) (Эх. 3:17-19)-р хэсгийг үндэслэн, “Каин хараагдсан ажил хөдөлмөрийн (газар тариалан) ургац өргөсөн тул хүлээн авагдаагүй” гэцгээдэг. Энэ нь Судараар батлагддаггүй. Харин ч гэмийн болон эвлэрүүллийн тахил болгон өргөдөг согоггүй эр малтай адил ургацын дээж, сайн чанарын үр тариа, гурил зэргийг өргөх ёстойг Левит, Дэд хууль номуудад заасан байдаг. Бас аравны нэгээ итгэмжтэй өргөхийг тушаагаад, хариуд нь газар тариалангын ургацыг нь ерөөх амлалт ч, Малахи номонд байдаг.

Өргөл нь хүлээн авагдаагүйн шалтгаан нь Каин өөрөө байсан гэдгийг, “Каиныг болон...” гэж онцгойлон дурдсанаас харж болно. Хорон муу зүрх сэтгэлтэй, түүнийхээ дагуу нүгэлийг хүсэмжлэн, гэмийг үйлдэн амьдрагч нь, хэдийгээр Эзэний нэрийг дуудан өргөл, тахил, гуйлт залбирал (гэмшил ухааралгүйгээр, бардамнан) өргөвч хүлээн авагдахгүйг Библийн олон түүхүүд (Сам. 13:8-14)(2 Шас. 26:16-21) нотолдог. Каин нь бардам, дээрэнгүй, өсөрхөж хонзогногч, хатуу зүрх сэтгэлтэй нэгэн байсныг, төрсөн дүүгээ Бурханы анхааруулгыг ч үл тоон харгисаар алж, бүр аллагынхаа дараа гаслан гэмших ч үгүй, Эзэний өөдөөс бардамнан тэрсэлсэн түүхээс бид мэднэ (Эх. 4:5-9). Харин Бурханд өөрөө болон өргөл нь хүлээн авагдсан Абел, ямархуу зан чанар, үг хэл, үйлс амьдралтай нэгэн байсан бол?...

(1 Иох. 3:13)-т Бид (Чуулган) хүний тааллыг бус Бурханы тааллыг хайдаг тул энэ ертөнцөд үзэн ядагддаг. Бас нөгөөтээгүүр бидний Эзэн Есүс ч үзэн ядагдсан ба Түүнийг Бурханаа болгосон бид ч тийм замыг туулах болдог. Хүмүүсийг хайрласаар, бүхнээ зориулсаар, аврал үнэний зам руу уриалсаар байхад үзэн ядалтаар хариу барьдаг нь гайхмаар юм шүү. Би Таны үгийг тэдэнд өгсөн. Би ертөнцийнх биш адил тэд бас ертөнцийнх биш тул ертөнц тэднийг үзэн ядсан юм (Иох. 17:14). ...Ертөнцөд та нар зовлонтой байна. Гэвч зоригтой байгтун. Би ертөнцийг ялсан... (Иох. 16:33б).

(1 Иох. 3:14,15)-д Амьд нэгний үхсэн нэгнээс ялгагдах онцлог нь, ахан дүүсээ хайрлах хайраар харагддаг. Дотроос тань хайр ундраад л байвал таны дотор мөнх амь буюу Ариун Сүнс байна, гэдгийг мэд. Харин үзэн ядалт, хорсол занал таныг зовоогоод байвал, та гэмшин Эзэнээс амийг гуй, гэсэн том сануулга байна. Чуулган дотор заримдаа, хичнээн хөөрхөн ах, эгч, дүүс өөрийн зөвийг батлах, бусдаасаа илүүгээ илэрхийлэх гэхдээ тун хурдан хувирч, яавч Христийн бус харгис догшин, бардам дээрэнгүй, яллан буруутгагч дүрд хувирдгыг бид мэднэ. Түүгээр ч барахгүй өширхөл хонзогнол, гоморхол бухимдалаа он удаан хадгалж, өвчилсөн байх нь ч бий.

(1 Иох. 3:16-18)-д Загалмайн гайхамшигт авралыг сануулаад, үүнээс үлгэр авч бусдын сайн сайхан, авралын төлөө өөрийн эрх ашиг, таашаал, тансаглал, эд хөрөнгө, үнэт цаг зав зэргийг зориулхыг уриалж байна. Тухайн түүхэн цаг үед (одоо ч зарим улс оронд) Христэд итгэснийхээ улмаас амь нас, эрүүл мэндээрээ хохирох нь нэн элбэг байсан. Бид энэ дэлхийн өгч чадахгүй баялгыг (мөнх амийг) Христийн гавъяагаар үнэгүй авсан.

Харин энэ дэлхийн үнэт зүйлс, эд баялаг нь, бидний ахан дүүсийн авралын итгэл, хайр дотор босгогдохоос илүү чухал, эрхэм зүйлс огтхон ч биш. Тиймээс ч ахан дүүстэйгээ Христийн хайрыг хуваалцах зорилгоор, өгөөмөр байхыг Библи шаарддаг. Шаардлагатай үед амь насаа ч зориулах эр зориг, хайр дотор төлөвших хэрэгтэй. Ах дүүс минь, хэрэв хүн “Надад итгэл бий” гэсэн атлаа үйлсгүй бол ямар ашигтай юм бэ? Тийм итгэл түүнийг аварч чадна гэж үү? Хэрэв ах дүү чинь, эсвэл эгч дүү чинь өмсөх хувцасгүй, өдөр тутмын хоолоор дутагдаж байхад нь, та нарын нэг чинь тэдэнд “Амар тайван яв. Дулаацах болтугай, цадах болтугай” гэж хэлчихээд биед нь зайлшгүй хэрэгцээтэй байгаа зүйлсийг нь тэдэнд өгөхгүй бол ямар ашигтай юм бэ? Иймээс ч итгэл нь хэрэв үйлсгүй бол өөрөө үхмэл юм (Иак. 2:14-17).

(1 Иох. 3:19-24)-т Бүтээгч агуу Эцэг маань, нар сар, од мичид, зах хязгааргүй сансарын уудам, бас манай өчүүхэн цэнхэр дэлхий, түүн дээрхи бүхий л амьдралын олон төрөл зүйл хэв маяг, амьсгалж буй агаар, ууж буй ус, идэж буй хоол, тэр дундаа хүмүүний эрхэм нандин, эрдэнэт бие цогцос зэрэг материаллаг зүйлсийг бүтээснээс гадна, нүдэнд үл үзэгдэх, чихэнд үл сонсогдох, гарт үл тэмтрэгдэх, аманд үл амтлагдах, хамарт үл үнэрлэгдэх сүнслэг оршихуйг ч бүтээсэн. Тэр нь маш баялаг, олон талт, гоо үзэсгэлэнтэй, агуу ертөнц юм.

Сүнсний оршихуйн тулгуур 3-н ухагдхуун байдгаас хайр, амар тайван, баяр баясгалан, мэргэн ухаан, яруу аялгуу, уран сэтгэмж, өгөөмөр зан, энэрэл, тэвчээр, эр зориг, итгэмжтэй байдал, өршөөл уучлал, дөлгөөн зан... гэх мэт олон үнэт мөн чанаруудыг хүн төрөлхтөн “зүрх сэтгэл” гэдэг нэгэн цогц ухагдхуунд хамруулан (танин мэдэхийг эрмэлздэг гэвэл илүү зохино) ойлгодог. Библид үүнийг “ариунаас ариун газар” (Ег. 26:34) гэж тодорхойлсон байдаг. Энэ нь, хүн бол Бурханы дүр төрх гэдгийг хамгийн тод томруун илэрхийлдэг талбар юм. (Нөгөө хоёр нь “бүтээлч оюун сэтгэлгээ” (Сур.үгс 8:14), “эрх мэдэл, байр суурь” (Эх. 1:27,28; 5:1,2)(Иса. 43:11-13), гэсэн нь юм.)

Энэхүү “ариунаас ариун газар” нь бузартсанаас энэ ертөнцийн бүхий л бузар булай, хорон муу нь бий болдог гэж Эзэн Есүс айлдсан байдаг. Харин амнаас гарах зүйл зүрхнээс гарч, тэдгээр нь хүнийг бузарладаг. Зүрхнээс хорон муу бодол, аллага, завхайрал, садар самуун, хулгай, худал гэрчлэл, гүтгэлэг зэрэг нь гардаг. Эдгээр нь хүнийг бузарладаг... (Мт. 15:18-20а). Гэсэн хэдий ч Загалмайн цусны гавъяагаар “Ариунаас ариун газар дахь гэрчлэлийн авдран дээр өршөөлийн суудал заларсан” (Ег.гар. 26:34) билээ. Өршөөлийн суудлыг чи авдран дээр тавьж, Миний чамд өгөх гэрчлэлийг авдран дотор хий. Тэнд Би чамтай уулзана. Гэрчлэлийн авдран дээр буй хоёр херубуудын хоорондоос, өршөөлийн суудлын дээрээс Би Израилийн хөвгүүдийн төлөө чамд тушаах бүх зүйлийг Би чамд айлдана (Ег.гар. 25:21,22).

Бидний зүрхэнд Ариун Сүнсээрээ нутаглаж, Өөрийн хүслийг шивнэж, уучлан энэрхүйн шийдвэрт хөтөлж, хайрын үйлсэд өдөөж, зөвт шударгыг заадаг Эзэндээ дуулгавартай байвал, бид итгэлийн амьдралдаа урам зоригтой байж, Түүнтэй улам дотносон ойртож, залбирал гуйлтынхаа хариултыг ч хүлээн авч байх юм, гэж элч Иохан бидэнтэй туршлагаасаа хуваалцаж байна.

Энэ хэсэгт “хайр бол зөвхөн догдлол, сэтгэл хөдлөл төдий зүйл биш, харин үүрэг хариуцлага, зориулалт золиослол бүхий үйлс амьдрал юм”, гэсэн хайрын талаархи Библийн үндсэн тодорхойлолт хүчтэй хэлэгдсэн. Тэгээд энэхүү хайрын үйлс, амьдрал нь Христэд итгэгчийн өөрчлөгдсөн амьдралын хамгийн гол үзүүлэлт юм. Нэгэнт л Есүс Христийг өөрийн Эзэн Бурханаар хүлээн авсан бол, бидэнд өгсөн тушаал заавруудыг нь даган биелүүлснээр Түүнтэй улам адил болох юм.

Библи судлахуй-4: В. Жишээ: (1 Иохан 2:18-29)-р багцлалд дүн шинжилгээ хийх нь

2010-01-25T07:32:00.000-08:00

1. Энэ хэсэгт Бурханыг хэрхэн нэрлэж, дуудаж, тодорхойлж байна вэ?
а) Христ гэж 2:18,22-д өгүүлжээ. Энэ нь “(олны авралын төлөө) тослогдсон Нэгэн, тусгаарлагдсан Нэгэн, томилогдсон Нэгэн” гэсэн утгатай грек үг ба еврейгээр Мессиа гэдэгтэй адил юм.

б) Ариун Нэгэн гэж 2:20-д тодорхойлсон нь, хуучин гэрээний үеэс Эзэний нэрийг хүндлэн, цээрлэж дуудаж байсан нэр юм. Бас мөн чанарыг нь ч тодотгож, тодорхойлж буй. Ариун- гэдэг нь цэвэр, бузартаагүй, бузраас эрс өөр, тусдаа тусгаар гэсэн утгатай. ...Та Өөрийн Ариун Нэгэнд ч ялзархыг зөвшөөрөхгүй (Дуу. 16:10), ...Ариун Нэгэнийг таньж мэдэх нь оюун ухаан мөн (Сур.үгс 9:10), ...тэд Иаковын Ариун Нэгэнийг нандигнана (Ис. 29:23), Би бол чиний Бурхан Эзэн, Израилийн Ариун Нэгэн бөгөөд, чиний Аврагч мөн... (Ис. 43:3), гэх мэтээр олонтоо энэ нэр дурдагддаг.

в) Эцэг гэж 2:23,24-т бичсэн. Энэ нь бас л эрт үеэс Израилчуудын Эзэнийг дуудаж байсан олон нэрний нэг. Өмнөх Б.жишээн дээр утга учир, гарал үүслийг нь нилээн дэлгэрэнгүй тайлбарласан. Ертөнцийг Бүтээгч, агуу Сүр хүч, Цог жавхлангын Бурхан, Өөрөө л хэн нэгэнд Өөрт нь ийнхүү (Эцэг минь, гэж) хандах эрх мэдэл, боломжийг олгоогүй бол хэнч ийнхүү Түүнд хандаж чадахгүй юм.

г) Хүү гэж 2:23,24-т бас нэрлэсэн. Хуучин гэрээний үед Хүү Бурханы талаар Израильчууд тодорхой ойлголтгүй байсан. Абрахам, Мосегийн үеэс агуу сүр хүчит Бүтээгч Бурханыг хүндэлж, сүрдэн эмээж, өчиггүй дуулгавартайгаар тушаал зааварыг нь даган биелүүлхийг л хичээж ирсэн тэдний хувьд, хэн нэгэн махан биеэр амьдрагч хүн Түүний Хүү гэгдэх нь, хүлээн авах боломжгүй зүйл байлаа. Тиймээс ч ...Чи бол Миний Хүү, өнөөдөр Би Чамайг төрүүлсэн... (Дуу. 2:7), ...Хүүг үнс, эс тэгвэл Тэрээр уурлаж, чи замд сүйрэх вий... (Дуу. 2:12), ...Харагтун, Хүний Хүү шиг Нэгэн тэнгэрийн үүлсийг хөлөглөн ирж,... (Дан. 7:13), зэрэг зөгнөлүүдийг (эш үзүүллэгүүдийг) эртний Израильчууд жинхэнэ утгаар нь ойлгож байсан талаар тодорхой зүйл Сударт байдаггүй. Хожим Хүүг ирэхэд, таньж хүлээн авсан нь тун ховор.

Хүү- гэдэг нь эрэгтэй хүүхэд, хөвгүүн, өв залгамжлагч, хүндлэгч, хамаатай нэгэн гэсэн утгатай. Бурхан ертөнцийг үнэхээр хайрласан тул цорын ганц Хүүгээ өгсөн (Иох. 3:16а), -Энэ бол Миний хайрт Хүү. Түүнд Миний таалал оршдог... (Мт. 3:17), ...Хүний Хүү нь амралтын өдрийн Эзэн мөн (Мт. 12:8), Хүний Хүү нь алдагдсаныг хайж, аврахаар ирсэн билээ... (Лк. 19:10), Эцэг нь Хүүгээ хайрлан, Түүний гарт бүх юмсыг өгсөн юм. Хүүд итгэдэг хүн мөнх амьтай. Харин Хүүд итгэдэггүй хүн мөнх амийг үзэхгүй. Харин Бурханы уур хилэн тэр хүн дээр байдаг (Иох. 3:35,36), -Хүний Хүү хүмүүсийн гарт тушаагдах болно. Тэд Түүнийг алах бөгөөд Тэр гурав дахь өдрөө амилна... (Мт. 17:22б,23), ...Хүний Хүү үйлчлүүлэхийн тулд бус, харин үйлчилхийн тулд ирсэн бөгөөд амиа олны төлөө золиос болгон өгөхөөр ирсэн билээ (Мт. 20:28), ...Хүний Хүү тэнгэр элч нарын хамт Эцэгийнхээ алдрын дотор ирж, хүн бүрд үйлсийнх нь дагуу хариуг өгнө (Мт. 16:27), зэрэг илчлэлт, тунхаглалууд нь Хүү Бурханы (Есүс Христийн) дэлхийд ирсэний үүрэг зорилго, байр суурь, эрх мэдлийг тодорхойлдог.

Хүүгүйгээр эцэг гэж байх уу?, Яг үүнчлэн эцэггүй хүү гэж байх уу? Мэдээж аль аль нь боломжгүй юм. Эцэг нь хүүгийнхээ зүрхэнд, хүү нь эцэгийнхээ зүрхэнд байдаг нь бас л мэдээжийн, энгийн үнэн болохыг “эцэг” болон “хүү” хүн бүр маш сайн мэддэг билээ. Энэ хэсэгт дээрхи 4-н янзаар нэрлэсэн байгаа боловч бие биенийгээ нөхдөг, Нэг Нэгэнгүйгээрээ байх аргагүй, Нэг нь Нөгөөгөө тодорхойлон харуулж, гэрчилдэг, Нэг Нэгэндээ уусан нэгдсэн, нэг зорилготой, нэгэн хүсэлтэй, нэгдмэл санаатай, нэг үйлстэй Мөнхийн, Бүтээгч нэг л Эзэн Бурханы тухай өгүүлж байна. Израиль аа, сонс! Эзэн бол бидний Бурхан. Эзэн бол ганц (Deu. 6:4).

2. Христийг эсэргүүцэгч хэн бэ? Энэ захидлын бас нэг гол зорилго нь Христийг эсэргүүцэгч хэн бэ гэдгийг илчлэх нь юм.
а) Энэ нь Чуулганд Иохантай (итгэгчидтэй) хамт байсан, нэг биш этгээдүүд гэж 2:19-р (энэ нь Христитгэлээс урвасан эсвэл итгэлийн үнэнүүдийг мушгин гуйвуулагчид гэсэн санаа) ишлэлд тодорхойлсон байна.

б) Тэд “Есүс бол Христ (үй олны авралын төлөө тослогдсон, томилогдсон Нэгэн) биш” гэдэг, гэж 2:22а-р ишлэлд бас илчилсэн.

в) Мөн тэд Эцэг болоод Хүүг эсэргүүцэгчид, гэж бас 2:22б-д өгүүлсэн. Ялангуяа тэр үед (одоо ч Ёховагийн гэрчүүд ... гэх мэт) буруу гаж урсгалууд Хүүг үгүйсгэдэг байсан. Харин Ариун Сүнс болон Библи бидэнд, Ертөнцийн Эзэн маань бидэнд Хүүгээ өгч, Түүгээр л дамжуулан гэмт ертөнцийг хайрлан уучилсан авралын үнэнийг илчилдэг. Бурхан амьд оршин байдгийг мэдэх нь, итгэх нь нэг хэрэг. Харин энэ үнэнийг үгүйсгэх нь тухайн мэдлэгээ, итгэлээ, Бурханыг ч үгүйсгэж байгаа хэрэг гэж 2:23-р ишлэлд тодорхой анхааруулжээ.

Ер нь, энгийн амьдарлын логикоор л бодоод үзэхэд хүүг нь алчихаад, аавд нь таалагдана гээд явж байж таарах уу? Христ Есүс бол Бурханы Хүү биш. Түүний загалмайн аврал тийм ч чухал, ач холбогдолтой үйлс биш. Түүнгүйгээр Эцэг Бурханы тааллыг нь олж, хүү нь болон хүлээн авагдана, гэх маягын муйхарлал бол дээрхи логик гаргалгаатай агаар нэг юм. Учир нь Эцэг хэнийг ч шүүхгүй, харин Тэр бүх шүүлтийг Хүүдээ даатгасан. Энэ нь бүгд Эцэгийг хүндэлдгийн адил Хүүг хүндлэхийн тулд юм. Хүүг хүндэлдэггүй хүн нь, Түүнийг илгээсэн Эцэгийг хүндэлдэггүй. (Иох. 5:22,23), Бурхан ертөнцийг үнэхээр хайрласан тул цорын ганц Хүүгээ өгсөн. Ингэснээр Хүүд итгэгч хэн ч мөхөхгүй, харин мөнх амьтай болох юм. Түүнд итгэдэг хүн яллагдахгүй. Харин үл итгэдэг хүн аль хэдийн яллагдсан. Учир нь тэр хүн Бурханы цорын ганц Хүүгийн нэрэнд итгээгүй юм (Иох. 3:16,18).

г) Бас бусдыгаа мэхлэхийг (уруу татахыг) оролддог, гэж 2:26-р ишлэлд дурджээ (Тэдний бас нэг онцлог нь үл итгэгчдийг биш, харин итгэгчдийг төөрүүлэхийг маш их оролддог. Бас өргөнөөр эрэгцүүлэн үзэх юм бол, бурхангүй нийгмийн бүхий л “соёл иргэншил”, тэдний бидний итгэл рүү хандсан дайралт, уруу татлага ч хамаатай). Эдгээр бүх тодорхойлолтууд өнөө цагийн гаж урсгалууд болох Ёховагийн гэрчүүд, Мормонизм, Мүүннизм... нарын шинжүүдтэй бүрэн тохирдог.

3. Захидлыг бичигч нь хүлээн авагчдыг хэн гэж боддог вэ?
а) Иохан тэднийг (биднийг) Ариун Нэгэнээр тослогдсон хүмүүс, гэж 2:20-р ишлэлд өгүүлсэн бол б) Үнэнийг (загалмайд итгэгчид) мэдэгчид гэж 2:20, 21-р ишлэлд онцлоод, в) гэхдээ л мэхлэгдэж болзошгүй учраас сэрэмжлүүлэг илүүдэхгүй хүмүүс гэж үздэгээ 26-р ишлэлд дурджээ.

4. Мөнх амийн тухай хэрхэн тодорхойлсон байна вэ? а) Хүү болоод Эцэгийн дотор байх нь Мөнх амь юм, гэж 2:24-р ишлэлд өгүүлээд, б) хэрхэн Хүү болоод Эцэгийн дотор байж чадах вэ?! гэдэгт мөн л 2:24а ишлэлд ... эхнээсээ сонссон зүйл чинь (Үг нь махан бие болж бидний дунд оршин, бид Түүний алдрыг харцгаасан. Энэ нь Эцэгийн цорын ганц Хүүгийн алдар бөгөөд нигүүлсэл ба үнэнээр дүүрэн байсан юм (Иох. 1:14). Бурхан ертөнцийг үнэхээр хайрласан тул цорын ганц Хүүгээ өгсөн. Ингэснээр Хүүд итгэгч хэн ч мөхөхгүй, харин мөнх амьтай болох юм (Иох. 3:16)... гэх мэт авралын үнэнүүд) та нарын дотор байвал үүнийг чадна, (Нэг үгээр, Христ Есүст итгэх итгэлээр гэмийн шийтгэлээс аврагдан, Мөнхийн улсад очих эрхтэй болсон гэдэгтээ үргэлж итгэж байвал, бид (Чуулган нь) Хүү болоод Эцэгийн дотор байх ажээ) гээд
в) Мөнх амь нь Эзэний бидэнд амласан (–Хэрэв хэн нэгэн нь Намайг хайрлавал, тэр хүн Миний үгийг сахина. Миний Эцэг түүнийг хайрлана. Бид тэр хүн рүү очиж, түүнтэй хамт Өөрсдийн орон байраа байгуулна (Иох. 14:23). –Хэрэв цангасан хүн байвал Над уруу ирж, уугтун. Надад итгэдэг хүн “Түүний дотроос амийн усны гол урсах болно” гэж Сударт хэлсэнчлэн байх болно гэв (Иох. 7:37,38)... гэх мэт) амлалт юм гэж байна. Бүхэлдээ энэ захиа нь, хүн төрөлхтөний мөнхийн эрэл хайгуул, хүсэл мөрөөдөл болсон мөнх амийн бодит биелэл бол Есүс Христ юм, гэсэн үнэнийг өөр гаж буруу зам, хоосон цэцэрхэлийн эсрэг сөргүүлэн тавьсан.

5. Тосолгоо гэж юу эсвэл хэн болохыг хэрхэн тайлбарлав?
а) Тосолгоог хэн өгдөг вэ? гэдэгт 2:20-р ишлэлд Ариун Нэгэнээс, 2:27а-д Түүнээс (Христээс) өгөгддөг гээд

б) хэнд өгөгддөг вэ? гэдэгт бидний (итгэгчдийн) дотор өгөгддөг,гэсэн байна. Ер нь энд Ариун Нэгэнээр тослогдсон гэдгийг 2 салаа утгаар тайлбарлаж болохоор байна. Энэ нь, Ариун Нэгэн нь биднийг Өөрөөсөө тусдаа ямар нэг зүйлээр (тухайлбал савтай тосоор. Хуучин гэрээний үед ийнхүү тосолдог байсан.) тосолсон гэж ойлгож болохоор... Харин нөгөө нэг нь, Ариун Нэгэн нь Өөрөө тосолгоо юм, гэсэн санаа байна.

Ариун Нэгэн гэж хэн бэ? Ариун гэдгийн талаар дээр ярьсан. Харин Нэгэн- гэдэг нь тодорхой хувь зан чанартай, өөрийн гэсэн зорилго, үзэл бодол, эрх мэдэл, мэдрэмж, оюун сэтгэлгээ бүхий бие оршигчийг хэлдэг нэр томъёо. Харин олон итгэгчид (ялангуяа гаж буруу урсгалынхан), Ариун Сүнс нь зүгээр л сэтгэл хөдлөл, догдлол хөөрөлтийг, онгодыг л өдөөдөг эзэн биегүй, хувь чанаргүй, хоосон чанартай нэгэн зүйлийн хүч мэтээр боддог, үздэг. Үүнээсээ болж Түүнийг хүндлэх, хайрлах, Түүнтэй дотносох, Түүнд дуулгавартай байх, Түүнээс эмээх зэргийг ор тас орхигдуулдаг нь, Түүнийг зөвхөн ашигийн нүдээр харж, захирч, шаардахыг, өмчилхийг оролддог нь тэдний хувьд сүйрэл юм.

Энэ мунхаглалын эсрэг в) тосолгоо нь, бидэнд бүгдийг заадаг төгс Багш, Үнэн Нэгэн гэдгийг 2:27б-д өгүүлээд,

г) 2:27а-д тиймээс Түүнээс өөр багш (тухайн үед гностик, керинтүс урсгалын номлогчид, өнөө үед Жосеф Смит (Мормонизмийг үндэслэгч), Мүн Сон Мён (Мүүнийн шашныг үндэслэгч), Чарльз Рассел (Ёховагийн гэрчүүдийн анхдагч)... гэх мэт нь) хэрэггүй гэж, элч Иохан захиандаа анхааруулсан байна. Эндээс, Тэр Өөрөөсөө ангид ямар нэг зүйлээр биднийг тослоогүй. Харин Өөрөө бидний дотор Ариун Сүнсээрээ оршин амьдарч, бүх үнэнийг заан, удирддаг гэсэн илчлэлт харагдаж байна.

(1, 2, 3 Иохан ном) хичээлийн гэрийн даалгавар
Шалгасан багш: Ий Жэ Шин UBTC 2007 он

Библи судлахуй-3. Б. жишээ: (1 Иохан 2:15-17) -р хэсэгт ажиглалт судалгаа хийх нь

2010-01-25T05:30:00.000-08:00

1. Энэ хэсгийн товчлол: Ертөнцийг хайрладаг нэгэний дотор Бурханы хайр байхгүй ба учир нь ертөнцийн хүсэл тачаал нь Эцэгээс биш юм. Эдгээр нь өнгөрөн одно. Харин Бурханы хүслийг үйлддэг нэгэн нь мөнх амьтай.

2. 1 Иохан номд тус хэсгийн эзлэх байр суурь: Энэ багцлал нь (1Иох. 5:4,5)-р багцлалтай цогц уншигддаг. Бас (1 Иох. 4:7-9)-р багцлалд дурдагддаг Бурханы хайрын эсрэг дайсагнагч, ертөнцийн бузар хүсэл тачаалыг илчилсэнээрээ онцгой байр суурьтай.

3. Хам хэсгийн судалгаа: Өмнөх хэсэг болох (1 Иох. 2:12-14)-т элч Иохан уншигчдыг “бяцхан хүүхдүүдээ, нялхасаа, эцгүүдээ, залуусаа” гэхчилэн дуудсан. Бяцхан хүүхдүүд, нялхас гэж шинэхэн итгэгчдийг, эцэгүүд гэж Чуулганд нөлөө бүхий үйлчлэл хийдэг, төлөвшсөн “удирдагчид”, багш нарыг хэлсэн болов уу. Залуус, гэж итгэлээр өсөж суралцаж байгаа хүмүүсийг хэлсэн байж болно. Зүгээр л шууд утгаар, итгэгчдийг нас, байр сууриар нь ч, үүрэг хариуцлагаар нь ч тодотгон хэлсэн гэж ойлгоход ч болно. Ерөнхийдөө нийт Чуулганыг хамруулан хэлж байгаа нь тодорхой байна. Тэгээд нэрийнх нь учир нүгэл нь уучлагдсан Есүсийг сануулаад, Тэр нь эхнээсээ байсан Мөнхийн Бурхан гэж тодотгож байна. Тэр биднийг Ариун Сүнсээрээ мөнх амь руу төрүүлсэн Эцэг юм. Түүний Үг (Иох. 1:1-3) бидний дотор байснаар, бид аливаа уруу татлага, сатаны хүчийг ялан дийлдэгийг баталж байна. Түүний Үг гэдэг нь, махан биеэр ирсэн Есүс (1 Иох. 1:1), (Иох. 1:14), бидний дотор гэдэг нь – Түүнд итгэх итгэлийг хэлсэн байна. Тэгээд Иохан энэ бүгдийг дахин дахин давтан хүч оруулж байгаа нь, дараа нь хэлэх захих зүйл нь маш чухал юм, гэж энэ хэсгийн (1Иох. 2:15-17) ач холбогдолыг онцолж байна.

(1 Иох. 2:18,19)-т дахиад л нялхасаа гэж эхэлж байна. Сонирхолтой нь эцгүүдээ ч юм уу, залуусаа гэж бичсэнгүй. Магад элч Иохан онцгойлон шинэ итгэгчдэд буруу урсгал, хуурамч багш нарыг мэдүүлж, нялх итгэлийг нь хамгаалахыг чухал гэж үзсэн байх. Энд бас “эцсийн цаг” гэж цаг үеэ тодорхойлж байна. Христ ирсэнээр, бас удахгүй дахин ирнэ гэснээр, анхны Чуулганаас өнөөгийн бүх итгэгчид бүгд “яг одоо л, удахгүй Эзэн ирнэ” гэсэн итгэлээр амьдрах ёстойг мэдүүлж байна. Энэ нь итгэлтэй байдлын маш чухал үзүүлэлтүүдийн нэг юм. Харин “болоогүй байх, хожуу ирнэ” гэж тайвшрах нь, сатаны уруу татлага юм. Тэр гэнэт бидний бодоогүй цагт (Мт. 24:44) ирнэ. Мөн Христийг эсэргүүцэгчдийн талаар анхааруулсан. Тэд бидний дундаас гарсан нь, Чуулганд ирээд Есүсийг “...Эзэн минь, Эзэн минь гэсэн болгон (Мт. 7:21) Хаанчлалд орохгүйг” одооноос бидэнд (1 Иох. 2:19б) үзүүлэхийн тулд юм, гэж байна.

4. Энэ хэсэгийн судалгаа: А. Онцлох үгийн судалгаа: а) Энд “ертөнц” гэдэг үг 6-н удаа дурдагдаж байна. Библи дээр энэ үг нь, Бурханы хүсэл сонирхолоос ангид, муу сүнсний хаанчилдаг, дарангуй бүдүүлэг, завхай тачаангуй, шунал хүсэл, өрсөлдөөн тэмцэлээр дүүрэн асар том орооцолдсон тогтолцоог хэлдэг. Мөн, энэхүү нүдэнд үзэгдэх бузар булайгаас гадна, нүдэнд үл үзэгдэх, хүмүүсийн зүрх сэтгэл дотор оршдог, Эзэний илчлэлт илэрхийлэлт, үг сургааль, тушаал заавар, дуудлагыг нь (нэг үгээр Загалмайг) эсэргүүцэж байдаг дуулгаваргүй сэтгэл, сүнс ч багтдаг.

б) Бас “Эцэг” гэдэг оноосон нэр хоёр удаа гарч байна. Энэ нь, шинэ гэрээний үед бүтээгч Бурханыг Хүү Есүс Христээр нь дамжуулан таньсан, Ариун Сүнсээр нь тослогдож нэг бие болсон, итгэгчдийн дууддаг нэр. Бас хуучин гэрээний үед цөөн тооны Бурханы сонгогдсон ариун хүмүүс ингэж дууддаг байсан. Мөн Эзэн ч Өөрийгөө олонтоо Эцэг, гэж тодорхойлж нэрлэсэн байдаг. Энэ нь маш дотно, эгэл, ойрын харилцаа хамаарал, байр суурийг тодотгосон, Бүтээгчийн зүгээс үзүүлж буй агуу энэрэл хайрын илэрхийлэл болсон нэр.

Эцэг- гэдэг нь төрүүлэгч, сахин хамгаалагч, сахилгажуулан хүмүүжүүлэгч, заан сургагч, удирдан чиглүүлэгч, хариуцагч, хайрлан нандигнагч гэсэн утгатай. (Бүтээгч нь үл таалсан бүтээлээ устгах, өөртөө ашиглахгүй байх үнэмлэхүй эрх мэдэлтэй. Гэвч хорон муу гэмт хүмүүнийг хайрлан, эцэг хүүгийн дотно харьцаанд дууддаг бидний Бурхан ямар агуу вэ). Би түүний Эцэг болж, тэр Миний хөвгүүн болно (2 Сам. 7:14), (1 Шас. 17:13), ...Та бидний Эцэг билээ. Өө, Эзэн, Та бидний Эцэг. Эртнээс Таны нэр бол бидний Аврагч (Ис. 63:16), гэх мэт нь Христийн дотор Түүний хөвгүүд, охид болон босгогдох Чуулганд хандсан зөн, эш үзүүллэгүүд байсан.

Эдгээр нь Эзэн Есүсийн, Би болон Эцэг нэг юм (Иох. 10:30), ...Хэн ч Надаар дамжилгүйгээр Эцэгт хүрэхгүй (Иох. 14:6), хүмүүс та нарын сайн үйлсийг хараад, тэнгэр дэх Эцэгийг тань алдаршуулахын тулд та нарын гэрэл тэдний өмнө тийнхүү гэрэлтэг (Мт. 5:16), Тиймээс тэнгэрлэг Эцэг тань төгс байдаг шиг та нар мөн төгс бай (Мт. 5:48), Газар дээр хэн нэгнийг эцэгээ болгож битгий дууд. Учир нь та нарын Эцэг Ганц бөгөөд Тэр тэнгэрт буй (Мт. 23:9), Миний Эцэг Надад хаанчлалыг өгсөнчлөн, Би та нарт өгнө (Лк. 22:29), гэх зэрэг сургааль, тунхаглалаар биднийх болон баталгаажсан юм.

в) Цаашилбал, “Эцэгийн хайр” ба “ертөнцийг хайрлах хайр”, “ертөнцийн хүсэл тачаал” ба “Бурханы хүсэл” гэсэн 2 янзын “хайр”, “хүсэл”-үүдийг тодотгон дурдаж, хооронд нь сөргүүлэн тавьсан. “Эцэгийн хайр” ба “Бурханы хүсэл” нь Библид илчлэгддэг бүтээгч Бурханы мөн чанартай холбоотойгоор тайлбарлавал, ухамсартай, зорилготой, золиослол гаргадаг, тэвчээртэй, хариуцаж чаддаг, өгөөмөр, ууч энэрэнгүй, зөвт шударга, амар тайван, баяр баясгалантай, хувирдаггүй, сахилгажуулдаг, үргэлжлэн өрнөдөг, эцэст нь үр дүнд (үр жимстэй) хүрдэг (ялан дийлдэг) бидний төлөөх үйлс амьдралыг хэлж байна.

г) Харин “ертөнцийн хайр ба хүсэл тачаал” нь сэтгэл хөдлөлд захирагддаг, хувирамтгай, итгэл үнэмшилгүй, шунал нэр алдар дээр суурилдаг, зорилгогүй, тиймээс ч ямарч үр дүнгүй, харин ч харамсал, гашуун зовлон авчирдаг дур сонирхол, шохоорхолыг хэлж байна.

Б. Ишлэлийн судалгаа: а) 15-р ишлэлд сатаны удирддаг, гэмт хүмүүсийн нийгмийн тогтолцоо болон гэмт сэтгэлгээ (ертөнц), тэдгээрийн буй болгосон бүхий л зугаа цэнгэл, эд хөрөнгийн баярхал тансаглал, хоосон үрэлгэн байдал, элдэв улс төрийн үзэл суртал, хүний мэргэн ухаан (философи), шашин шүтлэг зэргийг (ертөнцөд байгаа зүйлс) сонирхож таашаах (хайрлах) ёсгүй. Эдгээрийг сонирхож таашаавал элдэв уруу татлагад орон соригдож, Бурханаас холдож болзошгүй юм. Хэрвээ хэн нэгэн нь эдгээрт үнэхээр зүрхээ эзэмдүүлвэл (ертөнцийг хайрладаг бол), амьдарлынхаа зорилгоо болговол, тухайн хүн нь жинхэнэ Ариун Сүнсээр тослогдсон (түүний дотор Эцэгийн хайр байхгүй) итгэгч биш байна.

б) 16-р ишлэл: Учир нь гэмт хүний нийгмийн таашаадаг, эрхэмлэдэг бүхий л үнэт зүйлс нь, ялангуяа махан биеийн хүсэл тачаал, нүдний хүсэл тачаал, амьдралын бардам бахдал нь бүтээгч Эцэгийн маань бүтээл бус, харин гэмт сэтгэлгээ, муу сүнсний үйл ажиллагааны үр дүн юм. (Тэр үеийн гностик, кринтүс урсгалын хуурамч багш нарын гаж сургаалийн цөм нь, “нэгэнт л бузар махан биеийг ч Бурхан бүтээсэн ба энэхүү биеийн нүгэлт хүсэл, зуршил нь ч гэмт бузар үйлсээрээ хангагдахыг анхнаас нь Бурхан тогтоосон”, гэсэн нь юм.)

в) 17-р ишлэл: Сатан болон түүний бузар үйлсийн үр дүн болсон гэмт нийгмийн тогтоц, эрхэмлэдэг зүйлс нь өнгөрөн одно. Харин Бурханы хүслийн дагуу гэмшин өөрчлөгддөг, Түүний хайр уучлалын биелэл болсон Хүү Есүст нь (загалмайн авралд) итгэдэг хүн мөнх амьдарна.

5. Энэ хэсэгт яригдаж буй хүмүүсийн төрөл: а) “ертөнцийг хайрладаг хүн” (1 Иох. 2:15). Энэ хүний дотор Эцэгийн хайр буюу Ариун Сүнсний тосолгоо байхгүй хүн. Тиймээс ч аврагдаагүй (мөнх амьгүй) хүн юм.
б) “Бурханы хүслийг үйлддэг хүн” (1 Иох. 2:17б). Энэ хүний дотор Бурханы Үг (1 Иох. 2:14в) байдаг учир муу нэгнийг дийлсэн хүн. (Мт. 7:21) ...тэнгэрт байгаа Миний Эцэгийн хүслийг биелүүлэгч нь, хаанчлалд орно, гэсэн тул мөнх амьдрах (аврагдсан) нэгэн юм.

6. Энэ хэсэгт илэрхийлэгдэж буй Бурхан:Тэр бидний төлөө Хүүгээ өгсөн Эцэг. Тэгээд бидний дотор хайраар оршдог Эцэг. Энэ ертөнцийн бузар булай болгон нь Эцэгээс бус. Тэгэхлээр Тэр ариун, зөвт Бурхан юм. Тэрээр Өөрийн хүслийг хүмүүст илчилдэг ба дуулгавартай дагадаг нэгэнд мөнх амь өгдөг.

7. Энэ хэсэгийг хүлээн авч уншсан хүмүүсийн сэтгэгдэл: Энэ хэсгийг, ер нь энэхүү захиаг уншаад, “Бурхан ертөнцийг анхнаас нь сайн, муу 2 талтайгаар бүтээсэн. Тиймээс ч итгэлээрээ сүнс маань л аврагдсан бол болоо. Харин махан бие бузар учир гэм үйлдхээс өөр аргагүй”, гэсэн хуурамч номлолд автаад гэмших сэтгэлгүйгээр, зүрхээ хатууруулан буруу замаар төөрөлдөн алхаж байсан үй олон итгэгчид ухаарч гэмшин Эзэн рүү эргэсэн болов уу. (Одоо ч “...анхны удаагийн нэг л гэмшил чинь хангалттай. Дахин дахин гэмших нь ямарч тусгүй”, гэх буруу номлол, сургааль тэнүүчилсээр байдаг. Энэ нь гэмшил бол үргэлжлэн өрнөх, өөрчлөгдөн шинэчлэгдэх үйлс амьдрал юм (Илч. 2:4,5) (1Иох. 1:7-10), гэсэн Библийн зарчимыг, Эзэний хүслийг үгүйсгэсэн гаж сургааль юм. Тиймээс ч уг захидлын үнэ цэнэ, үнэн илчлэлт, утга учир одоо ч өндөр ач холбогдолтой.)

Олон хуурамч “багш нар” илчлэгдэн, зарим нь ч ариун хүмүүсийн нөхөрлөлөөс хөөгдөн, зарим нь гэмшин аврагдсан биз ээ. Итгэл үнэмшилдээ үнэнч байж, өндөр ёс суртахуунтайгаар, цэвэр ариунаар үлгэр дууриал болон амьдрах Христчин сургааль, амьдрах хэв маягийг үгүйсгэгчид, мушгин гуйвуулагчид (Христийг эсэргүүцэгчид) ялагдан, Чуулган ч цаашаа хөгжиж төлөвших зам нь шулуудсан. Тиймээс Чуулган өнөөгийн өндөрлөгт хүрч, уг захидал Ариун Сүнсний илчлэлт хэмээн тооцогдож, Канонд (Библид) байр сууриа эзэлж, үүрэг зорилгоо хэрэгжүүлсээр байгаа билээ.

(1, 2, 3 Иохан ном) хичээлийн гэрийн даалгавар
Шалгасан багш: Ий Жэ Шин UBTC 2007 он

Библи судлахуй-2. А. жишээ: (1 Иохан 1:5-10) багцлалд ажиглалт дүгнэлт хийх нь

2010-01-25T03:38:00.000-08:00

1. Эх хэсгийн товчлол: Бурхан гэрэл учраас Бурхантай нөхөрлөдөг гэсэн мөртлөө харанхуйд байгч хүн нь худал хэлж байна. Харин гэрэл дотор алхвал бид бие биетэйгээ нөхөрлөж, Түүний Хүү Есүсийн цус биднийг цэвэрлэх болно. Хэрвээ бид гэмгүй гэвэл өөрсдийгөө хуурч байгаа хэрэг. Бас Бурханыг худалч болгож байна. Харин даруугаар, чин сэтгэлээсээ гэмшин гэмээ хүлээн зөвшөөрвөл Тэрээр бидний гэмийг уучилж, биднийг бүхий л зөвт бус байдлаас цэвэрлэнэ.

2. 1 Иохан номд энэхүү хэсгийн эзлэх байр суурь: Уг хэсэг нь номын оршилтой нягт уялдаатай хэсэг байна. 1 Иохан номонд “нөхөрлөл, гэрэл, харанхуй, гэм, зөвт” гэсэн үгнүүд олонтоо гардаг. Иохан эдгээр үгнүүдийг ашиглан, захидлын утга санаа өрнөхөөс (илчлэгдэхээс) өмнө уншигчдад танилцуулж байна.

3. Хам ишлэлийн судалгаа: (1 Иох. 1-4) ишлэлд “дэлхийн сууриас өмнө байсан Үг, махан биетэй болж ирсэн Есүс”-ийг танилцуулж байна. Мөн Эцэг ба Түүний Хүү Есүстэй (элч нар) нөхөрлөдөг тухайгаа танилцуулж, энэ нь маш их баяр баясгалан өгдөг ба бусадтай хуваалцвал бүрэн утга төгс болдог гээд, тиймээс уншигчдыг энэхүү нөхөрлөлд урьжээ.

(1 Иох. 2:1-6) ишлэлийг гэм нүгэл үйлдүүлэхгүйн тулд бичжээ. Хэрэв итгэгч нь гэм үйлдвэл Есүс түүнийг өмгөөлөх болно. Учир нь Тэр Өөрийгөө эвлэрүүлэх тахил болгон өргөж, өмгөөлөх эрх мэдэлтэй болсон. Ийм Есүсийг мэддэгийн гэрчлэл нь, Түүний тушаалуудыг сахих явдал юм. Дан ганц сүнслэг мэдлэгтэй болох бус, бодитоор Есүс шиг үйлдэн амьдрах хэрэгтэй. 1 Иохан номыг бүхэлд нь харвал Есүсийн үйлс нь хайр байдгыг онцолсон.

4. Энэ хэсгийн судалгаа: А. Онцлох үгийн судалгаа: а) Энэ дэлхийд гэрэл харанхуй хоорондоо тэмцэлддэг. Гэрэл бол Бурхан бөгөөд гэрэл дотор үйлдвэл Бурхантай нөхөрлөж байна гэсэн үг юм. Энд гэрэл гэдгийг харанхуйг гийгүүлдэг гэдгээс илүүтэй “гэрэл дотор бүх зүйлс ил тод, тодорхой харагдаж байдаг” гэсэн утгыг товойлгон хэрэглэсэн. Тиймээс ч гэрэл дотор байдаг нэгэн нь зөвийг эсвэл бурууг үйлдэж буйгаа тодорхой харж, ялгаж салгаж чаддаг байна гэсэн үг. Тиймээс ч Эзэн дээр очин, алдаа зөрчилөө ил тодоор гэмшин хүлээж чаддаг. Бас бусдыгаа ч бурханлаг өнцөгөөс, гэгээтэйгээр харж чадна. Улмаар хоорондоо ариунаар нөхөрлөх юм.

б) Эсэргээр, харанхуй дотор үйлдвэл худал хэлж, үнэнийг үйлдэхгүй байна гэсэн үг. Бурханыг болон бусдыг үнэн зөвөөр танин мэдэж чадахгүй. Тиймээс ч Эзэнтэй болон итгэлийн ахан дүүстэйгээ хайр дотор нөхөрлөх чадваргүй. Өөрийгөө ч, гэм нүгэл, алдаа оноогоо ч ялгаж, үйлсээ ч хянаж чадахгүй тул гэмшиж, буруугаа ухаарч чадахгүй.

в) Нөхөрлөл гэдэг нь, Иохан 17:3-т “Цорын ганц үнэн Бурхан болох Таныг болон Таны илгээсэн Есүс Христийг мэдэх нь...” гэж тунхаглахдаа хэрэглэсэн “мэдэх” гэдэг үгтэй холбоотойгоор тайлагддаг. Энэхүү “мэдэх” гэдэг нь маш ойрын, дотно харилцаа хамаарлыг илэрхийлсэн үг.

Та хэн нэгэнийг сургаар, бусдаас дамжуулан авсан мэдээллээр мэддэг болох нэг хэрэг. Харин өөрөө тухайн хүнтэйгээ хувьчилан дотноор нөхөрлөж, хэнээс ч, юунаас ч үл хамаарах өөрийн гэсэн ойлголт, үнэлэмж, хүндлэл бишрэл, итгэл найдвар, хайрын харилцаа хамаарлыг бий болгох нь огт өөр хэрэг. Яг л ийм танин мэдэхүйн талаар энд яригдаж байна. Энэхүү бие биеэ танин мэдэж, хүндлэн дээдэлсэн дотно нөхөрлөл бол “мөнх амь” юм, гэсэн нь Библийн бусад хэсэгт “аврал” бол “мөнх амь” гэснээс арай өөр, өвөрмөц байдаг.

Б. Ишлэлийн судалгаа: а) 5-р ишлэлд, Ариун Сүнс бидэнд Бурханы төгс, ариун, ямарч харанхуй бурангуй дотор нь байдаггүй Нэгэн гэдгийг мэдүүлдэг гэж байна.

б) 6-р ишлэлд, тэгэхлээр энэхүү ариун Бурханыг мэддэг гэсэн мөртлөө, (Бурханы хүслийг мэдэхгүй, сохороор) аливаа гэмийг үйлдэж байгаа нэгэн нь худлаа яригч гэжээ.

в) 7-р ишлэлд, харин Есүс юу хийдэгээ мэдэж (төгс, гэмгүй) байдаг шиг, бид ч үйлсийнхээ сайн мууг мэдэж (гэмээс хол) байвал элч нар итгэгчидтэй, эсвэл итгэгчид Есүстэй (аль ч тайлбар нь зохистой) нөхөрлөх юм. Бурханы Хүү загалмай руу явж байхдаа яах гэж, хаашаа явж байгаагаа, эцэст нь юунд хүрэх ээ, ялан дийлэх ээ мэдэж байсан ба одоо ч мэдэж үйлддэг. Түүнчлэн бид ч (Чуулган) үйлс, зорилгоо баттай мэдэж, итгэлтэйгээр үйлдэх ёстой юм. Бас Бурхан дээр очигч нь цэвэр байх ёстой. Христийн цус зөвхөн анх итгэхэд ч биш, цаашдаа ч үргэлж бүхий л алдаа зөрчилөөс, бузар муугаас цэвэрлэж, гэмийг ариусгадаг тул өдөр бүр бидэнд хэрэгтэй.

г) Үүнийг 8,9-р ишлэлүүдэд бүр тодорхой өгүүлсэн байна. Энэ нь, Иохан 13:10-т Биеэ угаасан хүн хөлөө л угаах хэрэгтэй. Тэгвэл гүйцэд цэвэрхэн байна, гэсэнтэй шууд хамааралтай уншигддаг. Бид загалмайд итгэх итгэлээрээ уучлагдаж, ариуссан боловч, өдөр бүр үйлддэг гэмээ бас л Эзэний өмнө тавьж, Түүгээр шүүлгэн цэвэрлүүлэх шаардлагатайг заасан.

д) Бас 9,10-р ишлэлүүдэд бидний Бурханы итгэмжтэй, хувиршгүйг батлан тунхаглаад, Түүний өмнө илэн далангуйгаар бас даруугаар очиж байх ёстойг сануулжээ. Бид зөвт, ариун хэмээн Бурханд хүлээн зөвшөөрөгдсөн ч, урьдын адил гэм хийдэг маань тийм ч амар өөрчлөгддөггүй. Энэ нь хэдийгээр бидэнд урамын үг боловч, нөгөө талаар Эзэний агуу нийгүүлсэл, хайрын дор толгой бөхийн, даруу болохоос өөр аргагүйг мэдүүлдэг.

Энэ хэсэг нь бүхлээрээ “сүнслэг мэдлэг, чадвар нь аврал юм, эсвэл авралд хүргэнэ” гэж заадаг байсан хуурамч багш нар, худал сургаалийн эсрэг, жинхэнэ аврал гэж юу болохыг (харанхуйгаар сохороор биш, хэнтэй юуны учир нөхөрлөж, хаашаа явж буйгаа мэдэж үйлддэг байх, алдаа зөрчилтөй, сул доройгоо Түүний өмнө даруугаар хүлээн зөвшөөрч, загалмайн цусны ариусгах хүчийг өдөр бүр амсдаг байх) танилцуулж, сөргүүлэн тавьсанаараа нэн чухал ач холбогдолтой.

Өнөө үед ч Чуулган дотор нэг л их “сүнслэг” хийрхүү нөхдүүд мэр сэр байдаг. Тэд, харь хэлээр ярьдаггүй бол, Ариун Сүнснээс шууд эдгэрэл авдаггүй бол, элдэв өвчин, муу сүнсийг эрх мэдэлтэйгээр хөөдөггүй бол, Сударыг “гайхалтай сүнслэгээр” шууд л ойлгодоггүй бол... гэхчилэн олон “алдаа зөрчилтөй” бол аврагдсан юм уу, гэхчилэн бусдын итгэл, төлөвшил рүү бүдүүлгээр халдан, загалмайг гэрчлэн бусдыгаа босгох биш, өөрийгөө алдаршуулан бусдыг шүүн яллагч болчихсон байдаг нь нэн харамсалтай.

5. Энэ хэсэгт гарч буй хүмүүсийн төрөл: а) Бурхантай нөхөрлөдөг гэж ярьдаг боловч харанхуй дотор алхдаг (6), гэмгүй гэж өөрийгөө үздэг (8), нүгэл үйлдээгүй гэдэг(10) хүн. Энэ хүн нь худалч, үнэнээр явдаггүй (6), өөрийгөө хуурдаг, үнэн дотор байдаггүй (8), Бурханы Үг дотор нь байдаггүй, тиймээс ч Бурханыг худалч болгодог хүн (10).

б) Гэрэл дотор явдаг (7), өөрийн гэмийг хүлээн зөвшөөрдөг (9) хүн. Энэ хүн Бурхантай болон бусадтай нөхөрлөдөг тул Христийн цус бүх гэмээс нь цэвэрлэдэг (7), Бурханы итгэмжит, зөвт байдлыг амсдаг хүн (9).

6. Энэ хэсэгт илэрхийлэгдэж буй Бурхан: Бурхан гэрэл учир ямарч харанхуй Түүний дотор оршиж чадахгүй. Түүний өмнө очвол бүх зүйл ил болдог. Тиймээс ч гэмтэй хүн Түүний өмнө зогсож чаддаггүй. Тэрээр Өөрийнх нь Хүүд (загалмайд) итгэдэг хүнтэй нөхөрлөдөг. Учир нь Тэрээр гэмт хүний төлөө Хүүгийн дүрээр ирж, загалмай дээр урсгасан цусаараа гэмийг нь уучилсан Бурхан. Тэгээд энэхүү хайр, зөвт, итгэмжит байдлаа мөнхөд сахьдаг Бурхан.

7. Энэ хэсгийг хүлээн авч уншсан хүмүүсийн сэтгэгдэл: Христэд итгэгч гээд, аврал, мөнх амийг мэддэг гээд үнэн хэрэгтээ сайн мууг, сайхан муухайг ялгаж мэддэггүй, төгс ариун, гэмгүй болчихсон гэх мөртөө цэвэр ариун амьдарлын хэв маягыг эрхэмлэдэггүй, сохороор, харанхуйгаар алхагчид гэмшин эргэсэн болов уу? Тэгээд сул дорой, гэм нүгэлт мөн чанараа гэмшин Эзэний өмнө даруугаар очиж, уучлал хайрыг нь хүртэж, цаашдын итгэлийн амьдралдаа, Христтэй болон итгэлийн ахан дүүстэйгээ хайрын нөхөрлөлийг эрхэмлэн алхаж эхэлсэн биз ээ...

(1, 2, 3 Иохан ном) хичээлийн лекцийн материалаас
Шалгасан багш: Ий Жэ Шин UBTC 2007 он

Библи судлахуй-1. “1, 2, 3 Иохан ном” хичээлийн материалаас

2010-01-25T03:07:00.000-08:00

1 Иохан ном (захидал) нь элч Иоханаар МЭ 1-р зуунд бичигдсэн. Зохиогчийг уг захидлыг бичихэд хүргэсэн шалтгаан, түүхэн нөхцөл нь, тухайн үеийн нялх Христийн Чуулганд заналхийлж байсан 2 гаж урсгал юм. Эдгээр нь Гностик ба Кринтүс урсгалууд юм. Энэ 2 хоюулаа Есүсийн махан биеэр ирсэнийг үгүйсгэж байв.

Мөн гностик нь, “...ертөнц анхнаасаа сайн муу хосолсон шинж чанартайгаар бүтээгдсэн ба сайн нь сүнс, муу нь махан бие...” гэж үздэг байв. Энэ нь, Бүтээгч Эцэг маань анхнаасаа бүх зүйлийг сайн сайхнаар бүтээгээд Бурхан Өөрийнхөө бүтээсэн бүгдийг харахад нэн сайхан байжээ... (Эх. 1:31а) гэснийг үгүйсгэсэн хэрэг байлаа.

Ийм гаж төөрөгдөлдөө үндэслэн “ ...махан биеэрээ ямарч гэм хийж болно, сүнсээрээ л цэвэр ариун байхад л хангалттай...” гэж улам мунхаглан төөрөлдөж, үүнийгээ бусдад ухуулан ятгаж, зааж тунхаглаж байлаа. Харин үнэн хэрэгтээ сүнсээрээ цэвэр ариун хүн махан биеэр ч гэм үйлдэж чаддаггүй (1 Иох. 3:9), гэж Ариун Сүнс элч Иоханаар дамжуулан заасан.

Кринтүсчүүд Есүсийн бурхан чанарыг нь үгүйсгэдэг байсан. “Тэр нэгэн Иудей залуу усан баптисм хүртэх үед Бурхан түүний дээр бууж ирээд, хожим загалмайд цовдлогдохын өмнө түүний биеэс зайлсан...” гэж заадаг, тунхагладаг байв. Харин элч Иохан ...Амийн Үг (Бурхан) маань нүдэнд харагдаж, гарт баригдах махан бодит биеэр ирсэн ба бид (элч нар) гэрчилж байна (1Иох. 1:1,2), гээд энэ үнэнийг үгүйсгэгч нь муу сүнснийх (1Иох. 2:22,23; 4:1-3), гэж тунхагласан.

Тэр үеийн дэлхий дахинд Грекийн гүн ухаанаас үүдэлтэй иймэрхүү гаж итгэл үнэмшил, мухар сүсэг маш хүчтэй байсан нь Чуулганд дээрхи 2 урсгалын дүрээр нэвтэрч, олныг бүдрүүлж байлаа. Үүний эсрэг элч Иохан уг захидлаараа дээрхи няцаалтуудыг өгөөд, энэхүү буруу сургаалийг танин мэдэх, иймэрхүү олон сорилт, дайралт, гуйвуулгаас итгэлээ хамгаалах гол арга зам нь, Бурхантай болон итгэлийн ахан дүүстэйгээ хайрын амьд нөхөрлөл дотор явах нь юм, энэ нь авралын баталгаа болох юм, гэдгийг заасан.

Бурхан бол Бүтээгч, харин хүн бол бүтээл нь юм. Ер нь бол Бүтээгч бүтээлтэйгээ нөхөрлөнө гэж ярих нь, тухайн үед Бүтээгчийг доромжилж буй хэрэг байсан. Харин Иохан эдгээр захидлуудаараа Бурхан хүн хоёр бие биенээ олж харан нөхөрлөх тухай сургадаг. Христтэй нөхөрлөсөн өөрийн нөхөрлөлийг гэрчлэн, бусдыг үүнчлэн үйлдэхийг уриалснаараа, цоо шинэ тэнгэрлэг амьдралын хэв маягыг сурталчилсан.

Энэхүү захидлууд бичигдсэн цаг үе, соёл ахуй, сэтгэлгээний орчин нь өнөөгийн бидний үеэс эрс өөр юм. Тэр үеийн бичигч болон хүлээн авагчдыг, өнөөгийн биднээс цаг хугацааны 2000-аад жилийн ангал зааглаж байна. Тиймээс тэр үеийнхний ёгтлол сэтгэлгээ, ухаарал, ойлгох чадвар, мэдлэг гэх мэт маш олон зүйлийг бид ажиглалтаар ойлгож авдаг. Улмаар захидалд дурдсан санаа оноо, үндсэн мэссежийг үнэн зөвөөр танин мэддэг.

Ажиглана гэдэг нь, тухайн ном эсвэл багцлалыг судлахдаа үйл явдал дунд нь орж, амьд уншихыг хэлнэ. Өөрийгөө Бурханы оронд, тухайн итгэгчийн оронд тавьж, эсвэл одоогийн байр сууринаасаа, өнөөгийн мэдлэгийн өндөрлөгөөс тунгааж бодох зэргээр олон талаас нь ажиглаж эрэгцүүлэн, бүхий л боломжит хувилбараар дүгнэж цэгнэн, шинжинэ гэсэн үг.

Гэхдээ төсөөлөл эрэгцүүлэл тань тэнээд явчихгүйн тулд, таныг элдэв гаж буруу ойлголт эргэлзээнд, төөрөгдөлд оруулчихгүйн тулд Ариун Сүнсээр удирдуулан, гуйлт залбиралтай хамт аялах хэрэгтэй. Бас Сударын бусад ном, зөгнөл, тайлал, сургаалиудтай харьцуулан уялдуулан хамтад нь ажиглах хэрэгтэй. Мөн бүх үеийн тулгуур үнэнүүд болсон загалмайн аврал хайр, дахин амилалт, эцсийн шүүлт зэргийг сууриа болгон дүгнэлтээ гаргах хэрэгтэй.
Ажиглалт нь дараахи дэс дараагаар хэрэгжиж, үр дүнгээ өгвөл сайн.

Эхлээд өөрийн танин мэдэж, ойлгож ухаарсан бүх зүйлээ жагсааж бичнэ.

Дараа нь хяналт хийж хасна.

Гуравт нь, үлдсэн зүйлээ дахин боловсруулж, хэзээ ч өөрчлөгдөхгүй, бүх үед хүчинтэй тэнгэрлэг зарчимыг гаргаж ирнэ. Ямар ч үед өөрчлөгддөггүй, Өөрийн ард түмнээсээ шаарддаг Эзэний хүсэл шаардлагыг зарчим гэнэ.

Дөрөвт нь, энэ зарчим тань эртний хүмүүсийн итгэл сэтгэлээр, амьдралд нь хэрхэн хэрэгжиж байсныг ойлгож, судалж мэдэх хэрэгтэй.

Тавдугаарт, үүнийгээ өнөөгийн нөхцөлд, цаг үетэйгээ уялдуулан өөрийнхөө амьдралд яаж хэрэгжүүлэх, бусдад хэрхэн зааж сургахаа боловсруулах хэрэгтэй.
Сайн багш (номлогч) дагалдагчиддаа (сонсогчиддоо) Судараас сурч мэдсэн үнэний зарчимуудаа тунхаглаад зогсохгүй, хэрэгжүүлэлтийг нь ч заадаг, биелүүлэхийг уриалдаг, өөрөө үлгэрлэдэг байх ёстой. Номлол тань мэдлэг өгөх, шинэ танин мэдэхүйг заахаас гадна, гол зорилго нь сонсогч тань зүрхэндээ ухаарлыг авч, сэтгэлдээ шийдвэр гарган өөрчлөгдхөд л чиглэгдсэн байх ёстой. Бас гол фокус нь, Эзэн Бурхан ба тухайн сонсогч (итгэгч) хоёрын харилцааг л товойлгосон (өөрийгөө биш) байх шаардлагатай.

(1, 2, 3 Иохан ном) хичээлийн лекцийн материалаас
Шалгасан багш: Ий Жэ Шин UBTC 2007 он

Бурханы ард түмэн та бүхэндээ шинэхэн 2010 оны мэнд хүргэе!

2010-01-01T23:28:00.001-08:00

Энэхүү блог сайтаар зочилж буй эрхэм танд шинэ оны мэнд хүргэе!

Өнөөдөр 2010 оны анхны өдөр. Яг одоо Улаанбаатарт 15 цаг 50 минут болж байна. Гадаа шинэхэн цас орчихсон, агаар тунгалаг бас цэвэрхэн байна.

Эзэн бидэнд яг энэ өглөө ямар гайхалтай алтан шаргал нарыг бас шинэхэн цасыг бэлэглэсэн юм бэ. Тэр энэ өглөө хүн бүрийг шинэчлэхээр шийджээ.
Өнгөрөн одсон бүхий л өдөр хоногуудад таларх гэж Эзэн энэхүү гайхамшигт өглөөг хүмүүн бидэнд бэлдсэн байжээ.

2009 онд миний амьдрал, хувь заяанд талархмаар олон үйл явдлыг Эзэн надад өгсөн. Гэвч хүн сул дорой болохоор Тандаа төдий л тухай бүр талархаж байсангүй. Тэр бүх сайн сайхан зүйлс угаасаа л өрнөх ёстой юм шиг боддог. Гэтэл үнэндээ үгүй юм.

Төгс хүчит Нэгэн таны амьдралыг удирддаг гэдгийг та анзаарсан уу. Ядаж хааяа ч гэсэн таны хувь заяа, мөн өдөр тутмын амьдралд тохиож буй өчүүхэнээс эхлээд аугаа үйлсийн цаана төгс хүчит Нэгэн байна гэдгийг сэтгэлд тань хэн Нэгэн илчилдэггүй, бас шивнэдэггүй гэж үү?

Тийм ээ, яг энэ мөчид Эзэн Бурханыг таниагүй байгаа Монголын олон олон авъяаслаг залуучуудын зүрх сэтгэлд Эзэн та байдаг гэдгийг илчилж өгөөч гэж Танаасаа гуйн залбирч байна. Энэхүү залбирлын сэдвийг шивнэсэн Ариун Сүнсэнд талархаж байна. Сүнсэндээ ядуу хүмүүс ерөөлтэй еэ гэж Та хэлсэн. Тийм ядуу нэгэн байхаар Та удирдан чиглүүлж өгөөч.

2010 оны энэ өдрөөс эхлэн Та мөнхөд миний амьдралын суурин дээр байж надаар дамжуулан Та өөрийн дүр төрхөөр хүмүүсийн дунд амьдран байна гэсэн сургаалынхаа дагуу Та намайг улам ихээр өөрчлөн, Ариун Сүнсээрээ удирдан, амьдруулж өгөөч. Тантай хамт энэ дэлхийн олон газруудаар явж Таныг илчлэх боломжийг Та зөвшөөрч өгөөч. Өдөр бүр шинийг сэтгэн намайг өөрчилж байдагт Тандаа үнэхээр их талархаж байна аа, Аав аа.

Монголын өнцөг булан бүрт Та хүндлэгдээч. 2010 онд олон мянган хүн Эзэний ариун нэрийг дуудаж авралыг авах болтугай.

2010 онд Бурхан таныг илүү ихээр ивээх болно. Амен.
Эзэнд талархал магтаалыг өргөсөн Есүгэн.

Эзэн Есүсийн мэндэлсэн гайхамшигт баярын мэнд хүргэе

2009-12-25T17:49:00.000-08:00

Ертөнцийг бүтээсэн агуу Бурханы ард түмэн болсон Христийн Чуулганы ахан дүүс та бүхэндээ Аврагч Эзэн Есүс Христийн мэндэлсний баярын мэндийг хүргэе.

Энэхүү өдөр нь Бүтээгч Эцэгийн маань бүтээлийн бүхий л түүхэн дэх хамгийн онцгой чухал тэмдэглэлт агшин мөн. Энэ өдөр биелсэн агуу гайхамшигт үйл явдлыг Эцэг Өөрөө бүх бүтээлийн эхнээс л төлөвлөж, энэ нь амжилттай хэрэгжихийг тэнгэр газар дээрхи бүх бүтээл тэсэн ядан хүлээсэн билээ. Би газар дэлхийн суурийг тавихад чи хаана байв аа?... Юун дээр түүний сууриуд тогтсон бэ? Түүний булангийн чулууг хэн тависан бэ? Тэгэхэд өглөөний одод хамтдаа дуулцгааж, Бурханы бүх хөвгүүд баярлалдан уухайлсан (Иов 38:4-7).

Өдгөөгөөс 2010 оны тэртээ нэгэн онгон бүсгүй жирэмслэн, улмаар Хүү төрүүлсэн нь, өнөөх агуу төлөвлөгөөний эхлэл байлаа. Гэнэт Эзэний тэнгэр элч тэдний өмнө зогсож, Эзэний цог жавхлан тэдний эргэн тойронд гийсэнд хоньчид үлэмжийн айдаст автжээ. Тэнгэр элч тэдэнд –Бүү айгтун, харагтун, би бүх ард түмнийг үлэмж баярлуулах сайн мэдээг та нарт авчирлаа. Өнөөдөр Давидын хотод Аврагч, Эзэн Христ та нарын төлөө мэндэллээ. Тэжээлийн тэвшинд байх даавуунд өлгийдсөн нялх хүүхдийг та нар олж харна. Энэ нь та нарт тэмдэг болно гэлээ. Гэнэт өнөөх тэнгэр элчийн хамт олон тооны тэнгэрлэг дайчид үзэгдэж, Бурханыг магтан, -Дээр өндөрт алдар нь Бурханд байх болтугай, доор газарт амар тайван нь Түүний тааллыг олсон хүмүүст байх болтугай гэцгээв (Лук 2:9-14).

Яагаад энэ нь, бүхний тэсэн ядан хүлээсэн эрхэм нандин мөч байсан бэ?! Тэнгэр газар дээрхи бүх л оюун ухаант, ухамсарт бодгалиуд, тэр ч бүү хэл бусад бүхий л бүтээлүүд (Ром 8:19-22) үүнийг л хүлээж байсан гэж Библи бидэнд илчилдэг. Судар нь эхнээсээ л хүн төрөлхтөний зөнгөөрөө ч бай, ухамсартайгаар ч бай эрж хайж, эмээн биширч, шүтэж мөргөж, хүндэлж дээдэлж ирсэн Бурхан нь, Сүнсээр оршигч Нэгэн гэдгийг илчилж, тодорхойлсон байдаг. Газар нь ямар ч хэлбэр дүрсгүй, эзгүй хоосон, гүний гадаргуу дээгүүр нь харанхуй бүрхэж, Бурханы Сүнс усны мандал дээгүүр элин хальж байлаа (Эх. 1:2).

Энд нэгэн сонирхолтой зүйлийг та ажиглав уу? Бурханы Сүнс.., гэсэн нь бас Бурханы Бие гэж байх нь ээ?!! Тиймээ, Ариун Судар бидэнд бас нэгэн агуу нууцыг илчилдэг нь, энэхүү агуу хүчирхэг Ариун Сүнс маань Өөртөө биеийг бүтээж, Түүн дотроо Өөрийгөө бүрэн дүүрнээр алдаршуулж, улмаар хараалд унаж бохирлогдсон бүх бүтээлийг шинэчилж ерөөхийг хүссэн тухай юм. 2010 оны тэртээ Иудейн Бетлехем хотод болж өнгөрсөн эгэл юм шиг боловч энгүй гайхамшигт тэрхүү үйл явдал нь, дээрхи зорилгын биелэл байлаа. Тэр бол үл үзэгдэгч Бурханы дүр мөн бөгөөд бүх бүтээлийн Ууган нь мөн. Учир нь Түүн дотор тэнгэр ба газар дахь бүх юмс, үзэгдэх ба үл үзэгдэх юмс, хаан ширээнүүд, эсвэл ноёрхолууд, удирдлагууд, эсвэл эрх мэдлүүд ч бүтээгдсэн. Бүх юмс Түүгээр болон Түүний төлөө бүтээгдсэн байна. Тэр бүх юмсын урьд байна. Бүх юмс Түүний дотор оршин тогтнодог (Кол. 1:15-17).

Үүнээс өмнө нь, Бүтээгч нь бүтээлүүдээсээ ангид байж, тэдний хоорондынх нь харилцааг Мосегийн хуулиуд зохицуулж байв. Харилцаа хүндрэл, гацаанд орох үед Ариун Сүнс хэн нэгнийг Өөрийн хүч онгодоор хөглөн гажуудлыг арилгахад ашигладаг байлаа. Тэднийг шүүгчид, бас эш үзүүлэгчид гэж нэрийддэг байв. Харин мөнөөх малын саравчинд, тэжээлийн тэвшин дотор мэндэлсэн Хүү маань, бага наснаасаа л ...-Та нар юунд намайг хайсан юм бэ? Эцэгийнхээ гэрт байх ёстойг минь та нар мэдсэнгүй гэж үү? (Лук 2:49) гэж байсан ба хожим “аймшиггүйгээр“ Би болон Эцэг нэг юм (Иох. 10:30) ...Намайг харсан хүн Эцэгийг харсан... (Иох. 14:9) гэж тунхагласан юм.

Энэ бол бүх бүтээлийн түүхэнд шинэ эрин ирсэнийг зарласан суут тунхаглал байлаа. Үүнээс хойш бүтээл нь, бүтээл биш харин Бүтээгчийн байр суурь, зиндаанд өргөмжлөгдөн, улмаар Түүнтэй хамт шинэ тэнгэр, шинэ газрыг бүтээлцэх боломжтой болсон билээ. Харин Өөрийг нь хүлээн авсан болгонд, Өөрийнх нь нэрэнд итгэдэг хүмүүст Бурханы хүүхэд болох эрхийг Тэр өгөв (Иох. 1:12). Би Өөрийн Эцэг дотор, та нар Миний дотор, Би та нарын дотор байхыг та нар тэр өдөр мэдэх болно (Иох. 14:20). Би ялагчийг Өөрийн Бурханы сүм дэх багана болгоно. Тэр цаашид тэндээс гарахгүй. Би түүн дээр Өөрийн Бурханы нэр, тэнгэрээс Миний Бурханаас буун ирэх шинэ Иерусалим буюу Өөрийн Бурханы хотын нэр, Өөрийн шинэ нэрээ бичнэ (Илч. 3:12). Би ялж, Эцэгийнхээ хамт Түүний сэнтийд заларсны адил, Надтай хамт Миний сэнтийд залрахыг ялагчид соёрхоно (Илч. 3:21).

Тэр үед Тэр цор ганцаараа, бусдаас дэндүү онцгой өөр Нэгэн байж, үл үзэгдэх мөнхийн Бурханы үзэгдэх дүр төрх, нүүр царай болж байлаа. Тэр “сул дорой” байсан. Түүний сонгосон, хайрласан хүмүүс нь хүртэл Түүнийг ойлгодоггүй, хүнд үед нь тус дэм, хамжаа болж чаддаггүй байлаа. Тэр тусмаа харанхуй бурангуй гэмт хүний ертөнц Түүнийг хүлээн авч чадаагүй бөгөөд хажиглан сэжиглэж, гүтгэн доромжилж, улмаар зовоон тарчлааж алсан билээ. Гэвч энэ нь бүх бүтээлийг хайрлан, тэднийг ерөөн шинэчлэхийг зорьсон Эцэгийн хүслийн биелэл байлаа. Яагаад гэвэл Бурхан Түүний дотор Өөрийн төгс дүүрэн нь оршдогийг болон Түүний загалмайн цусаар энх тайвныг тогтоон, Түүгээр дамжуулан газар дээрх, эсвэл тэнгэр дэх юмсыг, бүх юмсыг Өөртэйгөө эвлэрүүлснийг таалдаг (Кол. 1:15-20).

Түүний “сул дорой” нь, Түүний хүч, тэнгэрлэг мэргэн ухааны дагуу байв. Энэ нь, Тэр хүнтэй адил махан биеэр гэр бүл болж, үр хүүхэд төрүүлж, газар тариалан эсвэл мал ахуй, худалдаа наймаа эрхэлж, үр хүүхдээ гэрлүүлж, үр ачаа үзэж, идэж уух, өмсөж зүүхийн л төлөө тэмцэж шаналж, мөхөс хүний тоо томшгүй асуудлуудтай зууралдсаар эцэст нь үхэж ялзралын боол болох хараалаас (Эх. 3:19) ангид Нэгэн гэсэн утгатай. ...Христ Есүс нь бидний хувьд Бурханаас ирсэн мэргэн ухаан, зөвт байдал, ариусгал ба золилт болсон юм (1 Кор. 1:30). ...Энэ нь бидний алдрын төлөө үеүдээс ч өмнө Бурханы урьдаас тогтоосон нуугдмал мэргэн ухаан мөн (1 Кор. 2:7).

Харин Тэр Сүнс дотор хүчирхэг байж, бүхий л сүнслэг хар хүчийг (мөнөөх хараалыг) загалмай дээр устгаж, Өөрийн дотор Бүтээгч ба бүтээлүүдийн хоорондох ханыг нураан, эвлэрэл, энхтайван, өршөөл уучлалын бодит биелэл болсон гэсэн утгатай юм. Гэвч Түүнийг няцалж, өвтгөх нь Эзэний таалал байв. Хэрэв Тэр Өөрийгөө нүглийн төлөөх тахил болгон өргөвөл, Тэр үр удмаа үзэж, Өөрийн өдрүүдийг уртасган, Эзэний хүсэл нь Түүний гарт цэцэглэнэ (Иса. 53:10).

Ийнхүү Бүтээгч болон бүтээлүүдийн хоорондын харилцааг Мосегийн болон өөр бусад тоо томшгүй ёс суртахууны эсвэл байгалийн хуулиуд биш, Эцэг Хүүгийн энхрий дотно, эрхэмсэг тэнгэрлэг, хайр энэрэл, итгэлцэл, зориулалт золиослол, өршөөл уучлал, баяр баясгалангаар дүүрэн харилцааны дээд жишиг болсон загалмайн хууль буюу Христ Өөрөө зохицуулах болсон билээ. Бидний Эзэн Есүс Христийн Эцэг ба Бурхан магтагдах болтугай. Тэрээр Христ дотор тэнгэрлэг газар дахь алив сүнслэг ерөөлөөр биднийг ерөөсөн. Түүний өмнө биднийг ариун бөгөөд гэм зэмгүй байлгахын тулд Бурхан ертөнцийн сууриас урьд биднийг Түүний дотор сонгосончлон, хайраараа Тэр Өөрийн хүслийн сайн тааллын дагуу, биднийг Есүс Христээр Өөрийнхөө хөвгүүд болгон үрчлэн авахаар урьдаас тогтоожээ (Еф. 1:3-5).

Хайрт ахан дүүсээ! ... Христ Чуулганыг хайрлаад түүний төлөө Өөрийгөө өгсөний адил... (Эф.5:25), эдүгээ бид Христийн бие бөгөөд тус тусдаа Түүний эрхтнүүд юм (1 Кор. 12:27). Чуулган бол үл үзэгдэгч мөнхийн Бурханы Өөртөө бүтээж буй дүр төрх, зүс царай, Бие оршихуй нь юм. Чуулган нь Түүний бие буюу бүхний дотор бүгдийг Дүүргэгчийн дүүрэн байдал мөн (Еф. 1:23).

Энэ өдөр бол Аврагч Эзэн Есүс Христ мэндэлсний баяр гэдэг нь, таны Христийн дотор дахин төрж, Бурханы бие болсон баяр юм. Тэр Өөрийнхөө Сүнсийг бидэнд өгсөн учир бид Түүний дотор, Тэр бидний дотор буйг бид үүгээр мэднэ. Есүс бол Бурханы Хүү гэж хүлээн зөвшөөрдөг хэний ч дотор Бурхан байж, тэр Бурханы дотор байна (1 Иох. 4:13,15). Та нар өөрсдөө Бурханы сүм мөн бөгөөд Бурханы Сүнс та нарын дотор оршдог... (1 Кор. 3:16) Харин Эзэнтэй нийлсэн хүн нэг Сүнс байна (1 Кор. 6:17).

Та бол Бурханы Хүү мөн. Та бол шинэ тэнгэр, шинэ газрыг бүтээгч мөн. Учир нь анхны тэнгэр, анхны газар нь өнгөрөн одож, тэнгис байхгүй болов... Сэнтийд Залрагч –Харагтун, Би бүх юмсыг шинэ болгож байна гээд –Бичигтүн, эдгээр үгс итгэмжит бөгөөд үнэн гэв (Илч. 21:1, 5). Тэнд цаашид ямар ч хараал байхгүй болно. Мөн Бурхан ба Хурганы сэнтий түүний дотор байж, боолууд нь Түүнд үйлчилнэ. Тэд Түүний царайг харна. Мөн Түүний нэр тэдний духан дээр байх болно. Тэнд цаашид шөнө болохгүй. Эзэн Бурхан тэднийг гийгүүлэх учраас тэдэнд дэнлүүний гэрэл ч, нарны гэрэл ч хэрэггүй болно. Учир нь Эзэн Бурхан тэднийг гийгүүлнэ. Тэгээд тэд үеийн үед хаанчлах болно (Илч. 22:3-5).

Танд эдгээр бүхнийг энэ л өдөр боломжтой болгосон бидний Тэнгэрлэг Эцэг, Аврагч Эзэн Есүс маань алдарших болтугай. Та бүхэндээ бас, дахин дахин энэхүү гайхамшигт баярын мэндийг халуунаар хүргэе. Халлелүяа.

Өмнөговь, Хонгорын элс. Миний аавын бүтээсэн Монгол нутаг Есүгэний 2009 оны гэрэл зургийн цувралаас

2009-12-24T05:47:00.000-08:00

Хонгорын элсэнд тав хоног тэмээгээр аялсан бидний аялал

Архангай, Өвөрхангай аймгийн нутаг. Миний аавын бүтээсэн Монгол нутаг Есүгэний 2009 оны гэрэл зургийн цуврал Хангай нутгийн зун

2009-12-24T05:29:00.000-08:00

Өвс ногоо халиуран өнгийн цэцэг алагласан Архангай болон Өвөрхангай нутгийн зун.

Хөвсгөл далай. Миний аавын бүтээсэн Монгол нутаг Есүгэний 2009 оны гэрэл зургийн цувралаас

2009-12-24T04:16:00.000-08:00

Нуурын нийт усны эзэлхүүн 381 км³, энэ нь дэлхийн нийт цэнгэг усны 0.4% юм. Нуур нь манай гаригын 17 эртний нууруудын нэг ба ойролцоогоор 2 сая гаруй жилийн настай хэмээн тооцоолсон байдаг.

Гэмшил ба харуусал

2009-11-09T18:45:00.000-08:00

Харин … үсгээр бус, Сүнсээр хийлгэсэн зүрх сэтгэлийн хөвч хөндөлт нь, хөвч хөндөлт мөн. Тэр хүний магтаал нь хүнээс бус, харин Бурханаас ирдэг юм (Ром 2:29).

Гэмшил нь махан биеийн гэмт хүнийг тэнгэрлэг ариун, Христийн дүр төрх бүхий шинэ хүн болгох гол хүчин зүйлсийн нэг юм. Гэмшилгүйгээр хүн жинхэнэ утгаараа Христийн дотор дахин төрж чадахгүй.

Аавынхаа хэтэвчнээс мөнгө хулгайлж байгаад баригдчихаад, тэгээд гэмшиж уучлал гуйлгүй … за юун сүртэй юм. Зүгээр л уучилчхаач дээ!.. гэх хүүхдийн зан төрх, төлөв байдал нь зохистой юу?! Ухаалаг, жинхэнэ утгаараа үр хүүхэддээ хайртай, түүнийхээ ирээдүйд анхаардаг, амьдрал хувь заяанд нь өөрийн оролцоо, үүрэг хариуцлагаа ухамсарладаг эцэг хүн яавч энэ байдлыг зүгээр орхиж, хүлцэж төвдөхгүй. Заавал засаж залруулж, ухааруулж гэмшүүлхээр, сахилгажуулан хүмүүжүүлхээр ажиллаж л таарна.

Тэнгэрлэг Эцэг маань биднийг чин сэтгэлээсээ гэмшихийг шаарддаг. Гэмшицгээ! Тэнгэрийн хаанчлал ойрхон байна … (Мт. 3:2). Гэмшигтүн, хүн бүр өөрсдийн нүглийн уучлалын төлөө Есүс Христийн нэрээр баптисм хүртэцгээ. Та нар ч Ариун Сүнсний бэлгийг авах болно (Үй. 2:38). Ариун Сүнс биднийг шат дараалсан гэмшил рүү удирдаж, улмаар Эзэний оршихуйд жигшигддэг зохисгүй бузар муу зан чанар, үзэл бодол, хэвшмэл сэтгэлгээнээс, дадал зуршилаас цэвэрлэн ариусгадаг.

Ингэхийн тулд хүнд хэцүү ч юм шиг, хатуу ширүүн ч юм шиг, уйтгар гунигтай ч юм шиг үйл явц, өрнөлийг (дасгалжуулалт, сахилгажуулалтыг) бидний амьдралд зөвшөөрдөг. Та нарт учирсан сорилт нь хүнд тохиолддог л зүйл юм … (1Кор. 10:13). Бурханыг хайрладаг, Түүний зорилгын дагуу дуудагдсан хүмүүст тохиолддог бүхий л зүйл эцэстээ тэдний сайн сайхны төлөө байдаг гэдгийг бид мэднэ (Ром 8:28). Ариун Сүнсний, сүнс болон махан биед хийдэг хүчтэй донсолгоо, сэгсрэлтээр дамжин хүн гэмшилд хүрэх нь олонтоо бөгөөд, тухай бүр тэрээр улам ариусаж, ямарваа нэгэн бузар хүлээснээсээ ангижран чөлөөлөгдөж байдаг.

Мөн зүсээ хувирган ирдэг бузар мууг (уруу татлагыг) таньж, эсэргүүцэн зогсох сэтгэлийн тэнхээ, дархлаатай болдог. Жинхэнэ гэмшилийн үр дүнд хүн улам даруу, хүлээцтэй, тэвчээртэй болж, сэтгэл хөдлөлдөө захирагдамтгай, яаран үнэлэх дүгнэх (ихэвчлэн алдаатай) зуршилаасаа ангижирсан, аливаа асуудалд нухацтай, олон талтайгаар, ялангуяа бурханлаг байр сууриас хандамтгай, Бурханы шийдэл, санаа, оролцоог хүсэмжлэн урин залагч болон хувирдаг. Сорилтыг тэсвэрлэдэг хүн ерөөлтэй еэ! Учир нь тэр соригдчихоод, Эзэний Өөрийг нь хайрлагсдад амласан амийн титмийг хүлээн авна (Иак.1:12).

Гэмшил нь хүнийг сайн ба мууг ялгаж таних тэнгэрлэг танин мэдэхүй рүү авчирдаг. Энэ нь Бурханы алдарыг гутаасан, бусдын аврал, сайн сайхны эсрэг өөрийн аливаа ноцтой үйлдэл, үг хэл, хүсэл бодол болгоноо соргогоор ялгаж таних чадвартай болгодог. Хүмүүний алдаа зөрчил, гэм буруу нь юуны түрүүнд Бурхан Эцгийн маань зүрх сэтгэлийг өвтгөдөг билээ. Таны эсрэг, зөвхөн Таны эсрэг би нүгэл үйлдэж, Таны мэлмийд бузар мууг хийлээ. Тиймээс Та айлдахдаа зөвдсөн бөгөөд, шүүх үедээ гэм зэмгүй болой (Дуу. 51:4).

Тэгснээр, ийм бузар муу нэгнийг хайрлан, амиа хүртэл өргөсөн, Эзэний хайр энэрэл, загалмайн аврал уучлалыг улам бүр ухамсарлан, чин сэтгэлээсээ үнэлж хүндлэн, зүрхэндээ урдхаас улам хүчтэйгээр, шинэлэгээр хүлээн авдаг. Олон хүн загалмайн авралыг нэг л удаа хүлээн авдаг гэж боддог, ярьдаг. Харин энэ нь чин сэтгэлийн гэмшил, ухаарал дээр дөрөөлөн үргэлжлэн өрнөж, өөрчлөн хувьсгах илүү их хүч нөлөөтэйгөөр улам шинэлэгээр, дахин дахин давтагддаг үйл явц юм. Харин Надад чиний эсрэг зүйл байна. Юу гэвэл чи анхны хайраа орхижээ. Тиймээс чи хаанаас унаснаа санаж гэмш. Чи анх хийж байсан үйлсээ үйлд. Хэрэв чи гэмшихгүй бол, Би чам руу очиж, дэнлүүний чинь суурийг байрнаас нь зайлуулах болно (Илч. 2:4,5).

Жинхэнэ гэмшилийн шинж нь: алдаа, уналт, гэмийнхээ бурууг бусдаас хайхгүй, өөрөөсөө болсоныг ухааран, Эцэгийн өмнө буруугаа үнэн зөвөөр хүлээн зөвшөөрөх байдлаар илэрдэг (Адам, Ева нар ингэж гэмшиж ч мэддэггүй байсан тул Еденээс хөөгдсөнийг сана).

Гэмшил нь цаашид үргэлжлэн өрнөх, Бурхантай хамт алхах цоо шинэ амьдарлаар тодорхойлогдоно.

Бас гэмийг үзэн ядах, дахин давтахгүй байх сэтгэлийн хат сууж, аливаа уруу татлага ирэхэд ялган таних, эсэргүүцэн зогсох торгон мэдрэмжтэй болсон байдлаар тодорхойлогдоно.

Эдгээр нь бүхий л амьдарлын турш үргэлжлэн, тухайн хүнийг тодорхойлох гол эерэг үзүүлэлт болтлоо хэвшдэг (төлөвшдөг).

Харин богинохон хугацаанд, өөрийгөө өрөвдөх, хөөрхийлөх байдлаар, мөн бусдыг алдаа уналтандаа буруутгах байдлаар илэрээд, шинэ бурханлаг зан чанарт төлөвшүүлээгүй, Христтэй улам дотносох, Түүний дүр төрхөөр шинэчлэгдэх өөрчлөлт рүү түлхээгүйгээр өнгөрөн одсон догдлол бол, зүгээр л харуусал юм. Харуусагч нь, хэрвээ тэгээгүй бол…, ингээгүй бол…, тэгэх байсан…, одоо тийм байдалтай байхгүй юу…, гэх мэтээр зөвхөн тухайн болоод өнгөрсөн явдалыг л, түүнээс гарсан үр дагаварыг л онцгойлон бодох, гаслах, зорилго төлөвлөгөөг нь тасалдуулсан үйл явдал, өрнөлд ундууцах, хэн нэгэнийг (1 Иох. 3:15) бас өөрийгөө яллах, буруутгах төдийгөөр л дүгнээд, харамсаад л өнгөрдөг (Эх. 27:36-41).

Мөн харуусал нь, тухайн хүн Эзэн Бурханыхаа өмнө өөрийн хичнээн бузар муу зүрх сэтгэлтэйгээ ухааралгүй, харин хүмүүсийн өмнө л ичгүүртэй, дорд байдалтай байснаа (эсвэл байгаадаа) ичиж зовон бачимдах, өөрийгөө зөвтгөх арга саам эрэлхийлэх байдлаар илэрхийлэгддэг (1Сам. 15:30). Тэрч бүү хэл алдаа зөрчил, уналтандаа Бурханаа буруутгах (Эх. 3:12; 4:14), хүсэн тэмүүлсэнийг нь өгөөгүйд гоморхох, гуниглах (Эх. 4:5) байдлаар илэрдэг.

Улмаар Түүний өршөөнгүй, энэрэнгүйг танин мэдэж зүрхэндээ хүлээн авалгүй, харин ч үргэлж өө сэв хайдаг, боломж л гарвал яллан буруутгадаг Нэгэн мэт ойлгож, утга учиргүй айдаст автах байдалд ордог. Хайрын дотор айдас байдаггүй. Харин төгс хайр нь айдсыг хөөн зайлуулна. Учир нь айдаст ял байдаг. Айдаг нэгэн бол хайрын дотор төгс болгогдоогүй байна (1 Иох. 4:18).

Харуусагч хүн, өөрийнх нь аливаа алдаа уналт нь,тухайн хүний өөрийнх нь засах, хаях ёстой муу зан, буруу үзэл бодол, алдаатай итгэл үнэмшил, бардам байдлынх нь л гадаад илрэл, амьдрал дээрхи үр дагавар гэдгийг ойлгодоггүй хоцордог. Ингэснээрээ засагдаж өөрчлөгдөж чаддаггүй ба харин ч бүр илүү ноцтой, далдлагдсан үр дагавар болсон буруу дүгнэлт, зүрх сэтгэл хатуурах байдалд түлхдэг.

Гэмшил нь, хүнийг ололт амжилт, тэнгэрлэг сайн сайхан руу хөтөлж, эцэст нь ялалтанд хүргэдэг, үргэлжлэн өрнөдөг үйлс амьдрал юм. Гэмшил нь Бурханыг, бас бусдыг хайрласны илрэл билээ. Харин харуусал нь догдлол, сэтгэл хөдлөл төдий зүйл бөгөөд, өөрийгөө өргөмжилсөн бардам зангийн илрэл юм.

Магтаал-хүндэтгэлд үйлчлэхүй 1

2009-07-29T21:45:00.000-07:00

Магтаал-хүндэтгэл удирдахын учир : Магтаал өргөх олон арга барил байдаг ч, өнөө үед ерөнхий 2 чиглэл зонхилдог. Үүнд: “Магтан дууны концерт” (энэ нь мэргэжлийн түвшинд явагддаг) ба “Чуулганы магтаал” гэсэн нь юм.

Анхны чуулганы үе бол итгэгчдийн нийтээр өргөх магтаалын оргил үе байсан. Харин дундад зуунд мэргэжил дагнасан концертууд илүү өргөн дэлгэрсэн. Шашны хувьсгалын дараа үеэс Чуулганы магтаал дахин сэргэж, хүндэтгэл-мөргөлүүд нэг хэв маягт орж, концерт дагнасан магтаалууд ч өргөжин, И.С.Бах, Ж.Ф.Гендель зэрэг авъяаслаг хөгжмийн зохиолчид төрөн гарчээ.

Орчин үед Чуулганы магтаал ч, магтаалын концерт ч мөр зэрэгцэн оршиж, хүний түүхийн аль ч үед байгаагүй тийм олон төрлөөр Эзэнд магтаал өргөж байна. Магтан дууны концертод, мэргэжлийн түвшиний магтаалын үйлчлэгч (эсвэл үйлчлэгчид), хөгжим болон магтан дуугаар Эзэнд алдарыг өргөдөг.

Харин Чуулганы магтаал нь хүмүүст, зүгээр сонсохоос илүүтэйгээр, өөрөө Эзэнийг магтах боломж олгодгоороо давуу юм. Энэ нь үйлчлэлийн багынхны авъяас, хөгжимчдийн ур чадварыг харуулах цаг биш, мөн тоглолт биш юм. Мэдээж магтаал-хүндэтгэлийн цагт концертийн хэв маяг орсон байж болно.

Сэтгэл зүрхээ чөлөөтэй нээх чадваргүй нэгэнд, мэргэжлийн дуучны өргөж буй магтаал дэмжлэг болдог. Магтаал-хүндэтгэлийн удирдагч хүн, мэргэжлийн дуучны дуугаар дамжуулан Чуулганыг магтаалын онгодоор хөгөлдөг. Үр дүн нь, итгэгч бүр өөрийн өргөж буй магтаал дотороо Бурханы оршихуйг мэдэрч амтлах нь юм.

Гэхдээ магтаалын удирдагч нь, Эзэний оршихуйг өөрөө бий болгодог гэж ташаа ойлгож болохгүй. Хүмүүний зүрх сэтгэл хаалттай тул, байнга дэргэд нь оршигч Түүнийг мэдэрдэггүйд л гол асуудал байдаг. Ийнхүү энэ үйлчлэлийн үр дүнд итгэгч, чин сэтгэлээсээ Эзэнийг магтаж сурах, улмаар Түүний оршихуйн хүч, ариун байдлыг мэдрэх, Түүнтэй хувьчилсан харилцаандаа улам дотносон өөрчлөгдөх юм.

Орчин үеийн магтаал хүндэтгэлийн талбар: Магтаал-хүндэтгэл нь улам л уян хатан болж байна. Гэхдээ л энэ дэлхийд байгаа тул тодорхой хэлбэр, загвартай байхаас өөр аргагүй. Өнөө үед магтаал-хүндэтгэл нь дараахи хэв маягаар явагдаж байна. Магтан дуу (Praise) – Хүндэтгэл (Worship) – Сургаал (Sermon) - Үйлчлэл (Ministry)

Магтан дуу нь ихэнхдээ хурдан цоглог аятай, хүндэтгэлийн дуу нь удаавтар намуун аятай байдаг. Магтан дуу ойролцоогоор 15-20 н минут, Хүндэтгэл-мөргөл 15-20 н минут, Сургаал 30-60 н минут байж, Үйлчлэл нь цагт баригдахгүй, чөлөөтэй байх нь өнөөгийн тогтсон ерөнхий хэвшил болсон.

Сургаалийн дараахи үйлчлэл нь, хүндэтгэлийн цагийн үр жимсийг харуулах чухал цагт тооцогдож байна. Магтаалаар зүрх сэтгэлээ Эзэнд нээж, сургаалиар Түүний дуу хоолойг сонссон итгэгчид, сургаалийн сэдвийн дагуу зүрхэндээ шийдвэр гарган, амьдралдаа хэрэгжүүлхэд туслах зорилгоор энэ үйлчлэлийг зохион байгуулдаг.

Гэхдээ энэ үйлчлэлд үйлчлэгчид, итгэгчийг Ариун Сүнстэй хувьчилсан дотно нөхөрлөл дотор, Түүгээр удирдуулан өсөж төлөвшиж, Үгийг хэрэгжүүлэх хүч,мэргэн ухааныг авч байхыг ятгаж байх ёстой.

Бас энэ цагт, Ариун Сүнсний хүчээр эдгэрэл, харь хэлээр ярих, түүнийг орчуулах, эш үзүүллэг зэрэг үйлчлэлүүд явагдах ба үл итгэгчийг урагш урин гаргаж Эзэнийг хүлээн авахад уриалах зэрэг үйлчлэл ч орно.

Магтаалын баг нь, мөн энэхүү үйлчлэлийн цагт ч бас бэлтгэгдсэн байх хэрэгтэй. Магтаал өргөх дуу нь, сургаалийн сэдэвтэйгээ тохирсон, энгийн хялбар аялгуутай, үг харахгүйгээр давтан дуулах боломжтой, удаавтар дуунууд байвал зүгээр.

Магтаалын үеэр, Чуулганы удирдагч хүмүүсийн залбирлыг чиглүүлж, урагш урих, гар тавин залбирах тохиолдол байдаг. Энэ үед Бурхантай ярьж буй хүнд дэм болж, сэтгэлийг нь хөглөх зорилгоор, даралтат хөгжмөөр намуун зөөлөн аялгуунуудыг, гэнэтийн өөрчлөлт гаргахгүйгээр тогтуун тасралтгүй хөрвөх маягаар тоглох нь зохимжтой.

"Магтаал-хүндэтгэлд үйлчлэхүй" хичээлийн лекцийн товчлолоос
Шалгасан багш: Амартунгалаг UBTC

Магтаал-хүндэтгэлд үйлчлэхүй 2. Магтаал хүндэтгэлийн удирдагч

2009-07-29T21:32:00.000-07:00

Энэ үйлчлэгч нь, хүндэтгэл-мөргөлийн сүнслэг үйл явц, өрнөлд гүнзгий хамааралтай оролцогч юм. Магтаал-хүндэтгэлээр удирдахуйн хамгийн чухал үүрэг, гол зорилго бол хөгжмийн найруулга биш, харин Бурхантай харилцах (хүмүүсийн) Чуулганы сүнслэг харилцаа билээ.

Тиймээс, энэ үүрэг хариуцлагыг хөгжмийн авъяастай хүнд даатгахаасаа илүүтэй, сүнслэг хоньчлох тосолгоотой нэгэн хариуцах нь зохистой. Энэхүү үйлчлэгч нь, хүмүүсийг магтаал-хүндэтгэлээр дамжуулан Эзэний оршихуй руу удирдан залдаг нэгэн юм.

Тиймээс ч, өөрөө Бурханы оршихуй дотор ямар байдгыг гүнзгий таньсан, Эзэнтэй дотно нөхөрлөдөг хувийн туршлагатай байх хэрэгтэй. Өөрийнх нь энэ үүрэг бол, дэлхийд хамгийн эрхэм чухал үйлчлэл мөн, гэдгийг баттай ухаарсан, сэтгэл зүрхээ зориулсан байна гэсэн үг.

Өөрөө чин зүрхнээсээ идэвхтэй магтагч, сайн залбирагч, өдөр тутмынхаа амьдарлаар, үг хэл, зан хандлагаар үлгэрлэгч байх хэрэгтэй. Олны тааллыг олох гэж шоу жүжигчний дүрд хувирч болохгүйгээс гадна, зүгээр нэг хөгжимчин төдий байж болохгүй. Өөрийгөө сүнслэг төлөвшилийн хувьд ч, мэргэжлийн ур чадварын хувьд ч байнга өсгөхийн тулд, хичээнгүй эрэл хайгуул хийдэг, үргэлж суралцдаг, тэмүүлдэг байх ёстой.

Энэ үйлчлэл нь ерөнхийдөө хөгжмийн ертөнцийн дүр төрхтэй мэт боловч, 90 хувь нь сүнслэг хүчний илэрхийлэл, 10 хувь нь дуу аялгууны хүч нөлөөллөөс бүрдэнэ. Библийн үгэнд үндэслэгдээгүй магтаал-хүндэтгэлийн цаг нь сэтгэл хөдлөл төдий уулзалт болоод дуусдаг.

Энэ цагаар үе үе удирдагчийн дамжуулдаг богинохон тайлбар ишлэлүүд нь их хүчийг агуулдаг. Тиймээс ч удирдагч нь, Бичээсийг гүнзгий бясалгаж амьдралдаа хэрэгжүүлэгч, бусдад дамжуулагч байх нь чухал.

Мэдээж бас тэрээр мэргэжлийн хувьд ч зохих хэмжээнд бэлтгэгдсэн байх ёстой.
Үүнд: - Эгшигийн 5-н шугамын нотны мэдлэг, нот бичих тэмдэглэгээнүүд, хөгжмийн октав буюу зогсоц, хөгжмийн түлхүүр тэмдэглэгээнүүдийг бүрэн мэддэг байх
- Нот хараад шууд дуулж чаддаг байх
- Энгийн аялгуу, дөрвөл зохиомжуудыг ялган сонсож чаддаг байх
- Дууны өнгийг төрөлжүүлэн салгах, затакт болон хэмжээг сайн мэддэг байх
- Энгийн хялбар аяыг зохиож чаддаг байх
- Дуунуудыг хөгжмийн зэмсэг дээр тоглох болон дуулж, найруулах (аранжировк) чадвартай байх хэрэгтэй.

Хүндэтгэл-мөргөлийн төлөвлөлт :
Их бага ямарч хэмжээний хүндэтгэл мөргөлд төлөвлөлт зайлшгүй хэрэгтэй. Залбирч төлөвлөн, мөргөлийн бэлтгэлээ хангана гэдэг нь, хэв загварт хашигдана гэсэн үг биш.

Мэдээж, Эзэн л Ариун Сүнсээрээ мөргөлийг удирддаг. Харин үйлчлэгч нь, Түүний юу хүсч байгаад мэдрэмжтэй хандан, дуулгавартай уян хатан үйлчлэхэд суралцсан байх ёстой. Бэлтгэл сайн хийж байна гээд хувь хүний бодол санаанд хэт автаж болохгүй.

Төлөвлөлт нь доорхи зүйлсийг тооцон үзэж, сайтар залбиран Бурханы дээд хараатай уялдуулснаар хангагдана.
Үүнд : Ангилал: Эзэний өдрийн мөргөл, Лхагва гаригийн мөргөл, Баасан гаригийн мөргөл, Залуучуудын цуглаан, Сургалтын семинари, Эсийн бүлгийн цугларалт, Онцгой мөргөл … гэх мэт.
Хэв маяг: Чуулганы мөргөл, концертын шинжтэй (магтаал хүндэтгэлийн) мөргөл, илтгэл тавих, сэргэн мандалын цуглаан … гэх мэт.
Оролцогчид: Чуулганы гишүүд, шинэ итгэгчид, үл итгэгчид, залуучууд, ахмадууд, хүүхдүүд, томчууд…
Арга зам: Магтан дуу, видео кино, жүжигчилсэн тоглолт, гэрчлэл, бүжиг, онцгой илтгэл…
Хэмжээ: Том, дунд, жижиг, эсийн бүлгийн хэмжээнд…
Бусад зүйлс: Цаг хугацаа, хөгжмийн зэмсэгүүд, нөхөрлөл, уур амьсгал…
Оролцогчдийн бүрэлдхүүн: Хүмүүсийн ёс заншил, соёл ахуй, уламжлал, боловсрол, ажил мэргэжил, …

Мөргөлийн цагт, нэр томъёожсон үг хэрэглэхээс аль болох зайлсхийх хэрэгтэй. Чуулганы удирдагчид болон магтаалын үйлчлэгчид нь, хүмүүсийн сэтгэлд хамгийн дотно, ойр санагдах, нийтээр дагаж буй соёлын чөлөөт байдлыг төлөвлөлтөндөө харгалзан үзэж болно. Гэхдээ хэт туйлшран дэлхийлэг байдалд автаж, сүнслэг уур амьсгалд сөрөг нөлөө үзүүлхээр байж болохгүй.

Агуу сүр хүчит Нэгний өмнө хүн өөрийгөө мэдрэх, Түүнийг чин зүрхнээсээ гүнээ хүндлэх, магтан алдаршуулхад нь туслан удирдах гол фокусаа ямагт чанд баримтлах ёстой. Эс бөгөөс, Эзэний оршихуй доторхи гэмшил, ухаарал, тэнгэрлэг баяр хөөрөөс ангид, хүмүүний (үр өгөөжгүй, хоосон) сэтгэл хөөрөл, ханамж таашаалыг л чухалчилсан дэлхийн шоу, концертоос ялгагдах юмгүй болно.

"Магтаал-хүндэтгэлд үйлчлэхүй" хичээлийн лекцийн товчлолоос
Шалгасан багш: Амартунгалаг UBTC

Магтаал-хүндэтгэлд үйлчлэхүй 3. Библийн цаг үеийн магтаалын тухай

2009-07-29T21:21:00.001-07:00

Эзэнийг магтан дуулах өнгө аяс Хуучин гэрээний үеэс, өнөөг хүртэл тасралтгүй хөгжиж ирсэн. Магтан дуулах арга, хэв маяг, ашигладаг хөгжмийн зэмсэгүүд нь цаг үеийн онцлог, газар орон, уламжлал, теологио дагаад олон янзаар өөрчлөгдөж байсан.

Харин Библийн Үг нь цаг үе, орчин нөхцөлөөс үл хамааран хувиршгүй байсан. Энэ нь, бүх үеийн Бурханы хүмүүсийн амьдарлын үндэс суурь ба амьд, мөнхийн шинж чанартай. Хуучин гэрээний үеийн хүндэтгэлийн зан үйл Мосегийн үеэс үндсэн шинж төрхөө олж эхэлсэн боловч ёслолын хөгжим хараахан дэлгэрээгүй байсан.

Харин Давид хаан хүндэтгэл-мөргөлд хөгжмийг оруулж ирсэн. Давид босоо ятга тоглохоос гадна шүлэг, дуу бичиж Эзэнийг магтаж байв. Соломон хаан Ариун сүмийг барьсанаас хойш магтаал-хүндлэл, тахил өргөх зан үйл 2 нь харилцан шүтэлцээтэй болсон.

Хуучин гэрээний үеийн сүмийн хөгжим нь үндсэн 4-н эх сурвалжтай.

- Эртний түүхч Иосефус, “Соломон хаан Египетийн гүнжийг хатан буулгахдаа, тус үндэстний хөгжмийн зэмсгийг хуримынхаа ёслолд анх тоглуулж дэлгэрүүлсэн”, гэж тэмдэглэсэн байдаг. Гадаадаас шинэ хөгжмийн зэмсэг орж ирвэл, тухайн улс орны хөг аяз, аялгуу хамт орж ирдэг нь хууль юм. Египет, Ассир, Вавилон болон Израилийг тойрсон бусад улс үндэстнүүдийн хөгжмийн зэмсэгүүд болон дагаад ая дуу нь хамт орж ирсэн нь, нэг эх сурвалж юм.

- Израилчууд эртнээс нүүдлийн мал аж ахуй эрхэлж ирсэн бөгөөд, харин Канаан нутагт суурьшин амьдарч эхэлснээр газар тариалан эрхлэх болж, улмаар энэхүү ахуй, хэв маягт зохицсон дуулдаг дуунуудыг нь ч суралцан дуулах болсон. Хожим эдгээр нь Эзэний магтаалд аяз, аялгуу нь ашиглагдах болсон.

Дуулал 69-р бүлэг “Шушанимын дагуу” гэдэг нэртэй. Энэ нь “Сараана цэцэг” гэсэн утгатай. Энэ цэцэгийн тухай дуулсан ардын дууны аянд тааруулан дуулдаг байсан бололтой.

Мөн 56-р бүлэг “царс модон дээрхи тагтааны аялгуу” гэдэг ардын дууны, 57, 58, 59, 75-р бүлгүүд “Алташетийн дуу” гэдэг ардын дууны аялгуунд дуулагддаг байв. Энэ нь “битгий унагаарай” гэсэн утгатай бөгөөд, Израилчууд усан үзэм хураах үед дуулдаг байсан дуу юм.

- Дуулал 39, 62, 77-р бүлгүүд нь шинээр зохиогдож, түгээмэл тархсан “Иедутуны дуу”гэсэн хөгжимийн төрлийг ашигласан байдаг.

- Еврей хэлний цагаан толгойн үсэглэлд “Тамим” гэдэг уншлагын дүрэм байдаг. Дуулал номыг энэ дүрмээр уншихад аяндаа нэгэн хөг аялгуу үүсэн бий болдог. Магтаалын энэ төрлийг кантилейшн (Cantilation) гэж нэрлэдэг.
Эдгээр дөрөв нь, Хуучин гэрээний үед сүмийн магтаал-хүндэтгэлийн дэг жаяг хөгжин хэлбэржих гол сурвалжууд болсон.

Элч нарын үеийн магтан дуу : Энэ үе нь, еврей үзэл баримтлалтай хүмүүс болон грек соёлтой (харь үндэстэн) хүмүүс хоорондоо эвлэлдэн нэгдсэн чухал ач холбогдолтой үе юм.

Иудей Христчид, хуучин ёс жаягаас чөлөөлөгдөн, эрх чөлөөтөйгөөр Эзэнийг магтахыг хүсч байсан. Нөгөө талаас харь итгэгч нар Бурханыг магтахад суралцан, улмаар шинэ магтуу зохиож, зохион байгуулалттай магтаж эхэлсэн.

Эндээс Христийн Чуулганы цоо шинэ өнгө аяс, теологи (одоо Эзэний загалмайн аврал, хайрыг онцлон магтах болсон) бүхий магтаал-хүндэтгэлийн хэв маяг үүсэн бий болсон. Мэдээж хуучны нөлөө, дэвсгэр дээр эхэндээ үндэслэж суурилагдаж байсан.

Тиймээс ч Дуулал номноос магтаалд өргөн ашиглаж байсан бол Сайн Мэдээний номнууд, элч нарын сургаал захидлууд бичигдэн тархаж эхлэх үеэс, тэдний зарим хэсэгт ая зохиож тааруулан магтах болсон. Жишээ нь, Лук 1-2-р бүлгээр хийсэн магтаал байдаг. Үүнийг кантикл (Canticle) гэдэг.

Шинэ гэрээнд магтаалыг 1: Псалмос буюу зөвхөн Дуулал номоор дуулдаг магтаал,

2: Хүймнус буюу Дуулал номын хэсгүүдээс, мөн Библийн бусад найраглал, магтаалаар (Улаан тэнгисийн эрэг дээр Мириамын дуулсан магтаал, Дебора, Барак нарын ялалтын магтаал, Хабаккукын магтаал …гэх мэт. Бас энэ ангилалд Сайн Мэдээний номоос авч ая оруулан дуулдаг магтаал ч орно. Үүнд а) Magnificat буюу Марийн магтаал (Лк. 1:46-55), б) Benedictus буюу эш үзүүлэгч Захариагийн магтаал (Лк. 1:68-79), в) Nunc Dimittis буюу Симеоны магтаал (Лк. 2:29-32) зэрэг нь юм.) дуулдаг магтаалууд,

3: У-дэ Пнюүматик буюу сүнслэг магтаал (энэ нь, итгэгч өөрөө Эзэний агуу хайр уучлалыг зүрхээрээ мэдрээд, өөр дээр нь болон бусдын дээр хэрэгжүүлж байгаа гайхамшигт үйлсийг хараад сэтгэл нь хөдлөн, тэдгээрт үндэслэн Ариун Сүнсний онгодоор зохион дуулдаг магтаал), гэж ангилан бичсэн (Кол. 3:16; Еф. 5:19) байдаг.

"Магтаал-хүндэтгэлд үйлчлэхүй" хичээлийн лекцийн товчлолоос
Шалгасан багш: Амартунгалаг UBTC

Магтаал-хүндэтгэлд үйлчлэхүй 4. Магтаал-хүндэтгэлийн багийн зохион байгуулалт ба дасгал сургуулилт

2009-07-29T20:57:00.000-07:00

Магтаал-хүндэтгэлийн үйлчлэл бол, Бурханы Ариун хүмүүсийн Ариун Сүнсний хүч онгодоор удирдуулан хийдэг хамтын бүтээл ба энэ баг нь, нэгэн гэр бүл юм. Хуучин гэрээний үед магтаалын үйлчлэлийг левичүүд хариуцдаг байсан. Леви гэдэг нь “эв нэгдэл” гэсэн утгатай. Тэд “Ариун өргөөн” –д байнга хүндэтгэл-мөргөлийн бэлтгэл хийж, аливаа бусад хүмүүний асуудлуудаас ангид тусгаар байж, ариун байдлыг чанд сахидаг байв.

Мэдээж, магтаалын тосолгоотой, авъяаслаг удирдагчдаар Эзэний магтаалын үйлчлэл гачигдаж байгаагүй нь тодорхой. Ямартаа ч Библи дээр Асаф (1Шас. 16:7), Хеман, Иедутун (2Шас. 5:12), Корагийн хөвгүүд (Дуу. 84, 85) зэрэг удирдагчдын талаархи мэдээлэл, тэдний зохиосон магтаалууд байдаг.

Авъяас чадвартай нэгэн нь ганцаарчлан удирдах чадалтай, түүгээр ч барахгүй ингэх нь хөгжмийн талаасаа илүү хүчирхэг байх нь бий. Харин дорой хэдий ч олон хүмүүс нэгдэн Сүнс дотор нэгэн бие болж магтаал өргөх нь, Бурханд илүү таашаагддаг.

Ихэнх авъяаслаг хүмүүс гоцлох дуртай байдаг. Тайзан дээр гарч дуулах, хөгжим тоглох гэдэг нь, өөрийгөө хүчтэйгээр илэрхийлэх нэг маягын арга хэлбэр гэж ойлгогддог бол, Чуулганы Ариун индэр дээр энэ нь эсэргээрээ юм.

Тайлан тоглолт хийгээгүй гэдгээ үргэлж санаж, өөрийгөө биш Эзэнийг алдаршуулах, илэрхийлэх цаг гэдгийг ухамсарлах ёстой. Миний дуу хоолой чангарах цаг биш, харин бусдын дуу хоолойг гаргахад дэмжин туслах хором юм.

Удирдагч нь, өндөр түвшиний хөгжмийн мэргэжилтэн ч байж болно, үгүй ч байж болно. Хөгжмийн ерөнхий түвшиний боловсролтой байлаа гэхэд зэмсгийн бүх төрөл дээр нэвтэрхий тоглож чадахгүй нь мэдээж. Тиймээс багийнхан нь удирдагчдаа мэргэжлийн зөвлөгөө өгч болно. Гэхдээ эцсийн шийдвэр гаргалтыг түүнд үлдээж, эрх мэдлийг хүлээн зөвшөөрч, гаргасан шийдвэрт нь дуулгавартай захирагдах хэрэгтэй. Харилцааны ийм чадваргүй бол, багийн хамгийн энгийн үйлчлэлч бүрэлдэхгүй юм.

Энэ нь, Чуулган Бурханыг хамгийн дээдээрээ магтах, хүндэтгэлээ илэрхийлхэд нь туслах үйлчлэл юм. Чуулган дотор олон ахан дүүс, нүдэнд шууд тусахгүй эгэл даруу үйлчлэлүүдийг хариуцаж байдаг. Харин магтаал-хүндэтгэлийн үйлчлэл нь, шууд олны өмнө ил тод, хүмүүсээс хүндэтгэл хүлээх байр сууринд байдаг тул, бардамнах сэдэлд амархан унах боломжтой гэдгийг үргэлж сана.

Магтаалын баг, даруу байх бүх арга замыг эрэлхийлэх ёстой. Эс бөгөөс Worshiper биш люсифер (сатан) адил болох аюултай. Энэ баг нь, хамтдаа тогтмол үйлчилвэл (group dynamic) нэгдмэл хүч бий болдог. Ингэлээ гээд, Чуулганаас тусдаа бүлэг хүмүүс биш гэдгээ үргэлж илэрхийлэх нь зохистой.

Магтаал-хүндэтгэлд пасторын байр суурь асар чухал үүрэгтэй. Пастор, ихэвчлэн 30-н минут үргэлжилдэг магтаалыг 10-н минут сунгахыг тушааж ч магад. Дуулгавартайгаар үйлчлэх нь Ариун Сүнсний гайхамшигт үйлс илрэх боломж олгодог.

Магтаал-хүндэтгэлийн баг нь, үндсэн 4-н хэсгээс бүтдэг.
1. Магтаалын удирдагч (Worship Leader): Түүний тухай өмнө нь ярилцсан тул хэдэн зүйл товчлон үзье. Тэрээр, хүмүүстээ тодорхой алсын хараа өгч, тэднийг Эзэн рүү удирдах халуун хүсэлтэй нэгэн байх хэрэгтэй. Гэнэтийн ямар нэгэн хүчин зүйлээс болж мөргөл замбараагүйтэх, уур амьсгал хурцдах үед ч ноён нуруугаа алдалгүй, тайван амгалан байдал, эв нэгдэлийг тунхаглан удирдан гарч чадахуйцаар төлөвшсөн байх ёстой.

Мөн, заримдаа Чуулганыхаа хүмүүст зааж сургаж байх үүрэгтэй. Сургалт нь, ихэнхдээ мөргөлийн цагаар байдаг учраас хүмүүст хүндрэл учруулхааргүй, энгийн чөлөөт аргаар заах бэлтгэлээ базаасан байх хэрэгтэй. Багийнхан нь мэргэжлийн хувьд ч, сүнслэгээр ч, үргэлж өөдөлж дэвжиж байхын тулд, тэднийгээ ч сургаж, үлгэрлэж байх ёстой.

Бас нэг анхаарах зүйл бол, баг дотроосоо орны хүнээ Ариун Сүнсний тусламжтайгаар сонгож, мөн л Түүний хайр, мэргэн ухаанаар дагалдуулан шинэ удирдагчийг бэлтгэх нь чухал.

Ер нь, Эзэний дотор нэг бие болон төлөвшиж, гар сэтгэл нийлэн үйлчилж сурсан багийнхны хэн нь ч, Эзэнээс гэнэтийн томилгоо аван хаана ч очсон, магтаалын удирдагч хийх чадвартай болсон байдаг. Эзэн биднийг, сурсан зүйлээрээ өөр бусдад ивээл болоосой гэж, шинэ орчин, шинэ харилцаан дотор улам ихийг ойлгож ухаараасай гэж, бас хэвшмэл нэгэн хэв маягт автан бүү ялзраасай гэж, эцэст нь Өөрт нь дуулгавартай байдалд сургах гэж, үргэлж хөдөлгөж, өөрчилж, сэлгэж байдаг.

2. Хөгжимчдийн баг (Instrumentalists): Магтаал-хүндэтгэлийн багын үйлчлэлд хөгжимчдийн ур чадвар асар нөлөөтөй. Тиймээс, боломжтой бол мэргэжлийн хүнийг сонгох нь зүйтэй.

Тэгээд хөгжимчид нь, зэмсэгийг Ариун Сүнсний онгод, хүч, хайрыг илчлэн илэрхийлэх багаж, зэвсэг болгон ашиглаж чаддаг зүрх сэтгэл, авъяасыг Эзэнээс авч, мэргэжлийнхээ ур чадвар дээр нэмсэн байх ёстой. Тэд өнгө өөрчлөн тоглох чадавхи (transposition), цээжээр тоглох дасгал (improvisation) хийж, ур чадвараа өсгөж байх хэрэгтэй.

Магтаал-хүндэтгэлийн үйлчлэл бол зөвхөн нотоор бичсэнийг даган тоглох нь биш юм. Нийтлэг магтаалуудыг шууд тоглож чадахуйцаар гартаа оруулсан байх нь зохистой. Магтаал-хүндэтгэлийн үйлчлэгч нь, “дагалдагч хөгжимдөгч” гэдгээ үргэлж санах хэрэгтэй.

Жинхэнэ хөгжимчин нь, хоршин тоглогчийнхоо аялгууг босгон байгуулж, цогцлоох чадвартай байдаг. Хөгжимчид нь, дууны багийнхны дагалдан байж, харин дуулаачид нь Чуулганы дуулж буй магтаалыг эмх цэгцтэйгээр, хэмнэл дотор чиглүүлэх үүрэгтэй.

3. Дууны баг: Удирдагчтайгаа хамт Чуулганы урд гаран дуулдаг тусгай хүмүүс байдаг. Нэгээс хэдэн арван хүний бүрэлдхүүнтэй байж болно.

Дуучид нь, хөгжимчдээс илүүгээр бусдын нүдний өмнө байдаг. Дуулах үйлчлэл нь юуны түрүүнд дууныхаа үгийг өөрийн болгохоос эхэлнэ. Энэ нь, үгэнд тусгагдсан теологийн үнэнийг чин сэтгэлээсээ ухаарч, тэдгээрийг өөрийнхөө болон Чуулганы өмнөөс Бурханд бүх зүрхээрээ өргөл болгон дуулна, гэсэн үг.

Заавал биш боловч, үйлчлэл тань үр жимстэй байхын тулд, чин сэтгэл, хөлс хүч шингэсэн Эзэнд тааламжит өргөл байхын тулд сайтар бэлтгэж, дээд өнгө, доод өнгө, легатто, стакатто, чичиргээ, нунбибрат зэрэг дууны өнгүүдийг гаргаж чаддаг түвшинд, ур чадвараар өсөх хэрэгтэй.

Тухай бүр өгөгдсөн дууны өнгийг таних сонсголтой байх хэрэгтэй. Дууны багийнхны эрхэм зорилго нь дараахи байдлаар тодорхойлогдоно.
А) Хүмүүсийн зүрх сэтгэл бэлтгэгдэж, сүнсээр ба үнэн сэтгэлээсээ Бурханд хүндэтгэл өргөхөд нь дэмжин туслах үүрэг нь, шууд дууны багийнхантай хамаатай. “Хүндэтгэл ингэж өргөөрөй” гэж харуулж байгаатай ижил юм. Ийм мэдрэмж төрүүлж чадах зөв нөлөөтөй байх нь чухал. Өндөр өнгөөр дуулж чаддаггүй хэдий ч, чин сэтгэлээсээ Эзэнийг хүндэтгэж байгаа гэрэлтэй нүүр царайг хүмүүс харах ёстой.

Б) Зарим үед хүмүүс удирдагчийн удирдлагыг ойлгохгүй тээнэгэлзэх үе гардаг. Энэ үед дууны багийнхан өөрсдийн гаднах илэрхийллээр удирдамжийг Чуулганд тодорхой харуулан үлгэрлэж өгдөг. Дараалал өөрчлөгдөх, алга таших, гараа өргөн магтах, залбирах, урдчилан төлөвлөөгүй дуу дуулах зэрэгт, дууны багийнхан үйл хөдлөл, дуу хоолойгоороо илэрхийлэн чиглүүлэхэд, хүмүүс аяндаа тэднийг дагадаг.

В) Дууны багийн нэг чухал үйлчлэл бол зуучлан залбирал юм. Хөгжимчид хөгжмийн хувьд илүү авъяастай бол, дуучид нь сүнслэг төлөвшилөөрөө тэргүүлэгчид юм. Мөргөлийн өмнө, бас дараа нь ч хамтдаа залбирдаг гэр бүл байх ёстой. Мөргөлийн үеэр ч гинжин холбоогоор тасралтгүй зуучлан залбирах ба энэ нь Эзэнд тааламжтай, бас хүмүүсийг биеэ барьсан байдлаас нь чөлөөлдөг.

4. Арын алба (Staff): Магтаал-хүндэтгэлийн багийг араас нь дэмжин тусалдаг хүмүүс зайлшгүй хэрэгтэй. Эдгээр нь, магтаалын үйлчлэл үр жимстэй, амжилттай болоход маш чухал үүрэг хариуцлагатай оролцдог тул, анхнаасаа л багийн бүрэлдхүүнд тооцогдон, ажил үйлчлэлээ хамтдаа эхлүүлэх хэрэгтэй. Тэд тайзны үйлчлэлд хамгийн бодит үнэлгээ өгөгчид юм.

А) Дууны төвшин тохируулагч: Түүнийг заримдаа систем техникийн оператор (PA system operator), эсвэл дууны инженер ч (Sound ingener) гэж нэрлэдэг. Микрофон, дуу дамжуулагч, дуу холигч (mixer), сигуинсер (seguencer), цахилгаан хөгжмийн холболтуудыг сайн мэддэг байх хэрэгтэй. Хичнээн өндөр ур чадвартай тоглолт хийлээ ч цахилгаан холболтуудаар, тохиргоогоор тэрхүү аялгууг цэвэр гаргаж чадахгүй бол үр нөлөө нь эрс муудна.

Нөгөө талаар, ур чадвараар тийм сайнгүй тоглолт хийлээ ч, сайн тохиргоогоор сул хэсгүүдийг нөхөж сайжруулан, хүмүүст хүргэж болно. Тиймээс тухайн хүн, зөв өнгийг өгч, зохист найруулгыг хийн амьдруулж чаддаг хөгжмийн сонсгол, мэдрэмжтэй байх хэрэгтэй.

Б) Гэрэлтүүлэгч: Чуулганд энэ үйлчлэл байвал сайн. Тэгвэл магтаалын үйлчлэл илүү сүр жавхлантай болдог. Мөргөл эхэлснээс хойш эхний хагаст тод гэрэлтэй байгаад, магтаалын цагт бага зэрэг бүдгэрч өгвөл зохимжтой.

Сургаалын үеэр номлогчийн дээр онцгойлон гэрэл тусгаж өгөх нь хүмүүсийн анхаарал төвлөрхөд дэм болдог. Залбирлын үеэр гэрэл сүүмгэр болох нь, итгэгч биеэ барихгүйгээр Эзэнд хандах бас нэг нөхцөл юм.

Энэ үйлчлэл нь, асааж унтраах төдийгөөр хязгаарлагдахгүй. Гоо сайхны мэдрэмж, ур чадвар шаардлагатай. Гэнэт хурц өгөх, эсвэл огцом унтраахаас зайлсхийж, анзаарагдахгүйгээр зөөлөн шилжилт хийн өнгийг сольж, хурц эсвэл бүдэг болгож чаддаг байх ёстой. Ингэснээр магтаал-хүндэтгэл бүхэлдээ усны урсгал мэт зөөлөн уур амьсгалаар явагдана.

В) Дэлгэц хариуцагч: OHP (Over head project) ч юм уу, слайд (slaid), мөн мультвижн (multi vision) зэрэг техникийн хэсгүүдийг эрхлэн хариуцдаг. Удирдлагаас өгсөн дууны үгс, Библийн ишлэлүүдийг ямарч алдаагүй дарааллынх нь дагуу, яг тогтсон цагт нь гаргаж дадлагажсан байх нь зүйтэй.

Үйлчлэлийн дараалалд гэнэтийн өөрчлөлт гарлаа гэхэд, тухайн ишлэл, дууны үгсийг шууд л олдог, дэлгэцэнд шилжүүлдэг байх ёстой. Хариуцсан техник хэрэгсэлээ маш сайн мэддэг, үргэлж бэлэн байлгадаг, дуулгавартай даруу зүрх сэтгэл, төлөвшилтэй байх нь зөв юм.

Ийнхүү магтаалын баг нь, бүрэн бүрэлдхүүнээрээ нэг гэр бүл болж, хамтдаа Эзэний дотор нөхөрлөн, тогтмол чин сэтгэлээсээ бэлтгэл хийж байх нь Эзэнд тааламжит өргөл болно. Багийн үйлчлэл нь үр жимстэй байхын тулд хамгийн бага зүйлд ч, хүн бүр өөрсдийн үүрэг хариуцлагаа итгэмжтэйгээр биелүүлэх хэрэгтэй.

Бие биенийгээ хүндэтгэн нэгдмэл нэг санаагаар, нэг зорилготой бэлтгэл сургуулилтаа, үйлчлэлээ Эзэнд өргөх нь нэн зохистой. Өөрөө өөрийгөө дөвийлгөж эхэлбэл, багийн үйлчлэл сарнин бутардаг. Нэг гэр бүл, гэдэг үндэснээс эхэлбэл үйлчлэлээр тань дамжин, Эзэн гайхамшигтайгаар алдаршдаг ба бялхам үр жимс гардаг.

Магтаал-хүндэтгэлийн ерөнхий загварыг төлөвлөн гаргах, дүгнэлт хийх, үнэлгээ өгөх зэрэгт, мөн бэлтгэл сургуулилтын үйл явцад, сургаал номлох пастор үе үе биечлэн оролцож, урам зориг өгч байвал, багийн идэвхи сэргэж, үйлчлэлдээ хүчтэй байх болно. Бас Чуулганы ахан дүүсийн төлөвшилд ч үр нөлөөтөй тус дэм болох юм.

Мөн дагалдан хийж, дараагийн үе болон бэлтгэгдэж буй хүмүүс (бэлтгэл багийнхан) бүхий л төлөвлөлт, бэлтгэл сургуулилтанд хамтдаа оролцож байвал сайн. Хэрхэн магтаалын үйлчлэл бүтэж бий болдгийг харж суралцах юм.

Хаана ч, хэзээ ч, ямар ч үед чөлөөтэйгээр магтаж болохуйц 50 орчим дуугаар Эзэнд магтаалыг өргөж хэвшин, бүрэн өөрсдийн болгосон байх, бүр цаашилбал хамтын уран бүтээлийн сан хөмрөгтэй (өөрсдийн зохиосон магтуу) байх нь нэн зохистой.

"Магтаал-хүндэтгэлд үйлчлэхүй" хичээлийн лекцийн товчлолоос
Шалгасан багш: Амартунгалаг UBTC

Итгэлийн талаархи ярилцлага-4 Төлөвшихүйг индексжүүлэх оролдлого

2009-06-30T09:00:00.002-07:00

За, эдгээр нь жинхэнэ Христитгэлийн гол үзүүлэлт, үнэнч итгэгчийн тодорхойлолт болж чаддаггүй, зөвхөн туслах орц төдий бүрэлдхүүн үзүүлэлт юм байна. Тэгвэл жинхэнэ зөв төлөвшсөн итгэгчийн шинж ямар байх вэ? Жинхэнээсээ Бурханы хүслийн дагуу амьдрана гэж яах вэ? Хэрхэн үнэн зөвөөр Эцэгийн хүслийн дагуу өөрчлөгдөж байгаагаа мэдэх, мэдрэх вэ?

Энэ нь нилээн ярвигтай асуудал. Энд тодорхой жор, аргачлал үгүй. Учир нь гол харилцагч маань болох Эзэн маань бүхнийг мэддэг, чаддаг бөгөөд, хязгааргүй төгс боломж, эрх мэдлийг эзэмшигч Нэгэн тул, амь сүнс болгонтой хамгийн зохистой, таарсан хувилбараар тулж ажилладаг ба ажиллах боломжтой.

Одоо яриа маань эндээс “төлөвшилийн итгэл”-ийн талаархи сэдэв рүү орж байна. Энэ нь цаашдаа үргэлжлүүлэн хэрхэн Эзэний хүслийн дагуу, энэ дэлхийн гэрэл, давс болон амьдрах вэ?, гэсэн том сэдэв юм. Бурхан болон Түүний сонгосон ард түмний хоорондын харилцаа гүнзгийрэн батжхад “хөвч хөндөлт” (Эх. 17:9-14)(Ром 2:29) гарааны үндсэн нөхцөл болдгыг “Гэрээ”-нд заасан байдаг.

Судар бидэнд, хүнийг зүгээр л гэмт байдалд нь, бузар таашаалд нь “жаргаахын” тулд Бурханы Хүү нас барсан гэдэггүй. Эзэн “…чи дээрээс дахин төрөхгүй бол (Иох.3:3-8), өөрчлөгдөж хүүхдүүдтэй адил болохгүй бол (Мт.18:3), тэнгэрийн хаанчлалд орохгүй…” гэдэг. Бас, Намайг “Эзэн минь, Эзэн минь” гэсэн болгон тэнгэрийн хаанчлалд орохгүй. Харин тэнгэрт байгаа Миний Эцэгийн хүслийг биелүүлдэг хүн орно (Мт.7:21), гэж анхааруулдаг.

Эцэг биднийг, Өөрийнх нь Хүү Есүс Христтэй нөхөрлөн (1Иох.1:3-7)(1Кор.1:9), сайн үйлсийн төлөө, Түүний дүр төрхөөр (Еф.2:10), (Фил.2:5) шинэчлэгдээсэй гэж хүсдэг. Тэгэхлээр Христитгэл маань нэг удаагийн гэмшил, сэтгэл хөдлөлөөр бүх асуудал шийдэгддэг байдлыг шаарддаг, зарим хүний гэнэн бодол төсөөллөөс огт өөр, үргэлжлэн өрнөж, үргэлж шинэчлэгдэж байх тэнгэрлэг үйл явц юм.

Энэ нь авъяас болон мэдлэг дотор хүчирхэгжин, нийгэм ба Чуулган доторхи байр суурь, нөлөөлөл өргөжин бэхжих байдлаар илэрхийлэгдхээсээ илүүтэй, Есүстэй тогтоосон хувьчилсан дотно нөхөрлөл дотор батжсан, дотоод мөн чанарын, зүрх сэтгэл, зан хандлагын өөрчлөлт, байх ёстой (Гал.5:22).

Бас энэ нь айхтар сүнслэг ид шид, эрдэм чадлын талаархи яриа ч биш. Харин загалмайн үхлийн, урссан цусны үнэ цэнийг, дахин амилалтын утга учрыг, эцсийн өдрийн дүр зураглалыг улам тодорхойгоор, урд урдхаас илүү гүн батаар зүрхэндээ дахин дахин ухаарах үйл явц юм. Түүний хайрыг улам ойлгон, ээнэгшиж, Түүний өмнө улам даруу, дуулгавартай болох үр жимс боловсрох нь, гол шинж нь болдог.

Үе үеийн Эзэний олон ариун хүмүүс, Христийн доторхи хувь хүний өөрчлөлт, тэнгэрлэг төлөвшил нь яг ямар зарчим, шат дараалал дотор өрнөх, ямархуу шинж тэмдэг, үзүүлэлт харагдах талаар, өөрсдийн туршлага, мэдлэг, Ариун Сүнсний удирдамж, чиглүүлэлт зэргийг үндэслэн индексжүүлэх гэж оролдсоор ирсэн. Индексжүүлэх гэдэг нь олон талтайгаар, маш их баялаг үзэгдэл, үзүүлэлтээр илэрхийлэгддэг барьцгүй хийсвэр мэт ухагдхууныг, тодорхой барьцтай, ойлгомжтой, зураглал болгох гэсэн оролдлого юм.

Энд нэгэн, 3-н үе шат бүхий индексжүүлэлтийг таньд толилуулъя. Эхний шатыг “Тэмүүллийн үе” гэнэ. Энэ нь хүмүүний зүрхэнд Эзэн амийг (Христитгэлийг) өгсөнөөр эхэлнэ. Таны зүрх сэтгэл айдас, тодорхойгүй байдал, ганцаардал, бухимдал, хонзогнол, мухар сүсэг зэрэг харанхуйн дарамт шаналал дотор байсан. Таны эргэн тойрны амьдрал ч бүтэлгүйтэл, гачигдал, хэрүүл тэмцэлээр дүүрсэн, бие махбодь чинь өвчлөл, доройтлоор туйлдсан байсан. Таныг муу зуршил боолчилж, баларч, уруудаж байгаагаа мэдэх боловч яаж ч чаддаггүй байсан.

Гэтэл Эзэн таны зүрхэнд, “гэрэл бий болог гэсэнд, гэрэл бий болно”. (Энэ талаар дээр бид тодорхой ярилцсан. Тэр бидний зүрхэнд Христитгэлийн тулгуур үнэнүүдэд итгэх итгэл үнэмшилийг, Өөрийн сонголтоор бэлэг болгон өгсөн.) Та хар хүчнээс чөлөөлөгдсөнөө, тэнгэрлэг тайвшрал, амар амгалан зүрхэнд тань бий болохыг, гэрэл гэрэлтэхийг мэдрэх болно.

Таны эргэн тойрны тань амьдралд ч Эзэн мутраа сунган оролцож, тулгамдсан, хоолойг тань боомилсон олон асуудлыг хамгийн сайнаар, төсөөлж байгаагүйгээр ончтой шийдэж өгнө. Бие махбодид тань ч эдгэрлийг хэрэгжүүлнэ. Та Чуулганд хамрагдаж, Эзэний Үгэнд шунан дурлах болж, ариун хүмүүсийн нөхөрлөлийг, бусад хуучин хүрээлэл, орчингоосоо илүүтэй эрхэмлэн үздэг болно.

Ийнхүү амийг авсан та, Түүний гоо сайхан, гэрэл, хүч, хайрыг улам бүр, илүү ихээр эзэмдхээр, танин мэдэхээр тэмүүлж эхэлнэ. Ингэхдээ энэ зорилгод тань саад болж байгаа тоо томшгүй хүлээс, зуршил, үзэл бодол, зан чанар, хамаарал таныг боолчилж буйг олж харна. Тэгээд тэнгэрлэг үнэн рүү тэмүүлэх тэмүүлэл, Есүсийг хайрлах хайр тань илүү хүчтэй бол зугуухан (магад нэг хоромд байхыг ч үгүйсгэхгүй) тэдгээрээсээ ангижирч, чөлөөлөгдөж эхэлнэ.

Харин та тэднийг үзэн ядахгүй, чөлөөлөгдөхөөр тэмцэхгүй, бэрхшээлээс айн (заримдаа ч таашаал авдаг гэмт зуршилаа Есүсээс илүү хайрлаж, хагацан яддаг) аялдан дагалдаж, хүлээн зөвшөөрсөн тохиолдолд, тэдгээрээс үүсэлтэй дэлхийн элдэв асуудлуудад нухлуулсан, цаана нь л гарахын төлөө зүтгэсэн, энэхүү зовлонт амьдралдаа Эзэнээ ашиглахыг оролдсон нэгэн болж, гацаж орхих өндөр магадлалтай.

Асуудлуудыг шийдэн ард нь гарах нь бидний амьдралын зорилго биш. Асуудлын цаана асуудал, давалгааны цаана давалгаа заавал байдаг нь, энэ ертөнцийн мөн чанар юм. Харин “…бүх зүрх, бүх сэтгэл, бүх оюун ухаанаараа өөрийн Бурхан Эзэнээ хайрлах нь, хөршөө өөрийн адил хайрлах нь…” (Мт.22-36-40) бидний зорилго ба, үүний төлөө асуудалтай биш өөртэйгөө л тэмцэх ёстой. Петр хэдийгээр Эзэнийг харж байхдаа, зоригтойгоор усан дээгүүр алхсан ч, давалгаа салхи (асуудлуудыг) хараад живж эхэлснийг сана (Мт.14:25-31).

Энэ үе нь уналт босолт, гэмшил харуусал, нулимас заримдаа цус, сахилгажуулалт, ухаарал ба ойлголт, баяр хөөр ба эдгэрэл, сэргэлт, амьдралын орчин нөхцөлийн эрс өөрчлөлт, шинэ танин мэдэхүй зэргийг багтаасан, адал явдал дүүрэн байдлаараа нэн онцлог. Ийнхүү та шантралгүй зүтгэсний үр дүнд, анхлан мэдэрсэн гайхалтай тэнгэрлэг эрх чөлөөг, амар амгаланг, баяр хөөрийг бүрэн өөрийнх болж байгааг ухаарна. Тэдгээр нь таны салшгүй нэг хэсэг, таныг тодорхойлох нэг чухал үзүүлэлт болно.

За ингээд, та энэ шатыг амжилттай давлаа. Мэдээж энэ нь тодорхой тогтсон цаг хугацаагүй. Зарим нь 3-н сар, зарим нь 3-н жил, бүр зарим нь бүх насаа энэ шатанд унан, босон өнгөрөөж ч магад. Бас одоо л энэ үеийг даваад, анги дэвшиж байна даа, гэж тодорхой мэдэгдэхгүй, анзаарагдахгүй зугуухан шилжилт, эсвэл эрс харагдахуйц шинэчлэл сэргэлт, дэвшил ирж ч болно.

Удаахыг нь “Алдаршууллын үе” гэнэ. Энэ үеийг дотор нь хоёр дэд бүтцэд задалж тайлбарлая.

А: Таны оюун санаа, зүрх сэтгэл, дэлхийн олон асуудлаас, хэрэггүй хоосон мөрөөдөл, хүслээс чөлөөлөгдсөн. Нэг үгээр та ариуссан. Дотоод болон гадаад эдгэрэл, шинэчлэл хэрэгжсэн. Тэгээд үр дүнд нь, Түүний хайраар, гэрлээр, үнэнээр бялхсан.

Тэгээд таны энэ дотоод мөн чанарын өөрчлөлт тань, гадаад байдалд тань илэрэн харагдахгүй байхын аргагүй. Сайн модноос сайн үр жимс гарна (Мт.7:17). Таны амьдрах хэв маяг эрүүл саруул, тэнгэрлэг, үлгэр жишээч болно. Таны зан чанар эрс шинэчлэгдсэн байна (Гал.5:22). Таны амнаас үргэлж энэрэл нийгүүлслийн, бусдыг босгон байгуулах үг, бусдыг авралд хөтлөх Сайн Мэдээ урсан гарч байх болно. Зүрхний бялхалаас ам ярьдаг.

Энэ үед та Чуулганд тодорхой үйлчлэлтэй ч болсон бай, үгүй ч бай үл шалтгаалан, таниас Христийн гэрэл, дүр төрх, зөвт ариун байдал цацрах тул, ямарч мунхаг нэгэн анзаарахгүй байхын аргагүй болно. Үүгээр тань дамжин, таны Бурхан алдаршина. Таныг харахдаа олон хүн өөрийн атаач, ховч, шуналтай, завхай, бардам дээрэнгүй гэмт байдлаа жишин олж хараад, ичин гэмшиж, таны Бурхан руу эргэх юм.

Нэгэнт та хэлж ярьж буй зүйлийнхээ (Христийн Сайн Мэдээний) бүрэлдхүүн хэсэг, эд эс нь болсон тул, тунхаглал тань, үг тань эрх мэдэлтэй, эрч хүчтэй байж, мөхөс сүнсний зүрхний мухарт гүн бат суулгагдана.

Б: Үүгээр ч зогсохгүй. Таны хувьд урд нь, алдаа зөрчил, харанхуй бурангуй, шударга бусаар дүүрэн байсан энэ дэлхий, таны Эцэгийн гайхалтай мэргэн ухаан, төгс хүч чадлынх нь илэрхийлэл гэрчлэл, Түүний гэрлийн оршихуйн тусгал болох нь тодорхой болно. Та юухнаас ч, өөрийн Бурханыхаа хайр, зөвт шударга, хязгааргүй сүр хүчийг нь олж харан, бахдан шагшиж, зүрхэндээ Түүнд алдарыг өргөх болно.

Өглөө нар мандах нь, орой шингэх нь ч юм уу, шөнийн тэнгэрийн үзэсгэлэн гоог ч юм уу, хүмүүний цог жавхлан, үнэ цэнийг ч юм уу, урьд хэзээ ч мэдэрч, ойлгож, ухаарч байгаагүйгээрээ ойлгож ухаардаг, эдгээрээс сэтгэлийн таашаалыг эдэлдэг болж, энэ нь танд маш их аз жаргал, баяр хөөрийг өгнө. Энэ нь юухан дээр ч илэрнэ.

Та нэг ширхэг навчийг харахдаа, тэрхүү гайхалтай бүтээл нь эмзэг бөгөөд турьхан, амьд бөгөөд мэдэрдэг, гадаад нөлөөлөлд хариу үйлдэл үзүүлдгийг ухаарч хайрлан нандигнадаг байхад, хүмүүний ертөнцийн түүхийг судлахдаа ч Эзэний хайр, мэргэн ухаан, хүч нь хэрхэн өдрөөс өдөрт, үеэс үед үй олны аврал, оршихуйнх нь утга учир, хөгжил дэвшлийнх нь тулгуур болж ирсэнийг ойлгон, бахдан баярлах жишээтэй.

Энэ нь нэг удаагийн сэтгэл хөдлөл төдий биш, таны зүрх сэтгэлийн, оюун сэтгэлгээний тань байнгын хэв шинж болон хэлбэржинэ. Олон хүн би “дэлхийн ажил” хийгээд, Эзэндээ алдарыг өргөж, үйлчилж чадахгүй байна, гэж өөрийгөө яллаж, шаналж явдаг. Олон хүн, надад магтаалын, номлолын, эсвэл харь хэлний, эдгэрлийн гэх мэт тосолгоо байвал Чуулганд үр дүнтэйгээр үйлчилж, Эзэнийг алдаршуулна, гэж боддог. Энэ нь том эндүүрэл юм.

Эзэн бидний зүрхийг харж, тэндээс л Өөртөө алдарыг авч “нэн сайхан” (Эх. 1:31) хэмээн дуу алддаг. Үүнийг Эзэн бас өөрөөр, “Бурхан бол сүнс. Түүнд мөргөгчид нь сүнсээрээ, үнэнээр мөргөх ёстой (Иох.4:24), гэдэг.

Тэгээд ч, үйлчлэлийнхээ алдаа, бүтэлгүйтэлд гунихарч, түүнээс болж шаналж, бүр “Эзэн яагаад намайг сорив, шийтгэв,” гэх, эсвэл өчүүхэн ололтондоо бардамнаж, түүнээсээ сэтгэл ханамж, тайвшрал, таашаалыг хайж, бахархал бардамналаа болгох нь, бүр Эзэний өмнө том гавъяа байгуулаад, агуу хайрынх нь хариуг барьчихсан мэт маадгар алхах нь, аль аль нь Эзэнд бузар юм. Ингэж үйлчилж бусдад бүдрэх чулуу болж, өөртөө гэм нүгэл хурааж байснаас, огт үйлчлээгүй (Чуулганд) нь дээр.

Бидний бахархал бардамнал, ханамж таашаал нь зөвхөн загалмай, Эзэнтэй амьд харилцаатайгаас ирдэг ухаарал, гэгээрэл, ариусал байх ёстой. Үйлчлэл тань албадлагаар (1Кор.9:7)(1Пт.5:2), эсвэл айснаасаа (1Иох.4:18), эсвэл цалин хөлсний улмаас (Иох.10:12,13) бус, Эзэнээ хайрласан, Түүний хайраар хөршөө хайрласан сэтгэл зүрхний тань илрэл, алдаршуулал байх болтугай.

Дээр өгүүлсэн болон хойно өгүүлэх төлөвшилийн шинжүүд нь, таныг хэн байх (эр, эм, хар, шар), ямар байр суурьтай байх (дарга, пастор, малчин, орцны жижүүр), хаана байх (монголд, солонгост) зэргээс огт үл шалтгаална. Ер нь, Библи биднийг нэр алдар, албан тушаалд бүү шуна (Иох.5:41; 6:15). Харин улам даруу дорд бол (Мт.18:4; 20:25-28). Хаана, хэн байхаасаа үл шалтгаалан Бурханы Хүү бай, гэдэг. Та хаана, ямар хүрээлэл орчинд байна, тэндээ Эзэнийгээ алдаршуулахын тулд илгээгдсэн болой.

“Алдаршууллын шат”-ын онцлог шинж нь, та сэтгэл хөдлөлд захирагддагаа болино. Ямар ч нөхцөлд тайван амгалан байдлаа хадгалдаг, үйл явдлын далд нууцлагдмал учир шалтгааныг олж хардаг, зөв мэргэн, тэнгэрлэг шийдвэр гаргадаг, аливаа дэлхийлэг хамаарлаас (улс төр, эдийн засаг, эцэг эх, тэрч бүү хэл пастор ахлагч нараас) бүрэн шахуу чөлөөлөгдсөн, Эзэнтэйгээ салшгүй нэгдмэл болсон, зэрэг илрэлүүд байна.

Энэ үеийн хамгийн гол сэрэмжлэх зүйл нь эрх мэдэл юм. Эрх мэдлийн сорилт нь зүрх сэтгэлийг соронздох аймшигтай хүчтэй. Энэ нь үзэгдэх гэхээсээ илүү үл үзэгдэх байдал нь дур татам. Аливаа өвчин, муу сүнс дээрхи болон хэлсэн үг нэг бүр чинь итгэлийн андын чинь, эсвэл бурхангүй нэгний амьдралд биеллээ олох нь, тэр ч бүү хэл цаг агаар, байгалын үзэгдэл юмсанд ч тушаах хүч нөлөөлөл, аманд тань амтагдаж, цээжинд тань бялхах нь нэн таатай.

Яг л Бурхан болсон мэт, олон асуудалд амархан шийдэл, олон бузар мууд амархан төгсгөл хийх боломжтой болсон мэт, санагдана. Энэ байдлаас бүү таашаал ав, зүрхээ бүү эзэмдүүл. Эрс татгалз. Сатанд ч эрх мэдэл байдаг ч, тэр энэ ертөнцийн аврагч биш, харин ч бүх хорон муугийн үндэс юм (Лук10:18-20). Танд өгөгдсөн эрх мэдэл, таны доторхи хүнийг л цэвэр ариун, даруу байлгахын төлөө ашиглагдаг.

Бас энэ үеийн төгсгөлд та цөл рүү дуудагдах нь дамжиггүй. Та зөвхөн нийгмийн амьдарлаас ч тусгаарлагдхаас гадна, бүр Чуулганы амьдралаас ч холдож хөндийрнө. Энэ байдал тань олон хүнд таалагдахгүй ба таниас сэжиглэн цэрвэж, гаж маанагаар чинь дуудаж, мөн “засаж залруулхаар, ухааруулан гэмшүүлхээр” ятгацгаана.

Ийнхүү та эцсийн шат болох “Даатгалын үе”-д дэвшин орлоо. Энэ нь яг л цөлийн амьдарлаас эхлэнэ. Одоо та гуйвшгүйгээр Эзэний зам дээр зогсжээ. Та хоёр, хоюулахнаа нүүр нүүрээ хараад зогсож байна.

Та Түүгээр амьсгалж, Түүгээр хооллож, Түүний дотор, Тэр таны дотор салшгүй нэг болсон. Өнгөрсөн бүхий л хугацаанд та Өөрийн Бурханы сайн гэдгийг хангалттай амсаж (Дуу.34:8) мэдсэн. Таны төлөвлөдөг, төсөөлдөг, мөрөөддөг, тэмүүлдэг ямарч “сайн” нь, таны Бурханаас танд санал болгодог, таны амьдрал дээр бодитоор хэрэгжүүлдэг жинхэнэ сайны дэргэд юу ч биш гэдэг нь, танд тодорхой болсон.

Та олонтоо дасгалжуулагдаж, сахилгажуулагдаж, улам даруусан, таны Эзэний төгс Ариунтай жишихэд, өөрийнхөө хичнээн сул дорой, гутамшигтайг улам гүнзгий ойлгож, жигших болсон (Эх.18:27)(Иох.12:25)(1Иох.1:8,9). Тэгснээр та, улам бүр загалмайн агуу хайрыг, дахин амилалтын хүч нөлөөллийг, эцсийн өдрийн дүр зураглалыг зүрхэндээ шинэчлэн, гүн батаар дахин дахин ухаарсаар байсан.

Таны бахархал, хамаарал, түшиг тулгуур тань, таны мэдлэг, ололт амжилт, үйлс бүтээл тань биш, зөвхөн Есүс л болсон. Та ямарч эргэлзээгүйгээр Түүнд өөрийгөө бүрэн даатгасан. Олон хүн, “Би Эзэний өмнө барьж очих баялаг, өмч хөрөнгөтэй. Тэдгээр нь миний тарьсан чуулган, барьсан сүмүүд, сайн мэдээ тараасан хүмүүс юм”, гэж боддог. Харин та, энэ нь Түүний өмнөх бардамнал юм, гэдгийг таньсан.

Та чуулганы сэргэлтийн төлөө, нийгмийн шинэчлэлийн төлөө дэвхцээд байхаа больсон. Учир нь юунаас ч үл шалтгаалах Христийн амар амгалан зүрхэнд тань гүн нутагласан (2Тес.3:16) ба бүх эрх мэдэл зөвхөн Түүнд байдгийг та мэдсэн (Мт.28:18). Таны гаргасан алдаа завхрал, Түүний цусаар угаагдсан. Бүтээсэн ололт амжилт тань ч Түүний л хүч, нигүүлсэл, төлөвлөгөөгөөр хийгдсэн, үнэнийг мэдсэн.

Ийнхүү таны бодох бодол, мэдрэх мэдрэмж, хэлэх үг, түүний тань хүч нөлөөлөл, хэрэгжилтээс өгсүүлээд, таны юу идэх, хэзээ хооллох, идсэн хоол тань хэрхэн шингэх хүртэлх бүхий л амьдралын тань өрнөл хөдөлгөөн, орчил эргэлт, харилцааг бүгдийг нь Тэр л хариуцана.

Учир нь та, итгэлийн амьдрал бол, хэн нэгэн хүн Христийг дуурайх гэж оролдох нь биш, харин Амьд Бурхан Христийг өөрөөрөө дамжин амьдруулахаар урин дуудах нь юм, гэдгийг ухаарсан. Түүнийг танаар дамжин Өөрийгөө илчлэхэд саад болох бүхнийг, өөрийн зүгээс арилгасан.

Та ямарч хэлцэл тохироонд оролцож, элдэв төлөвлөгөө зохиохоо больсон. Тиймээс маргаашийн төлөө бүү санаа зов. Учир нь маргааш маргаашдаа санаа тавих болно. Өдөр бүрийн зовлон тухайн өдөртөө хангалттай (Мт.6:34) (Сур.үгс27:1). Та, Түүнд зориулж өөрийгөө тусгаарласан (Лук14:16-24; 21:34).

Энд одоо хэн нэгэн нэр бүхий хувь хүн биш, харин хүн төрөлхтөнийг Өөрийнхөө дүр төрхөөр бүтээсэн, биднийг хайрлаж, аврахын тулд амиа өгсөн, бас дахин амилсан, Бурханы Хүү, тэнгэр газар дээрхи бүх эрх мэдлийг баригч Нэгэн ажиллаж, амьдрах болно. Үнэнээр, үнэнээр Би та нарт хэлье. Хэрэв улаан буудайн үр газарт унаад үхэхгүй бол тэр ганцаараа үлдэнэ. Харин тэр үхвэл олон үр бий болгоно (Иох.12:24).

Даатгалын шат нь хязгааргүй үргэлжилнэ. Бүр мөнхийн улсад ч шүү. Эцэст нь та Хүний Хүү шиг нэгэн (Илч.1:13; 14:14;)болно. Нүд тань галын дөл мэт, нүүр тань өөрийн хүчээр гэрэлтэх нар мэт, амнаас тань хоёр талдаа иртэй хурц илд цухуйсан, алтан бүс бүсэлсэн, өнгөлсөн хүрэл мэт хөлтэй Нэгэн болсон.

Таны зүрхэнд тань, бас тэргүүн дээр тань Эцэг “Чи бол Миний хайрт Хүү, Би Чамайг өнөөдөр төрүүлсэн. Чамд Миний таалал оршдог”(Мт.17:5) (Ев.1:5) гэх болно.

Түүгээр ч барахгүй “Чи бол Миний Хүү, Өнөөдөр Би Чамайг төрүүлсэн. Надаас гуй! Би үндэстнүүдийг Чиний өв болгон, Дэлхийн хязгааруудыг ч Чиний эзэмшил болгон өгнө. Чи тэднийг төмөр таягаар хэмх цохиж, шавар сав шиг бутлах болно.” (Дуу.2:7-9) гэнэ.

Бас “Би Чиний хөл дор бүх дайснуудыг чинь, бүр үхлийг ч хаяж, Чи тэднийг няц гишгэнэ” (Эх.3:15) (Ев.1:13) (1Кор.15:25-28) гэж амлана.

Та шинэ тэнгэр, шинэ газрыг (өөрөөр хэлбэл таниар дамжуулан Эзэн) бүтээхээр (Илч.21:1), бүх хана хэрэм (Иош.6:20), цайз хаалгануудыг (Мт.16:18) (Илч.3:8) эвдэх ялгуусан маршаа хийхээр явахад бэлэн боллоо.

Таньд энэ бүхнийг боломжтой болгосон, Таны Бурхан алдарших болтугай. Та бол Бурханы Хүү мөн. Та бол ертөнцийг Аврагч мөн. Халлелүяа.